ສຳນັກຂ່າວຕ່າງປະເທດ ລາຍງານໃນວັນທີ 23 ກໍລະກົດນີ້ວ່າ ມູນນິທິແອນນີ ອີ ເຄນີ ຟາວເດຊັນ ຂອງສະຫະລັດອາເມຣິກາ ໄດ້ເຜີຍແຜ່ບົດລາຍງານ “2015 Kids Count ” ຂອງຕົນວ່າ ນັບຕັ້ງແຕ່ປີ 2008 ເຊິ່ງເປັນປີທີ່ ບາຣັກ ໂອບາມາ ຊະນະການເລືອກຕັ້ງປະທານາທິບໍດີສະຫະລັດນັ້ນ ຈຳນວນເດັກນ້ອຍທີ່ທຸກຍາກທົ່ວປະເທດ ແມ່ນກວມອັດຕາສ່ວນປະມານ 18%, ຢ່າງໃດກໍຕາມມາເຖິງປີ 2013 ພົບວ່າ ຈຳນວນເດັກນ້ອຍທຸກຍາກໃນສະຫະລັດອາເມຣິກາ ໄດ້ເພີ່ມສູງຂຶ້ນເປັນ 22% ຫລື ຄິດເປັນປະຊາກອນຈຳນວນປະມານ 3 ລ້ານຄົນ.
ທັງນີ້ ລາຍງານດັ່ງກ່າວຍັງລະບຸອີກວ່າ ເດັກນ້ອຍຜິວດຳເຊື້ອສາຍອາຟຣິກາ – ອາເມຣິກາ ແມ່ນເປັນກຸ່ມທີ່ປະເຊ່ນກັບຄວາມທຸກຍາກຫລາຍທີ່ສຸດເຖິງ 39% ແລະ ສາເຫດຫລັກຂອງຄວາມທຸກຍາກໃນເດັກນ້ອຍຊາວອາເມຣິການີ້ ແມ່ນເກີດມາຈາກການທີ່ພໍ່ – ແມ່ຂອງເດັກເປັນຄົນວ່າງງານ ກວມເອົາອັດຕາສ່ວນເຖິງ 98% ອັນເນື່ອງມາຈາກສະພາວະເສດຖະກິດຂອງສະຫະລັດທີ່ຖົດຖອຍ.
