ນັກດື່ມ“ສາຍອາຊີບ”ທີ່ຕິດແອວກໍຮໍໜັກແອວກໍຮໍຈະມີຜົນຕໍ່ທຸກຈຸລັງຂອງຮ່າງກາຍໂດຍສະເພາະລະບົບປະສາດເມື່ອໄດ້ຮັບແອວກໍຮໍເປັນປະຈຳ
ສະຫມອງຈະປັບໂຕຕ້ອງການແອວກໍຮໍເພື່ອການດຳເນີນຊີວິດປະຈຳວັນການເຮັດວຽກງານຄວາມຄິດອາລົມແລະການກະທຳທັງໝົດຂຶ້ນກັບແອວກໍຮໍ
ເມື່ອຢຸດດື່ມກະທັນຫັນບໍ່ທັນຂ້າມມື້ຮັບຮອງວ່າມີອາການລົງແດງທຸກຄົນສະນັ້ນຖ້າຕັ້ງໃຈຈະງົດແອວກໍຮໍເຂົ້າພັນສານັກດື່ມແລະຍາດໃກ້ຊິດຕ້ອງກຽມແຜນການຮັບມືອາການໜັກໜ່ວງທີ່ຈະເກີດຂຶ້ນໃນໄລຍະ1 - 7ມື້ໄວ້ບາງຄົນອາດມີອາການຫນ້ອຍພຽງແຕ່ໂຕສັ່ນ ແຕ່ສຳລັບຜູ້ຕິດແອວກໍຮໍອາການຈະຮຸນແຮງເຖິງຂັ້ນປະສາດຫລອນ
ລະດັບຂັ້ນຂອງການລົງແດງ
1.ລົງແດງທຳມະດາ6 – 8 ຊົ່ວໂມງຫລັງຈາກຢຸດດື່ມຈະມີອາການຄື ມືສັ່ນ,ໃຈສັ່ນ,ປຸ້ນທ້ອງ,ຮາກ,ເຫື່ອແຕກຫົວໃຈເຕັ້ນໄວນອນບໍ່ຫລັບຄວາມດັນສູງວິຕົກກັງວົນຫງຸດຫງິດ ຮ້ອນຮົນເປັນຕົ້ນໂດຍຈະມີອາການຮຸນແຮງທີ່ສຸດໃນໄລຍະ 24 – 36 ຊົ່ວໂມງຫລັງຈາກຢຸດດື່ມແລະຈະຄ່ອຍໆບັນເທົາແລະເຊົາເອງໄດ້ພາຍໃນ 3 - 4 ມື້
2.ລົງແດງຊັບຊ້ອນເມື່ອຢຸດດື່ມຫລືຫລຸດປະລິມານການດື່ມພາຍໃນ1ມື້ຈະເລີ່ມຈາກອາການລົງແດງແບບປົກກະຕິກ່ອນແຕ່ຮຸນແຮງກວ່າແລະມີອາການແຊກຊ້ອນທາງຈິດເກີດຂຶ້ນຮ່ວມດ້ວຍພາຍໃນ8 - 12 ຊົ່ວໂມງເຊັ່ນຫູໄດ້ຍິນສຽງຄົນຮ້ອງຕະຫລອດ,ຫລົງຜິດ,ເຫັນພາບຫລອນແລະມັກເກີດອາການເກືອບພາຍໃນ12 - 48 ຊົ່ວໂມງຄວນພົບແພດເພື່ອຮັບຢາຄາຍຄຽດແລະວິຕາມິນບີແລະຄວນກວດຫາພະຍາດທີ່ເກີດຈາກແອວກໍຮໍ ເຊັ່ນ:ພະຍາດຕັບແລະພະຍາດຫົວໃຈ
3.ລົງແດງລະເມີອາການລົງແດງທີ່ຮຸນແຮງທີ່ສຸດ ຈະເກີດຂຶ້ນພາຍໃນ 72 ຊົ່ວໂມງຫລັງຈາກຢຸດຫລືຫລຸດປະລິມານການດື່ມຖືເປັນອາການສຸກເສີນທີ່ຕ້ອງໄປຫາໝໍທັນທີ ເພາະມີຄວາມສ່ຽງເຖິງຂັ້ນຕາຍອາການເດັ່ນໆຄື:ສັບສົນເວົ້າຄົນດຽວ,ຫງຸດຫງິດຢ່າງຮຸນແຮງ ສູນເສຍຄວາມຊົງຈຳໄລຍະສັ້ນບໍ່ຮູ້ເວລາ,ສະຖານທີ່ແລະບຸກຄົນປະສາດຫລອນຄິດວ່າຈະມີໃຜມາເຮັດຮ້າຍອາດຮຸນແຮງເຖິງຂັ້ນເຮັດຮ້າຍຕົນເອງແລະຄົນອື່ນໄດ້
ທາງແກ້ອາການນອນບໍ່ຫລັບເພາະຂາດແອວກໍຮໍ
1.ອອກກຳລັງກາຍເຊົ້າແລງແຕ່ບໍ່ຄວນກາຍ 8 ໂມງແລງ
2.ງົດດື່ມກາເຟ,ຊາແລະເຄື່ອງດື່ມບຳລຸງກຳລັງຫລັງຕອນ2ໂມງສວາຍ
3.ບໍ່ດື່ມນ້ຳຫລືກິນເຂົ້າແລງຫລາຍເກີນໄປແລະຫລີກລ້ຽງອາຫານລົດເຜັດ
4.ຢ່ານອນຕອນສວາຍເພາະຕົກກາງຄືນຈະບໍ່ຢາກນອນ
5.ບໍ່ນັ່ງເຮັດວຽກຫລືເປີດໂທລະພາບໃນຫ້ອງນອນ
6.ຖ້າຜ່ານໄປ30ນາທີຍັງນອນບໍ່ຫລັບໃຫ້ລຸກຈາກຕຽງໄປສວດມົນ,ອາບນ້ຳອຸ່ນຫລືເປີດເພງຄ່ອຍໆແລ້ວຄ່ອຍມາລອງນອນໃໝ່
7.ຝຶກນັ່ງສະມາທິແລະເຂົ້ານອນໃຫ້ເປັນເວລາ
8.ປ່ຽນຜ້າປູບ່ອນນອນຫລືຈັດຫ້ອງນອນໃໝ່ໃຫ້ຮູ້ສຶກໂລ່ງແລະນອນສະບາຍທີ່ສຸດ