ຍິງບຮາຊິນມີພາວະປະຫລາດຮ້ອງໄຫ້ແຕ່ນ້ຳຕາກາຍເປັນຄິດຕັນ ເກີດເຍື່ອສີຂາວແຂງຕົວຈົນເຈັບຕາໄປໝໍຫລາຍຄົນແລ້ວຈົນໃນທີ່ສຸດຈຶ່ງຮູ້ວ່າເຫດເພາະດວງຕາຜະລິດເຄົາຕິນຫລາຍຜິດປົກກະຕິ
ເວັບໄຊເດລີ່ເມວເຜີຍກໍລະນີຍິງຮ້ອງໄຫ້ເປັນນ້ຳຕາຄິດຕັນ ໃນລາຍງານເມື່ອວັນທີ່ 5 ສິງຫາ2015 ໂດຍນາງຄົນນີ້ຄື ນາງລໍລ່າ ພອນ ອາຍຸ 35 ປີ ຈາກເມືອງລິນປະເທດບຣາຊິນ ມີຄວາມຜິດປົກກະຕິທີ່ຍາມມີນ້ຳຕາຈະເກີດເຍື່ອຂາວໆຂຶ້ນທີ່ດວງຕາແລະຈັບຕົວກັນເປັນກ້ອນຕອນທຳອິດທີ່ກໍ່ຕົວຍັງນຸ່ມແຕ່ເມື່ອຖືກອາກາດກໍແຂງຕົວຂຶ້ນຈົນມີລັກສະນະຄ້າຍຄິດຕັນ ສ້າງຄວາມລະຄາຍເຄືອງແກ່ດວງຕາຢ່າງຫລາຍຈົນນາງລໍລ່າຕ້ອງຄອຍຖ້າຈັບອອກເລື່ອຍໆ ມີໄລຍະໜຶ່ງເມື່ອ 2 ປີທີ່ຜ່ານມາ ອາການດັ່ງກ່າວເປັນໜັກຫລາຍ ນາງຕ້ອງຄອຍຖ້າຄີບເອົານ້ຳຕາຄິດຕັນອອກກວ່າມື້ລະ 30 ເທື່ອ ນອກຈາກເຈັບຕາແລ້ວຍັງເປັນອຸປະສັກຕໍ່ການເຮັດວຽກງານບາງມື້ນາງຕ້ອງຢຸດວຽກໄປເພາະອາການນີ້ເກີດຂຶ້ນເລື້ອຍໆຈົນໜ້າລຳຄານ ລໍລ່າຜະເຊີນອາການນ້ຳຕາກາຍເປັນຄິດຕັນເທື່ອທຳອິດຕອນອາຍຸ 15 ປີແມ່ຮີບພານາງໄປພົບໝໍແຕ່ໝໍກໍບໍ່ສາມາດຕອບໄດ້ວ່າເກີດຈາກຫຍັງນາງຍັງໄປຫາໝໍອີກຫລາຍໆຄົນ ທັງໝົດກໍລ້ວນບໍ່ສາມາດພິຈາລະນາສາເຫດອາການດັ່ງກ່າວຂອງນາງໄດ້ ຈົນກະທັ່ງໄດ້ພົບກັບດອກເຕີລາອູນ ກອນຄານເວດ ທີ່ກວດອາການຂອງນາງແລ້ວນຳໄປຄົ້ນຄວ້າປຽບທຽບກັບບັນທຶກທາງການແພດທີ່ເຄີຍມີມາຈົນໄດ້ພົບວ່າອາການຂອງນາງເກີດຈາກການເຮັດວຽກງານທີ່ຜິດປົກກະຕິຂອງດວງຕາທີ່ຜະລິດເຄົາຕິນຫລາຍເກີນໄປເມື່ອປະກອບກັບສານອື່ນໆຈາກດວງຕາ ຮັດໃຫ້ເກີດນ້ຳຕາລັກສະນະຄ້າຍຄິດຕັນ ດອກເຕີ້ ລາອູນ ອະທິບາຍວ່າທຸກເທື່ອທີ່ຄົນເຮົາກະພິບຕາ ນັ້ນຄືກະບວນການຫລໍ່ລື່ນດວງຕາຕາມທຳມະຊາດ ແລະເມື່ອມີສິ່ງແປກປອມຫລືເຊື້ອພະຍາດສຳຜັດຜິວດວງຕາສ່ວນທີ່ເປັນໂປຕີນໃນນ້ຳຕາກໍຈະເຂົ້າມາຈັດການແຕ່ໃນກໍລະນີຂອງນາງລໍລ່າ ກະບວນການປ້ອງກັນຊັ້ນທຳອິດເຮັດວຽກບົກຜ່ອງກະບວນການປ້ອງກັນຊັ້ນທີ່ສອງຈຶ່ງເຮັດວຽກແທນນັ້ນຄືຊັ້ນເຄົາຕິນທີ່ເຄືອບຜິວດວງຕາຖືກຜະລິດອອກມາຫລາຍເກີນປົກກະຕິຈົນເກີດພາວະເປັນເຍື່ອຂາວໆທີ່ກາຍເປັນຄິດຕັນນ້ຳຕາໄປນັ້ນເອງ
