ດັ່ງພວກເຮົາໄດ້ເຫັນຕົວຈິງ, ຝົນຕົກລົງມາພຽງບໍ່ເທົ່າໃດຫ່າກໍສົ່ງຜົນໃຫ້ເສັ້ນທາງເປ່ເພຫລາຍເກືອບຢູ່ທົ່ວທຸກພາກຂອງປະເທດຄື: ເສັ້ນທາງ 13 ເໜືອ ໃນໄລຍະທາງແຕ່ເມືອງວັງວຽງ-ກາສີ ແຂວງວຽງຈັນ ອອກໄປຮອດຫລວງພະບາງ ແມ່ນມີສະພາບຮ້າຍແຮງຫລາຍ, ຫລາຍຈຸດຫລາຍບ່ອນກາຍເປັນບວກເປັນຂຸມແປງແລ້ວແປງອີກກໍຍັງຕົກຢູ່ໃນສະພາບຄຸນນະພາບຕ່ຳ. ກໍດັ່ງເສັ້ນທາງຫລາຍສາຍໃນຕົວເມືອງ, ນະຄອນຫລວງວຽງຈັນ ສ້າງຂຶ້ນມາພຽງບໍ່ເທົ່າໃດປີກໍຕົກຢູ່ໃນສະພາບຊຸດໂຊມໜັກ ແລະ ຮ້າຍແຮງທີ່ສຸດກໍແມ່ນເສັ້ນທາງແຕ່ໄຟແດງຄິວລົດສາຍໃຕ້ຕັດອອກສູ່ດົງໂດກ-ໜອງບຶກ ກໍຈົນຈະໃຊ້ງານບໍ່ໄດ້, ເມື່ອໃດຝົນຕົກລົງມາກໍເປິະເປື້ອໄປດ້ວຍຂີ້ຕົມ, ແດດອອກມາກໍເຕັມໄປດ້ວຍຂີ້ຝຸ່ນ ສົ່ງຜົນກະທົບໜັກໃຫ້ແກ່ການຄົມມະນາຄົມ, ສັນຈອນໄປມາ ແລະ ຮ້າຍແຮງໄປກວ່ານັ້ນ ກໍມັກມີອຸປະຕິເຫດເກີດຂຶ້ນເປັນປະຈຳ, ແຕ່ແລ້ວສະພາບດັ່ງກ່າວກໍຍັງບໍ່ມີຫຍັງເຊິ່ງແກ່ຍາວມາໄດ້ຫລາຍປີແລ້ວ ແລະ ຂະແໜງການກ່ຽວຂ້ອງກໍມັກອ້າງວ່າເສັ້ນທາງດັ່ງກ່າວຈະມີການກໍ່ສ້າງຄືນໃໝ່ດ້ວຍທຶນຊ່ວຍເຫລືອຂອງຕ່າງປະເທດ, ຟັງແລ້ວຄືວ່າຕົວະກັນ. ແຕ່ເຖິງຢ່າງໃດກໍຕ້ອງໄດ້ອົດທົນເພື່ອຫວັງກິນປາວັງໜ້າ, ສ່ວນເສັ້ນທາງເຂດຊານເມືອງ, ບ່ອນຫ່າງໄກສອກຫລີກກໍຍິ່ງຮ້າຍແຮງ ເຊິ່ງມັກຈະມີສະພາບດິນເຈື່ອຖົມ, ທາງຂາດ, ເປັນບວກເປັນຂຸມ ເຮັດໃຫ້ກາສັນຈອນໄປມາພົບຄວາມຫຍຸ້ງຍາກເປັນທີ່ສຸດ.
ມີຫລາຍຄົນຜູ້ມີປະສົບການໃນດ້ານຂົວທາງໃຫ້ທັດສະະວ່າ: ສິ່ງດັ່ງກ່າວກໍມີສອງສາມເຫດຄື:ໜຶ່ງ ເປັນເສັ້ນທາງເກົ່າແກ່ຊຸດໂຊມ ແລະ ສອງແມ່ນຍ້ອນການກໍ່ສ້າງບໍ່ໄດ້ມາດຕະຖານ,ເຊິ່ງເກີດຈາກຂອດການກວດກາຂອງວິຊາການດ້ານນີ້ຍັງຖືເບົາ, ບໍ່ເອົາໃຈໃສ່ກວດກາລະອຽດແຕ່ລະຂັ້ນຕອນການກໍ່ສ້າງນັບແຕ່ຂອດຢຽບດິນມາຈົນຮອດປູຢາງມີມາດຕະຖານແລ້ວບໍ່ ?, ຮ່ອງລະບາຍນ້ຳເດເປັນແນວໃດ ? ແລະ ຫລາຍໆຂອດອື່ນໆອີກ. ດັ່ງນັ້ນ ອາດເປັນບົດຮຽນໃຫ້ຂະແໜງການຂົວທາງພວກເຮົາເພີ່ມທະວີວຽກງານກວດກາໂຄງການກໍ່ສ້າງເສັ້ນທາງ ຫລື ອາຄານບ້ານເຮືອນຕ່າງໆກໍຍິ່ງມີຄວາມຈຳເປັນ ເພື່ອຮັບປະກັນຄຸນນະພາບ ແລະ ມາດຕະຖານຂອງມັນ.
ຂອບໃຈຂ່າວຈາກ:
