ວັນທີ 7 ພຶດສະພາ 2013 ນີ້ ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຖະແຫຼງຂ່າວຕໍ່ມວນຊົນໃນໂອກາດທີ່ ສປປ ລາວ ເຮົາ ໄດ້ຖືກຄັດເລືອກເປັນປະເທດທີ່ໜ້າທ່ຽວຊົມທີ່ສຸດໃນໂລກ ສຳລັບປີ 2013.
ການຖະແຫຼງຂ່າວຄັ້ງນີ້ ທ່ານລັດຖະມົນຕີກະຊວງ ຖວທ ໄດ້ແຈ້ງໃຫ້ຊາບວ່າ: ລາງວັນປະເທດທີ່ໜ້າທ່ອງທ່ຽວທີ່ສຸດໃນໂລກ ແມ່ນລາງວັນອັນຊົງກຽດລະດັບໂລກ ເຊິ່ງຢັ້ງຢືນ ແລະ ອອກໃຫ້ໂດຍສະພາການທ່ອງທ່ຽວ ແລະ ການຄ້າຂອງສະຫະພາບເອີຣົບປີລະຄັ້ງ ແລະ ໃນແຕ່ລະປີກໍມີແຕ່ປະເທດດຽວເທົ່ານັ້ນທີ່ໄດ້ຮັບລາງວັນນີ້ ການມອບລາງວັນດັ່ງກ່າວ ໄດ້ເລີ່ມປະຕິບັດນັບແຕ່ປີ 2007 ເປັນຕົ້ນມາ ແລະ ໃນປີ 2013 ນີ້ ແມ່ນ ສປປ ລາວ ເປັນປະເທດທີ່ໄດ້ຮັບລາງວັນດັ່ງກ່າວ ເປັນປະເທດທີ 5 ແລະ ຈັດພິທີມອບ-ຮັບໃນວັນທີ 9 ພຶດສະພານີ້ ລາງວັນອັນຊົງກຽດນີ້ຈະຖືກມອບໃຫ້ແກ່ປະເທດ ທີ່ມີເງື່ອນໄຂຄົບຖ້ວນຕາມຫຼັກການ 3 ປະການ ທີ່ພະແນກທ່ອງທ່ຽວຂອງອົງການສະຫະປະຊາຊາດ ອົງການອຸຍແນດສະໂກ ແລະ ສະພາການທ່ອງທ່ຽວ ແລະ ການຄ້າຂອງສະຫະພາບເອີຣົບ ໄດ້ກຳນົດຄື: 1. ການທ່ອງທ່ຽວທີ່ມີຄວາມຍຸຕິທຳ ມີຈັນຍາບັນ 2. ການທ່ອງທ່ຽວທີ່ມີຄວາມຮັບປະກັນຄວາມປອດໄພ 3. ການທ່ອງທ່ຽວທີ່ເອົາໃຈໃສ່ປົກປັກຮັກສາມໍລະດົກທາງດ້ານວັດທະນະທຳ ທາງດ້ານປະຫວັດສາດ ແລະ ທາງດ້ານທຳມະຊາດເປັນຢ່າງດີ ໝາຍຄວາມວ່າ ປະເທດທີ່ໄດ້ຮັບລາງວັນນີ້ ຕ້ອງເປັນປະເທດທີ່ຖືເອົາວຽກງານການທ່ອງທ່ຽວ ເປັນຊັບພະຍາກອນຢ່າງໜຶ່ງໃນການພັດທະນາວັດທະນະທຳ-ສັງຄົມ ເປັນປະເທດທີ່ເຄົາລົບນັບຖືຕໍ່ຈັນຍາບັນ ມີການປົກປັກຮັກສາມໍລະດົກທາງດ້ານວັດທະນະທຳ ມໍລະດົກທາງດ້ານປະຫວັດສາດ ກໍຄືມໍລະດົກທາງດ້ານທຳມະຊາດ ແລະ ເປັນປະເທດທີ່ສາມາດພິສູດໄດ້ວ່າ ມີການພັດທະນາການທ່ອງທ່ຽວຢ່າງຍືນຍົງ ໂດຍໄດ້ເອົາໃຈໃສ່ຕໍ່ຄວາມປອດໄພຂອງນັກທ່ອງທ່ຽວ ສົ່ງເສີມທ່ອງທ່ຽວ ແຕ່ມີຄວາມຍຸຕິທຳ ສະໜອງຜູ້ບໍລິການ ແລະ ນັກທ່ອງທ່ຽວ ມີການສະໜອງສິ່ງອຳນວຍຄວາມສະດວກ ມີເສັ້ນທາງເຂົ້າສູ່ແຫຼ່ງທ່ອງທ່ຽວທີ່ສຳຄັນທາງດ້ານວັດທະນະທຳທາງດ້ານປະຫວັດສາດ ມີການລົງທຶນໃສ່ການປົກປັກຮັກສາແຫຼ່ງປະຫວັດສາດລົງທຶນໃສ່ການອະນຸຮັກວັດທະນຳທຳ ແລະ ນຳໃຊ້ລາຍຮັບຈາກທ່ອງທ່ຽວເຂົ້າໃນການສ້າງເສດຖະກິດ-ສັງຄົມຢ່າງເໝາະສົມ ພ້ອມກັນນັ້ນ ກໍຕ້ອງເປັນປະເທດທີ່ພັດທະນາທຳການທ່ອງທ່ຽວ ທີ່ສອດຄ່ອງກັບກົດໝາຍການທ່ອງທ່ຽວສາກົນ ກໍຄືລະບຽບການທີ່ສະພາການທ່ອງທ່ຽວ ແລະ ການຄ້າຂອງສະຫະພາບເອີຣົບວາງອອກ.
ສຳລັບ ສປປ ລາວ ເຮົາ ຍາມໃດພັກ ແລະ ລັດຖະບານເຮົາ ໄດ້ກຳນົດແນວທາງນະໂຍບາຍພັດທະນາການທ່ອງທ່ຽວທາງດ້ານວັດທະນະທຳທາງດ້ານທຳມະຊາດ ແລະ ທາງດ້ານປະຫວັດສາດ ແລ້ວຖືເອົາວຽກງານການທ່ອງທ່ຽວເປັນວຽກງານບູລິມະສິດອັນໜຶ່ງໃນຂະແໜງການເສດຖະກິດ ເພື່ອສ້າງລາຍຮັບເປັນເງິນຕາເຂົ້າປະເທດ ສ້າງວຽກເຮັດງານທຳໃຫ້ແກ່ສັງຄົມ ກະຈາຍລາຍໄດ້ໃຫ້ແກ່ທ້ອງຖິ່ນຕ່າງໆ ປະກອບສ່ວນຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າ.
ຜ່ານການຈັດຕັ້ງປະຕິບັດແນວທາງນະໂຍບາຍດັ່ງກ່າວນັ້ນ ຕັ້ງແຕ່ຊຸມປີ 1990 ເປັນຕົ້ນມາ ວຽກງານການທ່ອງທ່ຽວຂອງ ສປປ ລາວ ໄດ້ຂະຫຍາຍຕົວຢ່າງຕໍ່ເນື່ອງ ດ້ວຍຈັງຫວະທີ່ວ່ອງໄວ ບັນດາພື້ນຖານໂຄງລ່າງຮັບໃຊ້ການທ່ອງທ່ຽວແມ່ນໄດ້ຮັບການເອົາໃຈໃສ່ກໍ່ສ້າງ ແລະ ປັບປຸງ ຍົກລະດັບຂຶ້ນເລື້ອຍໆ ເປັນຕົ້ນມາ ທັງໝົດເທົ່ານີ້ໄດ້ທັງປັດໄຈ ແລະ ເງື່ອນໄຂເອື້ອອຳນວຍເຮັດໃຫ້ການທ່ອງທ່ຽວລາວໄດ້ຮັບການພັດທະນາ ແລະ ສົ່ງເສີມຢູ່ໃນຂອບເຂດທົ່ວປະເທດ ແລະ ໄດ້ຮັບການຍ້ອງຍໍຊົມເຊີຍຈາກສາກົນຫຼາຍໆພາກສ່ວນ ແລະ ການທີ່ ສປປ ລາວ ໄດ້ຮັບຮອງວັນດັ່ງກ່າວ ປີ 2013 ນີ້ ແມ່ນໄດ້ເອົາຊື່ສຽງ ແລະ ກຽດສັກສີມາສູ່ປະເທດພວກເຮົາ ເວົ້າລວມ ເວົ້າສະເພາະ ກໍແມ່ນການສ້າງຊື່ສຽງ ແລະ ພາບພົດທີ່ດີແກ່ຂະແໜງການທ່ອງທ່ຽວຂອງ ສປປ ລາວ.
ບົນຈິດໃຈແຫ່ງຄວາມເບີກບານມ່ວນຊື່ນ ຄວາມເອກອ້າງທະນົງໃຈຂອງພວກເຮົາທີ່ ສປປ ລາວ ໄດ້ຮັບລາງວັນປະເທດທີ່ໜ້າທ່ອງທ່ຽວທີ່ສຸດໃນໂລກ ປະຈຳປີ 2013 ເຊິ່ງເປັນລາງວັນອົນຊົງກຽດນີ້ ແລະ ເພື່ອເຮັດໃຫ້ການທ່ອງທ່ຽວຂອງລາວໄດ້ຮັບການພັດທະນາຢ່າງຕໍ່ເນື່ອງ ແລະ ຍືນຍົງ ຂ້າພະເຈົ້າຂໍຮຽກຮ້ອງໃຫ້ທຸກພາກສ່ວນ ທຸກຂະແໜງການ ໃນລະດັບສູນກາງ ກໍຄືທ້ອງຖິ່ນ ຕະຫຼອດຮອດພາກສ່ວນທຸລະກິດໃນຂະແໜງການທ່ອງທ່ຽວ ຈົ່ງໄດ້ເພີ່ມທະວີພົວພັນປະສານງານ ສ້າງເງື່ອນໄຂ ແລະ ປັດໄຈອຳນວຍຄວາມສະດວກໃນດ້ານຕ່າງໆ ສຳລັບການເດີນທາງເຂົ້າ-ອອກ ການທ່ອງທ່ຽວຢູ່ພາຍໃນປະເທດເຮົາ ຮັບປະກັນຄວາມສະຫງົບປອດໄພທາງດ້ານຊີວິດ ແລະ ຊັບສິນຂອງນັກທ່ອງທ່ຽວ ປັບປຸງ ແລະ ຍົກສູງຄຸນນະພາບການບໍລິການໃຫ້ມີມາດຕະຖານສູງຂຶ້ນເລື້ອຍໆ ສ້າງສະພາບແວດລ້ອມທີ່ດີຢູ່ຕາມສະຖານທີ່ບໍລິການ ແລະ ຕາມແຫຼ່ງທ່ອງທ່ຽວຕ່າງໆ ສະກັດກັ້ນ ແລະ ຫຼີກເວັ້ນການຕົວະຕົ້ມຫຼອກລວງ ເອົາລັດເອົາປຽບນັກທ່ອງທ່ຽວ ສະກັດກັ້ນ ແລະ ກຳຈັດຜົນກະທົບທາງລົບຕໍ່ສິ່ງແວດລ້ອມ ທຳມະຊາດ ຕໍ່ວັດທະນະທຳ-ສັງຄົມ ຕໍ່ຮີດຄອງປະເພນີອັນດີງາມຂອງຊາດ ແລະ ຂອງແຕ່ລະທ້ອງຖິ່ນ.