ອົງການແດນໃໝ່ເພື່ອສຸຂະພາບ (Health Frontiers) ໄດ້ຕົກລົງໃຫ້ທຶນຊ່ວຍເຫຼືອແກ່ ສປປ ລາວ ເພື່ອສືບຕໍ່ປະຕິບັດໂຄງການສຶກສາການແພດຫຼັງປະລິນຍາຕີ ພາກອາຍຸລະສາດ ກຸມມານເວດສາດ ແລະ ການກໍ່ສ້າງແພດຊ່ຽວຊານສະເພາະທາງໃນ ສປປ ລາວ ໄລຍະ 5 ປີ (1/7/2013-30/6/2018) ລວມມູນຄ່າ 544.945 ໂດລາສະຫະລັດ ຫຼື ປະມານ 4,359 ຕື້ກີບ ໂດຍພິທີລົງນາມບົດບັນທຶກຄວາມເຂົ້າໃຈການຊ່ວຍເຫຼືອດັ່ງກ່າວ ໄດ້ມີຂຶ້ນວັນທີ 27 ສິງຫາ 2013 ຢູ່ມະຫາວິທະຍາໄລວິທະຍາສາດສຸຂະພາບ (ມວສ) ລະຫວ່າງທ່ານ ຮຈ.ດຣ. ສົມຈິດ ບຸບຜາ ອະທິການບໍດີ ມວສ ແລະ ທ່ານ Hakon Torjesen ປະທານອົງການ Health Frontiers ໂດຍຊ້ອງໜ້າພະນັກງານກ່ຽວຂ້ອງ.
ອົງການ Health Frontiers ໄດ້ເລີ່ມໃຫ້ທຶນຊ່ວຍເຫຼືອໃນການກໍ່ສ້າງແພດຊ່ຽວຊານແກ່ ສປປ ລາວ ແຕ່ປີ 1990 ເປັນຕົ້ນມາ ໂດຍແມ່ນການຮ່ວມມືລະຫວ່າງຄະນະວິທະຍາສາດການແພດ ແລະ ອົງການດັ່ງກ່າວ ເພື່ອຊ່ວຍພັດທະນາດ້ານການແພດໃຫ້ແກ່ບັນດາທ່ານໝໍ ແລະ ຊ່ຽວຊານເດັກ (ກຸມມານເວດສາດ) ແລະ ພາຍໃນ (ອາຍຸລະສາດ) ໃຫ້ມີຄວາມຊຳນິຊຳນານດ້ານຮັກສາສຸຂະພາບ ແລະ ປິ່ນປົວປະຊາຊົນ ມາຮອດປັດຈຸບັນໃນທົ່ວປະເທດມີແພດຊ່ຽວຊານເດັກ 66 ທ່ານ ແລະ ແພດພາຍໃນ 50 ທ່ານ ໄດ້ຮັບການຍົກລະດັບ ແລະ ກຳລັງປະຕິບັດໜ້າທີ່ຢູ່ບັນດາໂຮງໝໍຂັ້ນສູນກາງ ແຂວງ ແລະ ເມືອງ ແຕ່ຈຳນວນຕົວເລກດັ່ງກ່າວ ກໍຍັງບໍ່ພຽງພໍກັບຄວາມຮຽກຮ້ອງຕ້ອງການຂອງກະຊວງສາທາລະນະສຸກ ດັ່ງນັ້ນ ຈຶ່ງເຫັນວ່າຄວນມີການສືບຕໍ່ໂຄງການອີກ ເພື່ອບັນລຸຕາມແຜນຍຸດທະສາດ ພັດທະນາພະນັກງານສາທາລະນະສຸກ ແຕ່ນີ້ຫາປີ 2020.
ສຳລັບເງິນຊ່ວຍເຫຼືອທີ່ໄດ້ລົງນາມກັນ ຈະນຳໃຊ້ເຂົ້າໃນກິດຈະການຕົ້ນຕໍຂອງໂຄງການເຊັ່ນ: ກໍ່ສ້າງຊ່ຽວຊານເດັກ (ກຸມມານເວດສາດ) ແລະ ພາຍໃນ (ອາຍຸລະສາດ) ຈັດຫາແພດຊ່ຽວຊານຕ່າງປະເທດມາອົບຮົມດ້ານວິຊາການ ແລະ ພາກປະຕິບັດຕົວຈິງ ໃຫ້ການຊ່ວຍເຫຼືອດ້ານການຮຽນ-ການສອນພາສາຕ່າງປະເທດ ແກ່ແພດຊ່ຽວຊານດັ່ງກ່າວ ນອກນີ້ຍັງຈະນຳໃຊ້ເຂົ້າໃນການຈັດຊື້ອຸປະກອນການແພດຄອມພິວເຕີ ແລະ ເຄື່ອງໃຊ້ທີ່ຈຳເປັນຈຳນວນໜຶ່ງ.