ຂປລ. ທ່ານ ດຣ ສົມສຸກ ສົມສະຫວັດ ຫົວໜ້າຫ້ອງການກາແດງ ແຂວງຫລວງນ້ຳທາໃຫ້ຮູ້ວ່າ: ໃນ 7 ເດືອນຂອງປີນີ້ ຫ້ອງການກາແດງ ແຂວງ ຫລວງນ້ຳທາໄດ້ເອົາໃຈໃສ່ຈັດຕັ້ງການເຄື່ອນໄຫວ ປະຕິບັດໜ້າທີ່ວິຊາສະເພາະຂອງສູນບໍລິຈາກເລືອດ ໂດຍໄດ້ປຸກລະດົມສັງຄົມ ໃຫ້ເຫັນໄດ້ຄວາມສຳຄັນ ໃນການບໍລິຈາກເລືອດ ດ້ວຍຄວາມສະໝັກໃຈ, ສາມາດປຸກລະດົມການບໍລິຈາກເລືອດໄດ້ 326 ຖົງ ຕາມແຜນການແມ່ນ 660 ຖົງ ເທົ່າກັບ 50% ຂອງແຜນການ, ທຽບກັບສົກປີຜ່ານມາແມ່ນຫລຸດລົງ ຈາກການບໍລິຈາກເລືອດໄດ້ 500 ກວ່າຖົງ (ຄາດໝາຍ 600 ຖົງ) ທຽບໃສ່ແຜນປະຕິບັດໄດ້ 88%.
ທ່ານຫົວໜ້າ ຫ້ອງການກາແດງແຂວງ ຍັງໃຫ້ຮູ້ຕື່ມວ່າ: ຫ້ອງການກາແດງ ສາມາດສະໜອງເລືອດໃຫ້ແກ່ໂຮງໜໍແຂວງ ແລະ ໂຮງໜໍທະຫານແຂວງໄດ້ກວ່າ 400 ຖົງ ເທົ່າກັບ 94,10%. ແນວໃດກໍດີຖ້າທຽບໃສ່ຄວາມຮຽກຮ້ອງຕ້ອງການ ຂອງຄົນເຈັບທີ່ນອນປິ່ນປົວຢູ່ໂຮງໝໍ, ການຕອບສະໜອງເລືອດຍັງບໍ່ພຽງພໍ ເຊິ່ງຍັງຈະໄດ້ສືບຕໍ່ເຄື່ອນໄຫວ ປຸກລະດົມສັງຄົມໃຫ້ເຫັນໄດ້ຄວາມສຳຄັນ ຂອງການບໍລິຈາກເລືອດ ດ້ວຍຄວາມສະໝັກໃຈ ໂດຍບໍ່ຮຽກຮ້ອງສິ່ງ ຕອບແທນ ເພາະຈະໄດ້ເລືອດທີ່ປອດໄພກວ່າ ເພື່ອຊ່ວຍເຫລືອ ແລະ ກອບກູ້ຊີວິດຄົນເຈັບ ທີ່ຕ້ອງການເລືອດຕື່ມອີກ.
ຂອບໃຈຂ່າວຈາກ:
