Lauren Wasser ນາງ​ແບບ​ສາວ​ ຕາ​ສີ​ຟ້າ ຊີວິດ​ຂອງ​ນາງ​ກຳ​ລັງ​ໄປ​ໄດ້​ດີ​ໃນ​ອາ​ຊີບ​ນາງ​ແບບ ຈົນ​ມາ​ຊື້​ອະ​ພາລ໌​ທະ​ເມັນ​ຫລູ​ຢູ່​ທີ່ ຊານ​ຕາ ໂມ​ນິ​ກາ ຊີວິດ​ກ່ອນ​ໜ້າ​ນີ້​ນາງ​ຮັກ​ກີລາ​ຈົນ​ໄດ້​ທຶນ​ນັກ​ກີລາ​ຕີບານ ແຕ່​ສຸດ​ທ້າຍ​ກໍ​ເລືອກ​ທີ່​ຈະ​ເປັນ​ນາງ​ແບບ

ແລ້ວ​ເຫດການ​ທີ່​ບໍ່​ຄາດ​ຄິດ​ກໍເກິດ​ຂຶ້ນ​ໃນ​ປີ 2012 ມື້​ນັ້ນ​ນາງ​ເປັນ​ປະຈຳ​ເດືອນຈຶ່ງ​ໄປ​ຊື້ຜ້າ​ອະ​ນາ​ໄມ​ແບບ​ສອດ ຍີ່​ຫໍ້​ໜຶ່ງ​ຈາກ​ຊູ​ເປີມາເກັດ ຫລັງ​ຈາກ​ນັ້ນ​ນາງ​ກໍ​ໄປ​ງານ​ປາລ໌​ຕີ້​ກັບ​ເພື່ອນ​ໆແຕ່​ນາງ​ເລີ່ມ​ຮູ້ສຶກ​ຕົວ​ວ່າ​ບໍ່​ຄ່ອຍ​ສະບາຍ​ຈຶ່ງ​ຂໍ​ກັບ​ເຮືອນ​ກ່ອນ
ເຊົ້າ​ມື້​ຕໍ່​ມາ​ ບ້ານຂອງນາງ​ຖືກບຸກ​ປຸກ​ໂດຍ​ຕຳ​ລວດ ແມ່​ຂອງ​ນາງ​ໄດ້​ໂທ​ແຈ້ງ​ໃຫ້​ຕຳ​ລວດ​ມາ​ກວດ​ຄວາມ​ຮຽບຮ້ອຍ ເພາະ​ຕິດ​ຕໍ່​ລູກ​ສາວ​ບໍ່ໄດ້​ເລີຍ ຢ້ານວ່າ​ຈະ​ເກີດ​ເຫດ​ຮ້າຍ​ຂຶ້ນ ຊຶ່ງ​ກໍ​ເປັນ​ແບບ​ນັ້ນ​ແທ້ໆ ຕຳ​ລວດ​ພົບ​ນາງ​ນອນ​ຄວ່ຳ​ໜ້າ​ຢູ່​ເທິງ​ພື້ນ​ຫ້ອງ ຖ້າ​ຕຳ​ລວດ​ຫລາຍ​ຊ້າ​ກວ່າ​ນີ້​ອີກ​ພຽງ​ບໍ່​ຈັກ​ນາ​ທີ ນາງ​ຄົງ​ຕ້ອງ​ຈາກ​ໂລກ​ນີ້​ໄປ​ຢ່າງ​ແນ່ນ​ອນ

ໝໍ​ບອກວ່າ​ໄຂ້​ຂອງ​ນາງ​ສູງ​ຫລາຍ​ເຖິງ 42 ອົງ​ສາ ແລະ​ຕອນ​ນີ້​ນາງ​ຢູ່ໃນ​ພາ​ວະ Toxic Shock Syndrome ຫລື TSS ເປັນ​ພາ​ວະ​ການ​ຕິດ​ເຊື້ອ​ແບກ​ທີ​ເລຍ​ຈາກ​ການ​ໃຊ້​ຜ້າ​ອະນາໄມ​ແບບ​ສອດ ຈົນ​ອາດ​ເຮັດໃຫ້​ອະໄວຍະວະ​ພາຍ​ໃນ​ແລະ​ຫົວ​ໃຈ​ລົ້ມເຫລວ​ໄດ້