ຫລັງຈາກຫລາຍໆຄົນຮູ້ຈັກແມວກຣາມປີ້ ແຄດ (Grumpy Cat) ຫລື ເຈົ້າແມວໜ້າບູດທີ່ໂດ່ງດັ່ງຂຶ້ນແທ່ນເປັນແມວໄຮໂຊຈົນສາມາດເຮັດເງິນໃຫ້ເຈົ້າຂອງໄດ້ເຖິງຫລັກພັນລ້ານລ່າສຸດແມວກຣາມປີ້ ແຄດ ຈະມີຄູ່ແຂ່ງແລ້ວຫລືວ່າຈະເປັນເນື້ອຄູ່ດີ
ເວັບໄຊເດລີເມລ 28 ກໍລະກົດ2015ທີ່ຜ່ານມາເຜີຍແຜ່ຮູບໝາສາຍພັນປັກເກີ້ນ(ປັກ ປະສົມກັບ ບີເກີ້ນ)ຈາກລັດໄອໂອວາ ສະຫະລັດອາເມລິກາມີຊື່ວ່າ:ເອິລ ອາຍຸ 5 ເດືອນ ມັນມີໜ້າບູດແບບໃຈຮ້າຍທຸກຢ່າງເທິງໂລກຊຶ່ງຄາດວ່າມັນອາດຈະເປັນໝາທີ່ໜ້າບູດທີ່ສຸດໃນໂລກກໍວ່າໄດ້ແລະດ້ວຍເຫດນີ້ມັນຈຶ່ງຖືກເອີ້ນວ່າ ກຣາມປີ້ ດັອກ ແລະ ໄດ້ຮັບຄວາມສົນໃຈຢ່າງຫລາຍໃນໂລກອອນລາຍສາມາດດຶງດູດໃຫ້ມີຜູ້ເຂົ້າມາເບິ່ງຂະນະນີ້ກວ່າ 2 ລ້ານຄົນແລ້ວ
ເດເລັກ ບລູມຟິນ ອາຍຸ 25 ປີ ເຈົ້າຂອງໝາ ເອິລ ເປີດເຜີຍວ່າທີ່ໜ້າຕາມັນເປັນລັກສະນະນີ້ບໍ່ແມ່ນວ່າປ່ວຍແຕ່ຢ່າງໃດມັນມີສຸຂະພາບດີຄືກັບໝາທົ່ວໆໄປທີ່ມັນເປັນເຊັ່ນນີ້ກໍເພາະວ່າແຂ້ວລຸ່ມຂອງມັນຍື່ນອອກມາຄອບແຂ້ວເທິງຊຶ່ງເມື່ອລວມກັບຮ່ອງຮອຍແລະສີຜິວເທິງໜ້າຂອງມັນຈຶ່ງເຮັດໃຫ້ໜ້າຂອງມັນເບິ່ງເຄັ່ງຕຶງແບບທີ່ເຫັນນອກຈາກນີ້ມັນຍັງມີພຶດຕິກຳທີ່ແປກຈາກໝາທຳມະດານໍາອີກຄື:ມັນຈະມັກກິນຂະໜົມກອບໆໄປນອນອາບແດດຫລືແລ່ນໄລ່ລູກບານອ້ອມຮອບສວນ
ເດເລັກ ບລູມຟິນແລະແຟນສາວມັກຈະຮູ້ສຶກຜ່ອນຄາຍທຸກເທື່ອທີ່ມີໝາເອິລຢູ່ນໍາມັນຈະມັກເຂົ້າໄປອອດອ້ອນແລະເພາະສີໜ້າທ່າທາງຂອງມັນຈຶ່ງເຮັດໃຫ້ພວກເຂົາຕ້ອງຫົວຂວັນອອກມາທຸກເທື່ອດ້ວຍຄວາມເອັນດູ
