ວັນທີ 22-23 ກໍລະກົດນີ້, ກະຊວງກະສິກຳ ແລະ ປ່າໄມ້ໄດ້ຈັດ ກອງປະຊຸມ ຕີລາການຜະລິດລະດູແລ້ງ ແລະ ແຜນຜະລິດລະດູຝົນ 2015 ຂຶ້ນ, ຢູ່ສະຖານ ບັນຄົ້ນຄວ້າກະສິກຳແຫ່ງຊາດນະຄອນ ຫຼວງວຽງຈັນ, ໂດຍການເປັນປະທານ ຂອງທ່ານ ວິໄລວັນ ພົມຂົມ ລັດຖະມົນຕີວ່າການກະຊວງດັ່ງກ່າວ, ພ້ອມຫົວພະ ແນກກະສິກຳ ແລະ ປ່າໄມ້ແຂວງ ນະຄອນຫຼວງ, ໃນທົ່ວປະເທດເຂົ້າຮ່ວມຢ່າງ ພ້ອມພຽງ.
ປະທານກ່າວວ່າ: ກອງປະຊຸມຄັ້ງນີ້ແມ່ນກອງປະຊຸມປຶກສາຫາລືທີ່ມີລັກສະນະວິຊາການ, ເຊິ່ງຈະໄດ້ສະຫລຸບຕີລາຄາຜົນຂອງການຜະລິດລະດູແລ້ງໃນສົກປີຜ່ານມາ ອັນໃດເຮັດໄດ້ ແລະ ບັນຫາທີ່ຍັງຄົງຄ້າງຍ້ອນສາເຫດອັນໃດ ? ໂດຍສະເພາະການຈັດຕັ້ງປະຕິບັດຄາດໝາຍສູ້ຊົນຜະລິດເຂົ້າ ໃຫ້ບັນລຸ 4,2 ລ້ານໂຕນ ໃນສົກປີ 2014-2015. ນອກນັ້ນ ກອງປະຊຸມຍັງຈະໄດ້ພ້ອມກັນຕີລາຄາຄືນກ່ຽວກັບວຽກງານເຮັດທົດລອງ 3 ສ້າງ ໃນຂົງເຂດກະສິກຳ ແລະ ປ່າໄມ້ ໃນ
ທ້າຍປີ 2015 ນີ້. ເພື່ອຍົກໃຫ້ເຫັນດ້ານຕັ້ງໜ້າ, ຂໍ້ຄົງຄ້າງ ແລະ ບົດຮຽນຕ່າງໆຈາກການຈັດຕັ້ງ ປະຕິບັດແຜນພັດທະນາກະສິກຳ ແລະ ປ່າໄມ້ ໃນ 6 ເດືອນຕົ້ນປີ 2015 ກໍຄືສະພາບການຜະລິດເຂົ້ານາແຊງບັນລຸໄດ້ປະມານ 520.000 ໂຕນ ເຊິ່ງຄາດໝາຍທີ່ວາງໄວ້ແມ່ນ 650.000 ໂຕນ ເຫັນວ່າຫລຸດ ຄາດໝາຍ 130.000 ໂຕນ. ແຕ່ເຖິງແນວໃດ ພວກເຮົາກໍໄດ້ສຳເລັດວັດຖຸປະສົງໃນລະດັບໜຶ່ງຂອງການປະຕິບັດແຜນງານຄ້ຳປະກັນສະບຽງອາຫານ, ວຽກງານຜະລິດເປັນສິນຄ້າ ແລະ ອັນສຳຄັນຮີບດ່ວນແມ່ນຈະຕ້ອງໄດ້ສືບຕໍ່ຄົ້ນຄວ້າປັບປຸງດ້ານນະໂຍບາຍໃຫ້ລະອຽດຊັດເຈນ ເພື່ອສາມາດນຳໄປຈັດຕັ້ງປະຕິບັດມີປະສິດທິຜົນ ແລະ ປັບປຸງນິຕິກຳທີ່ມີຢູ່ແລ້ວໃຫ້ແທດເໝາະກັບສະພາບ, ເງື່ອນໄຂ, ຈຸດພິເສດຂອງ ສປປ ລາວ ເຮົາທັງແທດເໝາະກັບບັນດາສົນທິສັນຍາສາກົນທີ່ລາວເຮົາໄດ້ເຂົ້າຮ່ວມເປັນພາຄີ.
ປະທານກ່າວວ່າ: ຈາກຜົນໄດ້ຮັບ ແລະ ສິ່ງທ້າທາຍດັ່ງກ່າວນັ້ນ, ໃນກອງປະຊຸມປຶກສາຫາລືຄັ້ງນີ້ ຈຶ່ງມີຄຳຖາມເຈາະຈິ້ມສະເໜີໃຫ້ບັນດາທ່ານສຸມໃສ່ບາງວຽກຕົ້ນຕໍດັ່ງນີ້:
- ການຈັດຕັ້ງປະຕິບັດການຜະລິດລະດູແລ້ງໄດ້ຕາມຄາດໝາຍຄືແນວໃດ ? ຍ້ອນເຫດຜົນອັນໃດແທ້ ແລະ ໃນໄລຍະລະດູຝົນນີ້ ໄດ້ມີແຜນການປູກເຂົ້ານາປີຈັກເຮັກຕາ, ໃຫ້ຢັ້ງຢືນຄືນເນື້ອທີ່ນາປີທີ່ກົມປູກຝັງສັງລວມມີທັງໝົດ 787.560 ເຮັກຕາ ໃນຂອບເຂດທົ່ວປະເທດ, ຄວາມອາດສາມາດຫົດນ້ຳຊົນລະປະທານໄດ້ເທົ່າໃດ ? ຄວາມອາດສາມາດຂະຫຍາຍຕື່ມອີກໄດ້ເທົ່າໃດ? ການກຳນົດຈຸດສຸມການຜະລິດໃນທົ່ວແຂວງມີເນື້ອທີ່ເທົ່າໃດ ?.
- ການຜະລິດແນວພັນເຂົ້າຜ່ານມາເປັນແນວໃດ ? ພຽງພໍແລ້ວບໍ່ ? ຢູ່ຈຸດໃດແດ່ການນຳໃຊ້ເງິນບ້ວງ 50 ຕື້ກີບ ເພື່ອຜະລິດແນວພັນແຕ່ລະລຸ້ນເປັນຄືແນວໃດ ? ແລະ ເຂດຈຸດສຸມ ເພື່ອຍົກສະມັດຖະພາບການຜະລິດເຂົ້າຕິດພັນກັບການປັບປຸງດິນເຮັດຄືແນວໃດ ? ການນຳໃຊ້ເຕັກນິກຈະສຸມໃສ່ອັນໃດ? ເປັນຕົ້ນແມ່ນນາຍອດນາຫວ່ານ, ນາດຳຕ່າງໆ.
- ບັນດາໂຄງການຊົນລະປະທານທີ່ໄດ້ຟື້ນຟູສ້ອມແປງບ້ວງງົບປະມານ 100 ຕື້ກີບ ແຕ່ລະແຂວງໄດ້ປະຕິບັດສຳເລັດ ຫລື ບໍ່ ແລະ ປະຊາຊົນຢູ່ເຂດດັ່ງກ່າວໄດ້ຄຸ້ມຄອງ, ນຳໃຊ້ເຮັດການຜະລິດແທ້ບໍ່ ?.
- ຖອດຖອນບົດຮຽນກ່ຽວກັບການນຳໃຊ້ເຕັກນິກການເຮັດນາຢອດ, ນາຫວ່ານ ແລະ ອື່ນໆ ຕິດພັນກັບການຈັດຕັ້ງກຸ່ມຜະລິດລວມທັງກົນໄກການຈັດຕັ້ງຄຸ້ມຄອງສູນ, ສະຖານີ ແລະ ໜ່ວຍບໍລິການຢູ່ພາຍໃນແຂວງຂອງຕົນໄດ້ມີປະສິດທິຜົນແນວໃດ ແລະ ຕໍ່ໜ້າຈະປັບປຸງຄືແນວໃດ ?.
- ໄດ້ກຳນົດມາດຕະການຕ້ານແລ້ງ-ຕ້ານຖ້ວມສຳລັບການຜະລິດລະດູຝົນນີ້ແນວໃດ?.
- ການນຳໃຊ້ກົນຈັກເຂົ້າໃນການຜະລິດນັບທັງການປັບປຸງພື້ນທີ່ນາໄຮ່ນ້ອຍໃຫ້ເປັນນາໄຮ່ໃຫຍ່ຕາມເງື່ອນໄຂ, ຈຸດພິເສດຂອງແຕ່ລະເຂດແຄວ້ນໄດ້ດຳເນີນການຄືແນວໃດ ?.
- ການກຳນົດມາດຕະການເຝົ້າລະວັງການລະບາດຂອງພະຍາດພືດ, ພະຍາດສັດແຕ່ລະແຂວງໄດ້ກຳນົດແນວໃດ ?.
- ສຳລັບ 10 ແຂວງຈຸດສຸມຜະລິດເຂົ້າເພື່ອຄ້ຳປະກັນສະບຽງອາຫານໄດ້ມີການກະກຽມຄວາມພ້ອມແນວໃດແລ້ວ.
- ວຽກງານສົ່ງເສີມການປູກໄມ້ ແລະ ຟື້ນຟູປ່າແຕ່ລະແຂວງໄດ້ປູກຢູ່ເຂດໃດ ? ແລະ ທິດທາງມາດຕະການ ເພື່ອປົກປັກຮັກສາປ່າໄມ້ ເພື່ອຮັກສາຄວາມດຸ່ນຊີວະນາໆພັນຕິດພັນກັບການທ່ອງທ່ຽວຄືແນວໃດ ?. ສະນັ້ນ ຈຶ່ງຮຽກຮ້ອງມາຍັງບັນດາທ່ານທຸກຄົນໃຫ້ຕັ້ງໜ້າປະກອບສ່ວນໃນກອງປະຊຸມຄັ້ງນີ້ໃຫ້ໄດ້ຮັບຜົນດີ ແລະ ໃຫ້ໄດ້ຕາມຈຸດປະສົງ ແລະ ລະດັບຄາດໝາຍ ຈຶ່ງຂໍໃຫ້ບັນດາທ່ານລາຍງານຕໍ່ກອງປະຊຸມແບບສັງລວມ, ແຕ່ມີເນື້ອໃນຊັດເຈນ ມີການວິເຄາະ ວິໄຈບັນຫາຢ່າງມີວິທະຍາສາດ ໂດຍໃຫ້ເນັ້ນໃສ່ບັນຫາພົ້ນເດັ່ນ, ບັນຫາຄົງຄ້າງ ແລະ ທິດທາງແກ້ໄຂໃນຕໍ່ໜ້າໃຫ້ປາກົດຜົນເປັນຈິງ ແລະ ອັນສຳຄັນແມ່ນຈະເຮັດແນວໃດ ເພື່ອບັນລຸໂຕເລກຄາດໝາຍສູ້ຊົນການຜະລິດນາປີບໍ່ໃຫ້ຫລຸດ 3,35 ລ້ານໂຕນ, ໃຫ້ແຕ່ລະແຂວງ ນຳພາຊ່ວຍເຫລືອປະຊາຊົນໃຫ້ຮູ້ຈັກເຮັດການຜະລິດປູກ-ລ້ຽງດ້ວຍເຂົາເຈົ້າເອງຢ່າງແທ້ຈິງ, ໂດຍສົມທົບກັບອຳນາດການປົກຄອງບ້ານ ແລະ ກຸ່ມບ້ານ ລວມທັງຜູ້ປະກອບການ ເພື່ອເຂົ້າມາມີສ່ວນຮ່ວມຊ່ວຍປະຊາຊົນໃນການຜະລິດຕົວຈິງ ໂດຍສະເພາະການສະໜອງຝຸ່ນປຸ໋ຍຕ່າງໆຕະຫລອດຮອດແນວພັນ.
ຂອບໃຈຂ່າວຈາກ:
