ຂປລ. ເມືອງພີນ ແລະ ເຊໂປນ ທີ່ເຄີຍປະສົບ ບັນຫາໄຟຟ້າມັກຕົກ ເນື່ອງຈາກກະແສໄຟຟ້າບໍ່ພຽງພໍ ກໍຈະມີພະລັງງານໄຟຟ້າໃຊ້ຕື່ມອີກ ເພາະລັດຖະບານ ມີແຜນຈະກໍ່ສ້າງສະຖານີຈ່າຍໄຟຟ້າຢູ່ເຊໂນ ເຊິ່ງຈະດຶງໄຟຟ້າ ມາຈາກເຂື່ອນເຊເສັດ ແຂວງສາລະວັນ ເພື່ອສະໜອງໄຟຟ້າ ໃຫ້ບັນດາເມືອງ ຕາມເສັ້ນທາງ ເລກ 9 ໂດຍສະເພາະເຂດສອງເມືອງດັ່ງກ່າວ.
ທ່ານ ຄຳມະນີ ອິນທິລາດ ລັດຖະມົນຕີວ່າການ ກະຊວງພະລັງງານ ແລະ ບໍ່ແຮ່ ໄດ້ໂອ້ລົມຕໍ່ຄະນະນຳ ແລະ ພະນັກງານຫລັກແຫລ່ງ ພະແນກພະລັງງານ-ບໍ່ແຮ່ ແຂວງສະຫວັນນະເຂດ ພ້ອມດ້ວຍ ລັດວິສາຫະກິດໄຟຟ້າລາວ ສາຂາແຂວງ ແລະ ລັດວິສາຫະກິດ ກອງກໍ່ສ້າງ ແລະ ຕິດຕັ້ງໄຟຟ້າແຂວງ ໃນຕອນເຊົ້າວັນທີ 12 ສິງຫາ 2015 ນີ້ ທີ່ຫ້ອງປະຊຸມພະແນກການດັ່ງກ່າວວ່າ: ໃນຕໍ່ໜ້ານີ້, ລັດຖະບານມີແຜນຈະກໍ່ສ້າງສະຖານີຈ່າຍໄຟຟ້າ ຕື່ມອີກຢູ່ເຊໂນ ເຊິ່ງຈະດຶງໄຟຟ້າມາຈາກເຂື່ອນເຊເສັດ ແຂວງສາລະວັນ ເພື່ອສະໜອງໄຟຟ້າໃຫ້ບັນດາເມືອງ ຕາມເສັ້ນທາງເລກ 9 ໂດຍສະເພາະແມ່ນ ເຂດເມືອງພີນ ແລະ ເຊໂປນ. ສຳລັບໃນ ຂອບເຂດເທສະບານແຂວງ ກໍມີແຜນກໍ່ສ້າງ ຈຸດຈ່າຍໄຟຕື່ມອີກ ແນໃສ່ຕອບສະໜອງ ໄຟຟ້າໄດ້ຢ່າງພຽງພໍ ຮອງຮັບການຂະຫຍາຍຕົວ ເສດຖະກິດ-ສັງຄົມ ໃນປະຈຸບັນ ກໍຄືການສະໜອງ ເຂົ້າສູ່ເຂດ ເສດຖະກິດ ພິເສດສະຫວັນ-ເຊໂນ.
ທ່ານຍັງກ່າວຕື່ມວ່າ: ປັດຈຸບັນ ອັດຕາການຊົມໃຊ້ໄຟຟ້າ ຄອບຄົວປະຊາຊົນບັນດາເຜົ່າ ທົ່ວແຂວງສະຫວັນນະເຂດ ບັນລຸໄດ້ເກືອບ 90% ເຊິ່ງຖືວ່າ ລື່ນແຜນການ ທີ່ລັດຖະບານວາງໄວ້ ອັນໄດ້ປະກອບສ່ວນ ຢ່າງຕັ້ງໜ້າເຂົ້າໃນການ ພັດທະນາເສດຖະກິດ-ສັງຄົມ ຂອງແຂວງ ກໍຄື ເຮັດໃຫ້ຊີວິດ ການເປັນຢູ່ ຂອງປະຊາຊົນ ດີຂຶ້ນຢ່າງຕໍ່ເນື່ອງ. ພ້ອມດຽວກັນນີ້, ທ່ານ ລັດຖະມົນຕີ ຍັງໄດ້ກ່າວແນະນຳກ່ຽວກັບ ການດຳເນີນກອງປະຊຸມໃຫຍ່ ຮາກຖານພັກ ພະແນກ ພະລັງງານ-ບໍ່ແຮ່ແຂວງ ເຊິ່ງປະຈຸບັນ ພວມກະກຽມດຳເນີນກອງ ປະຊຸມໃຫຍ່ ຂັ້ນຂອງຕົນ.
ຂອບໃຈຂ່າວຈາກ:
