ໃນລະດູຝົນ ເປັນລະດູການ ຜະລິດກະສິກຳ ໂດຍສະເພາະເພາະແມ່ນການປູກພືດຕ່າງໆ ດັ່ງນັ້ນ, ການທ່ອງທ່ຽວໄປ-ມາຂອງພະສົງ ບໍ່ວ່າຈະເປັນການໄປເທດສະໜາ ສັ່ງສອນປະຊາຊົນ ຫຼືໄປທຳກິດຂອງສົງ ກໍໄດ້ຢຽບຍ່ຳຖືກເຄື່ອງປູກຂອງຝັງຂອງປະຊາຊົນ ຈົນຖືກຕຳໜິສົ່ງຂ່າວຈາກປະຊາຊົນ ແລະເລື່ອງດັ່ງກ່າວກໍຖືກໄປຂາບທູນພະພຸດທະເຈົ້າ (ພຸດທະການຕອນຕົ້ນ ພະສົງຍັງບໍ່ໄດ້ເຂົ້າພັນສາ).
ເພື່ອຕັດບັນຫານີ້ ພະພຸດທະເຈົ້າ ກໍເລີຍຊົງກຳໜົດໃຫ້ພະພິກຂຸສົງ ເມື່ອເຂົ້າລະດູຝົນ ໃຫ້ພະສົງຢູ່ກັບທີ່ ຕັ້ງແຕ່ແຮມ 1 ຄ່ຳເດືອນ 8 ຈົນເຖິງຂຶ້ນ 15 ຄ່ຳເດືອນ 11 ໃຫ້ຢູ່ເປັນທີ່ເປັນບ່ອນ ບໍ່ໃຫ້ທ່ອງທ່ຽວໄປມາ ໂດຍສະເພາະແມ່ນຫ້າມໄປນອນແຮມຄືນທີ່ອື່ນ ຖ້າໃຜຕ້ອງການຢາກຟັງເທດກໍໃຫ້ ມາຫາພະສົງຢູ່ວັດ ມາເຮັດບຸນຢູ່ວັດ ນັ້ນເອີ້ນກວ່າ ການເຂົ້າພັນສາ.
ແຕ່ອີກມຸມໜຶ່ງ ພະອົງຊົງຖືໂອກາດ ທີ່ເກີດເປັນບັນຫານີ້ ໄດ້ຊົງປ່ຽນຄຳກ່າວຫາໃຫ້ກາຍເປັນ ໂອກາດອັນດີຂອງພະພິກຂຸສົງ ເມື່ອພະພິກຂຸສົງຢູ່ປະຈຳວັດກໍຈະໄດ້ ອົບຮົມສັ່ງສອນພະສົງທີ່ບວດໃໝ່ແດ່ ແລະພະສົງອົງບວດໃໝ່ກໍຈະໄດ້ຕັ້ງໜ້າ ສຶກສາຮ່ຳຮຽນຫຼັກທຳ ຄຳສອນ ທຸກມື້ຢ່າງຕໍ່ເນື່ອງແລະໄດ້ຮັບຜົນດີ.
