ຂປລ. ຊາວສວນມັນຕົ້ນແຂວງໄຊສົມບູນ ຮຽກຮ້ອງໃຫ້ພັກ-ລັດ ກໍຄືສະພາແຫ່ງຊາດຊ່ວຍພິຈາລະນາ ແລະ ແກ້ໄຂບັນຫາໜີ້ສິນທີ່ບໍລິສັດລາວ-ອິນໂດໄຊນາ ກຣຸບມະຫາຊົນ ຕິດໜີ້ຄ່າມັນຕົ້ນຂອງປະຊາຊົນປະມານ 5 ຕື້ກີບ, ເນື່ອງຈາກຫລາຍຄອບຄົວ ໄດ້ກູ້ຢືນເງິນມາທຳການຜະລິດມັນຕົ້ນ ແລະ ຈຳເປັນຕ້ອງໄດ້ຈ່າຍຄືນໃຫ້ທະນາຄານ ອີກດ້ານໜຶ່ງ ກໍເພື່ອແກ້ໄຂຊີວິດການເປັນຢູ່ຂອງຄອບຄົວ.
ທ່ານ ຈັນຖະໜອມ ວົງສົມຈິດ ປະທານ ຄະນະ ສສຊ ເຂດເລືອກຕັ້ງທີ 18 ແຂວງໄຊສົມບູນໄດ້ໃຫ້ສຳພາດໃນໂອກາດເຂົ້າຮ່ວມກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ VII ວ່າ: ຜ່ານການລົງພົບປະເຜີຍແຜ່ຜົນສຳເລັດຂອງກອງປະຊຸມຄັ້ງທີ່ຜ່ານມາ, ປະຊາຊົນເຂດເລືອກຕັ້ງຕົນກໍໄດ້ສະເໜີຕໍ່ຄະນະສະມາຊິກສະພາແຫ່ງ ຊາດຫລາຍບັນຫາ ໂດຍສະເພາະແມ່ນບັນຫາພື້ນຖານໂຄງລ່າງຖະ ໜົນຫົນທາງ, ໄຟຟ້າ, ການແກ້ໄຂຄວາມທຸກຍາກ, ການເຂົ້າເຖິງແຫລ່ງທຶນທະນາຄານ ແລະ ບັນຫາຕົ້ນຕໍແມ່ນ ໜີ້ສິນທີ່ບໍລິສັດລາວ-ອິນໂດໄຊນາ ຕິດໜີ້ປະຊາຊົນປະມານ 5 ຕື້ກວ່າກີບ ໃຫ້ທາງສະພາແຫ່ງຊາດກໍຄືທາງລັດຖະບານພິຈາລະນາແກ້ໄຂຊ່ວຍປະຊາຊົນ. ຕໍ່ກັບຄຳສະເໜີນີ້ ຄະນະສະມາຊິກສະພາເຂດຕົນ ກໍໄດ້ເອົາໃຈໃສ່ຊ່ວຍໂດຍຮ່າງໜັງສືສະເໜີເຖິງສະພາແຫ່ງຊາດກໍຄື ລັດຖະບານ ເພື່ອຊອກທິດທາງແກ້ໄຂໜີ້ສິນດັ່ງກ່າວ.
ທ່ານ ຍັງໃຫ້ຮູ້ຕື່ມວ່າ: ປັດຈຸບັນ ປະຊາຊົນຈຳນວນໜຶ່ງຍັງສືບຕໍ່ປູກມັນຕົ້ນ ໂດຍອີງຕາມເງື່ອນໄຂສະດວກ, ນອກຈາກໂຮງງານແປ້ງມັນຕົ້ນລາວ-ອິນໂດໄຊນາແລ້ວ ກໍຍັງມີໂຮງງານຜະລິດແປ້ງມັນຕົ້ນຢູ່ ແຂວງບໍລິຄຳໄຊ ແລະ ມີ ບໍລິສັດຈາກຫວຽດນາມ ກໍຮັບຊື້ມັນຕົ້ນແຫ້ງຈາກປະຊາຊົນ ເຊິ່ງເປັນເງື່ອນໄຂອັນໜຶ່ງທີ່ເຮັດໃຫ້ເຂົາເຈົ້າໄດ້ທຳການຜະລິດ ມັນຕົ້ນຂາຍເປັນສິນຄ້າ ສຸມໃສ່ສ້າງລາຍຮັບເຂົ້າຄອບຄົວກໍຄືແກ້ໄຂຄວາມທຸກຍາກຂອງປະຊາຊົນໃຫ້ ນັບມື້ຫລຸດລົງເທື່ອລະກ້າວເຊິ່ງເມືອງທີ່ປູກຫລາຍກວ່າໝູ່ແມ່ນເມືອງລ້ອງຊານ ແລະ ເມືອງຮົ່ມ, ມີເນື້ອທີ່ປະມານ 1 ພັນກວ່າເຮັກຕາ.
ຂອບໃຈຂ່າວຈາກ:
