ໂຄງການກໍ່ສ້າງຫໍພັກນັກຮຽນ ແລະ ຫ້ອງນໍ້າໂຮງຮຽນມັດທະຍົມສົມບູນນໍ້າແຫງ ເມືອງໄຊ ແຂວງອຸດົມໄຊ ໄດ້ເລີ່ມດໍາເນີນການກໍ່ສ້າງມາແຕ່ກາງເດືອນ ມີນາ ຜ່ານມານີ້ ມາຮອດປັດຈຸບັນໄດ້ສໍາເລັດແລ້ວ 100% ເຊິ່ງເປັນທຶນຂອງລັດຖະບານຮວງນໍ້າເທີນ 2 ໃນມູນຄາການກໍ່ສ້າງ 750 ລ້ານກີບ, ເປັນອາຄານຊັ້ນດຽວແບບຖາວອນ 1 ຫຼັງ ມີ 2 ຫ້ອງ ຂະໜາດ 9.5 x 30 ແມັດ ປະກອບດ້ວຍເຝີນິເຈີ ຕຽງເລັກ 2 ຊັ້ນ, ມີລະບົບໄຟຟ້າ, ພັດລົມ, ແລະ ຫ້ອງນໍ້າ 2 ຊຸດ, ໂດຍແມ່ນບໍລິສັດ ມິດມີໄຊ ກໍ່ສ້າງເປັນຜູ່ຮັບເໝົາ, ການສ້າງຫໍພັກໃຫ້ໂຮງຮຽນກໍເພື່ອແນ່ໃສ່ສ້າງສະພາບແວດລ້ອມທີ່ດີໃຫ້ນັກຮຽນໄດ້ຢູ່ບ່ອນປອດໄພ, ສົ່ງເສີມໃຫ້ເດັກທີ່ຢູ່ບ້ານໄກໄດ້ມີບ່ອນພັກພາອາໄສ, ທັງເປັນການຫຼຸດຜ່ອນຄ່າໃຊ້ຈ່າຍໃນການເດີນທາງເຮັດໃຫ້ນັກຮຽນທີ່ປະສົບບັນຫາຂາດທີ່ພັກອາໄສ ຍາກມາເຂົ້າຮຽນຕໍ່ ຫຼາຍຂື້ນ, ຫຼຸດຜ່ອນອັດຕາປະລະການຮຽນ ແລະ ເປັນການສົ່ງເສີມໃຫ້ນັກຮຽນທຸກຄົນໄດ້ຮັບການສຶກສາຢ່າງທົ່ວເຖິງ.
ພິທີ ມອບ-ຮັບ ໄດ້ຈັດຂື້ນໃນວັນທີ 28 ກໍລະກົດ 2015 , ຢູ່ທີ່ໂຮງຮຽນມັດທະຍົມສົມບູນນໍ້າແຫງ, ພາຍຫຼັງຄະນະກໍາມະການກວດກາການກໍ່ສ້າງພາບອາຄານເຫັນວ່າຖືກຕ້ອງຕາມຫຼັກເຕັກນິກວິຊາການແລ້ວ ກໍໄດ້ລົງນາມເຊັນສັນຍາມອບ-ຮັບຂື້ນ, ຕາງໜ້າຝ່າຍ ເຈົ້າຂອງໂຄງການຮັບໂດຍແມ່ນທ່ານ ພວງວິໄລ ອິນທະວົງ ຮອງຫົວໜ້າພະແນກສຶກສາທິການ ແລະ ກິລາແຂວງອຸດົມໄຊ , ມອບໂດຍແມ່ນ ທ່ານ ນ້ອຍ ຜູ່ອໍານວຍການບໍລິສັດ ມິດມີໄຊ ກໍ່ສ້າງ, ໂດຍມີເລຂາພັກບ້ານ ນາຍບ້ານນໍ້າແຫງ, ຄະນະກໍາມະການກວດກາການກໍ່ສ້າງຂັ້ນແຂວງ, ຂັ້ນເມືອງ ຜູ້ອໍານວຍການໂຮງຮຽນ ແລະ ຄູອາຈານ ເຂົ້າຮ່ວມ.
ຈາກນັ້ນ ທາງ ພະແນກສຶກສາທິການ ແລະ ກິລາແຂວງອຸດົມໄຊ ກໍໄດ້ມອບຕໍ່ໃຫ້ອໍານາດການປົກຄອງບ້ານ ກໍຄືໂຮງຮຽນເປັນຜູ້ຄຸ້ມຄອງ ປົກປັກຮັກສາ ແລະ ນໍາໃຊ້ໃນຂັ້ນຕໍ່ໄປ.
ໂຮງຮຽນ ມສ ນ້ຳແຫງເປັນໂຮງຮຽນທີ່ຕັ້ງຢູ່ ບ້ານ 3 ສ້າງ ເປັນຈຸດສຸມໜຶ່ງທີ່ຮອງຮັບເອົາລູກຫຼານນັກຮຽນທີ່ຮຽນຈົບຂັ້ນປະຖົມຂື້ນຮຽນຕໍ່ຂັ້ນມັດທະຍົມ ທີ່ມາຈາກ 22 ບ້ານອ້ອມຂ້າງ ການໄປມາມີຄວາມຫຍຸ້ງຍາກເພາະເປັນເຂດຫ່າງໄກສອກຫຼີກເສັ້ນທາງທຸລະກັນດານ ມີນັກຮຽນຈໍານວນຫຼວງຫຼາຍຕ້ອງໄດ້ໄກພໍ່ແມ່ແຕ່ນ້ອຍ ມາຕັ້ງຫໍພັກແບບປະຖົມປະຖານເປັນບ່ອນອາໄສ ເພື່ອໃຫ້ຕົນເອງໄດ້ມີໂອກາດເຂົ້າເຖິງການສຶກສາ, ການຕັ້ງຫໍພັກນັກຮຽນຈຶ່ງເປັນນະໂຍບາຍໜຶ່ງຂອງພັກ ແລະ ລັດຖະບານເພື່ອສ້າງໃຫ້ເດັກນັກຮຽນຄົນໄກບ້ານໄດ້ມີບ່ອນອາໄສໃນສະພາບແວດລ້ອມທີ່ດີ ແລະ ປອດໄພ
