ສະພາບພະຍາດໄຂ້ເລືອດອອກ ຍັງສືບຕໍ່ລະບາດເພີ່ມຂຶ້ນໃນອາທິດທີ 29 ຂອງປີ 2013 ເຖິງວັນທີ 25 ກໍລະກົດ 2013 ໄດ້ເພີ່ມເປັນ 604 ກໍລະນີ ລື່ນຈາກອາທິດທີ 28 ຈຳນວນ 77 ກໍລະນີ ລວມແລ້ວແຕ່ອາທິດທີ 1-29 ຂອງປີ 2013 ມີຈຳນວນ 4.631 ກໍລະນີ ເສຍຊີວິດ 17 ຄົນ ຕົວເລກດັ່ງກ່າວແມ່ນຕົວເລກທີ່ຄົນເຈັບໄດ້ເຂົ້າມານອນໂຮງໝໍ ແຕ່ຖ້າບວກໃສ່ກັບຄົນເຈັບມາກວດເຂດນອກສຸກເສີນຕ່າງໆແມ່ນມີຢູ່ 7 ພັນກວ່າເທື່ອຄົນ ຕໍ່ກັບສະພາບການດັ່ງກ່າວ ທ່ານ ດຣ. ພອນປະເສີດ ອຸນາພົມ ຮອງຫົວໜ້າພະແນກສາທາລະນະສຸກນະຄອນຫຼວງວຽງຈັນ ໄດ້ໃຫ້ຮູ້ຕື່ມກ່ຽວກັບການປ້ອງກັນ ແລະ ຕ້ານພະຍາດໄຂ້ເລືອດອອກໃນວັນທີ 26 ກໍລະກົດ 2013 ນີ້ວ່າ: ຕໍ່ກັບສະພາບການດັ່ງກ່າວ ທາງພະແນກສາທາລະນະສຸກ ກໍໄດ້ເຮັດທຸກວິທີໃນການປ້ອງກັນ ແລະ ຕ້ານພະຍາດໄຂ້ຍຸງລາຍ (ໄຂ້ເລືອດອອກ) ດ້ວຍການໂຄສະນາໃຫ້ຄວາມຮູ້ຕ່າງໆ ໃນການປ້ອງກັນ ແລະ ທຳລາຍແຫຼ່ງເພາະພັນຂອງຍຸງລາຍ ໃຫ້ກັບປະຊາຊົນທຸກຄົວເຮືອນ ດ້ວຍວິທີການ 5ປ ແລະ ໄດ້ສົ່ງນັກສຶກສາຮ່ວມກັບບ້ານ ລົງທຳລາຍພາສະນະຕ່າງໆທີ່ເປັນແຫຼ່ງເພາະພັນຂອງຍຸງ ແລະ ອະນາໄມຢູ່ບັນດາເມືອງຕ່າງໆໃນນະຄອນຫຼວງວຽງຈັນ.
ເພື່ອຮັບປະກັນໃຫ້ແກ່ການໂຄສະນາຕ້ານພະຍາດໄຂ້ເລືອດອອກ ໃຫ້ໄດ້ຮັບຜົນກວ່າເກົ່າ ທາງພະແນກສາທາລະນະສຸກນະຄອນຫຼວງວຽງຈັນ ໄດ້ຮ່ວມກັບສູນສຸຂະສຶກສາ ກະຊວງສາທາລະນະສຸກ ແລະ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໄດ້ຈັດກອງປະຊຸມເພື່ອປຶກສາຫາລືກັນ ໃນການພັດທະນາສື່ເພື່ອຈະສ້າງສື່ທາງວິທະຍຸ ໂທລະພາບ ໃຫ້ປະຊາຊົນຊຸມຊົນໃນແຕ່ລະຄອບຄົວໄດ້ຮັບຂໍ້ມູນຂ່າວສານ ເພື່ອໃຫ້ເຂົາເຈົ້າມີການປ່ຽນແປງພຶດຕິກຳໃນການທຳລາຍແຫຼ່ງເພາະພັນຍຸງລາຍນີ້ ເນື່ອງຈາກວ່າສະພາບໃນປັດຈຸບັນ ສະພາບກໍລະນີໄຂ້ເລືອດອອກຍັງຢູ່ໃນລັກສະນະຊົງຕົວຍັງບໍ່ທັນຫຼຸດລົງເທື່ອ ແຕ່ປະລິມານນ້ຳຝົນແມ່ນຍັງເພີ່ມຂຶ້ນ ເພາະສະນັ້ນການຜະລິດສື່ແມ່ນມີຄວາມຈຳເປັນ ທີ່ຕ້ອງໄດ້ອອກສື່ໂຄສະນາໃຫ້ປະຊາຊົນໄດ້ປະຕິບັດຕາມ ແລະ ມີການປ່ຽນແປງພຶດຕິກຳ ເພື່ອເຮັດໃຫ້ພະຍາດໄຂ້ເລືອດອອກຫຼຸດລົງ ແລະ ໝົດໄປຖ້າຫາກທຸກພາກສ່ວນ ແລະ ທຸກຄົວເຮືອນໄດ້ພ້ອມກັນເຮັດຢ່າງຈິງຈັງ.