ວັນທີ 29 ເມສາ 2013 ທີ່ຫ້ອງວ່າການປົກຄອງນະຄອນຫຼວງວຽງຈັນ ໄດ້ມີກອງປະຊຸມລາຍງານຄວາມຄືບໜ້າ ແລະ ປຶກສາຫາລືບາງບັນຫາໂຄງການປັບປຸງການຂົນສົ່ງສາທາລະນະ ໃນນະຄອນຫຼວງວຽງຈັນ ຊຶ່ງມີທ່ານ ສຸກັນ ມະຫາລາດ ເຈົ້າຄອງນະຄອນຫຼວງວຽງຈັນ ທ່ານ ສົມມາດ ພົນເສນາ ລັດຖະມົນຕີວ່າການ ກະຊວງໂຍທາທິການ ແລະ ຂົນສົ່ງ ທ່ານທູດຍີ່ປຸ່ນ ປະຈຳ ສປປ ລາວ ທ່ານຮອງເຈົ້າຄອງນະຄອນຫຼວງ ບັນດາຫົວໜ້າ ຮອງຫົວໜ້າກົມ ພະແນກການ ແລະ ວິຊາການກ່ຽວຂ້ອງຈາກນະຄອນຫຼວງ ກະຊວງ ແລະ ໂຄງການເຂົ້າຮ່ວມ.
ກອງປະຊຸມທ່ານ ໂຕດະ ໂຕຊິ ໂນຣິ ຫົວໜ້າຄະນະຊ່ຽວຊານ ໂຄງການປັບປຸງລະບົບຂົນສົ່ງລົດເມສາທາລະນະ ໃນນະຄອນຫຼວງວຽງຈັນ ໄດ້ຂຶ້ນລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການໃນໄລຍະຜ່ານມາ ແລະ ແຜນດຳເນີນໂຄງການໃນຕໍ່ໜ້າ ຈາກນັ້ນ ຜູ້ເຂົ້າຮ່ວມກອງປະຊຸມກໍໄດ້ພ້ອມກັນປະກອບຄຳຄິດຄຳເຫັນໃສ່ໂຄງການດັ່ງກ່າວ ເພື່ອພ້ອມກັນຊອກຫາຊ່ອງທາງແກ້ໄຂບັນຫາຄວາມແອອັດຂອງການສັນຈອນຂອງລັດ ແລະ ຄວບຄຸມຫຼຸດຜ່ອນອຸບັດເຫດຢູ່ຕົວເມືອງນະຄອນຫຼວງວຽງຈັນ.
ໂຄງການດັ່ງກ່າວເປັນໂຄງການໜຶ່ງທີ່ລັດຖະບານ ກໍຄືນະຄອນຫຼວງວຽງຈັນຂອງພວກເຮົາ ໄດ້ມາທົດລອງຢູ່ນະຄອນຫຼວງ ໂດຍການປັບປຸງການຂົນສົ່ງສາທາລະນະ ຊຶ່ງຜ່ານມາລັດຖະບານຍີ່ປຸ່ນກໍໄດ້ໃຫ້ການຊ່ວຍລົດເມຈຳນວນ 42 ຄັນ ເພື່ອຮັບໃຊ້ການບໍລິການຜູ້ໂດຍສານ ແລະ ຜ່ານການນຳເຂົ້າມາໃຊ້ ກໍເຫັນວ່າມີປະສິດທິຜົນ ຈຳນວນລົດເມກໍເພີ່ມຂຶ້ນ ແລະ ຈຳນວນຜູ້ໂດຍສານທີ່ໃຊ້ບໍລິການກໍເພີ່ມຂຶ້ນເກືອບເປັນ 2 ເທົ່າ ໂດຍລວມແລ້ວເຫັນວ່າດີຂຶ້ນທຽບໃສ່ຜ່ານມາ.
ສຳລັບໂຄງການດັ່ງກ່າວ ຜ່ານມາກໍໄດ້ມີການສຶກສາຫຼາຍດ້ານ ເພື່ອຊອກຫາຂໍ້ມູນມາປັບປຸງລະບົບການຂົນສົ່ງລົດສາທາລະນະຢູ່ນະຄອນຫຼວງເພື່ອໃຫ້ດີຂຶ້ນ ເປັນຕົ້ນ ເພື່ອເຮັດໃຫ້ບໍລິສັດລົດເມໃຫ້ການບໍລິການສູງຂຶ້ນ ມີຄວາມທັນສະໄໝ ວ່ອງໄວ ໃຫ້ຄົນໄປໃຊ້ລົດເມສາທາລະນະຫຼາຍຂຶ້ນ ແລະ ມີລາຍຮັບຫຼາຍຂຶ້ນ ຊຶ່ງຜ່ານການລົງສຶກສາເປັນຕົ້ນ ຕາໜ່າງເສັ້ນທາງບໍລິຫານການສັນຈອນການຂົນສົ່ງມວນຊົນ ເຫັນວ່າເພີ່ມຂຶ້ນຈາກ 10% ເປັນ 25% ພ້ອມນີ້ກໍຍັງໄດ້ຈັດກິດຈະກຳເຜີຍແຜ່ການນຳໃຊ້ລົດເມ ການເຝິກອົບຮົມ ແລະ ອື່ນໆໃຫ້ພະນັກງານວິຊາການກ່ຽວຂ້ອງ ແລະ ຜ່ານການລົງສຶກສາກໍສາມາດພົບເຫັນບາງບັນຫາເປັນບາງເສັ້ນທາງ ບາງເສັ້ນຍັງມີຜູ້ໃຊ້ບໍລິການລົດເມປະຈຳທາງມີໜ້ອຍ ສະພາບເສັ້ນທາງການສັນຈອນແອອັດ ແລະ ອື່ນໆຈຳນວນໜຶ່ງທີ່ຈະຕ້ອງໄດ້ສືບຕໍ່ລົງສຶກສາຂໍ້ມູນຕື່ມວ່າ ຍ້ອນສາເຫດອັນໃດ ຈຶ່ງມີຜູ້ໃຊ້ບໍລິການລົດໂດຍສານໜ້ອຍ ເພື່ອຈະໄດ້ເປັນຂໍ້ມູນໃຫ້ແກ່ໂຄງການຕື່ມ.
ນອກຈາກນີ້ ຫົວໜ້າຄະນະຊ່ຽວຊານໂຄງການ ຍັງໄດ້ຍົກໃຫ້ເຫັນຕື່ມອີກວ່າ: ພວກເຮົາຕ້ອງສ້າງບູລິມະສິດສຳລັບລົດເມດ້ວຍເລນລົດສ່ວນຕົວ ເພື່ອເຮັດໃຫ້ລົດເມສາມາດແລ່ນໄວຂຶ້ນ ເພື່ອຫຼຸດຜ່ອນຄວາມແອອັດໃນຊົ່ວໂມງຮີບດ່ວນໃນຕອນເຊົ້າ ໂດຍການທົດລອງໃຫ້ສັງຄົມນຳໃຊ້ລະບົບລົດເມດ່ວນຢູ່ສອງເສັ້ນທາງ ແຕ່ຂົວມິດຕະພາບລາວ-ໄທ ຫາສະຖານີລົດເມ (ຕະຫຼາດເຊົ້າ) ແລະ ແຕ່ລະສະຖານີລົດເມຫາວິທະຍາເຂດດົງໂດກ ໂດຍກຳນົດຊ່ອງທາງໜຶ່ງໃຫ້ລົດເມດ່ວນແລ່ນ ນອກນີ້ແລ້ວກໍຕ້ອງມີການປັບປຸງລັດວິສາຫະກິດລົດເມຄືນໃໝ່ ເພື່ອໃຫ້ທຸລະກິດມີລາຍຮັບ ແລະ ມີຜົນກຳໄລ ເພື່ອການບໍລິການທີ່ຍາວນານ ໂດຍການນຳໃຊ້ເງິນອຸດໜູນຈາກລັດຖະບານ ມາຈັດຊື້ລົດເມໃໝ່ເຂົ້າມາແທນລົດເມເກົ່າ ປັບປຸງທາງດ້ານກົດໝາຍຂອງລົດເມໂດຍສານ ແລະ ອື່ນໆ.
ພ້ອມນີ້ກອງປະຊຸມຍັງໄດ້ປຶກສາຫາລືການປັບປຸງສະຖານີລົດເມໃໝ່ ຊຶ່ງທາງໂຄງການໄດ້ສະເໜີເອົາຂ້າງຕະຫຼາດເຊົ້າເບື້ອງບ້ານຫັດສະດີ ເປັນສະຖານີລົດເມຊົ່ວຄາວ ແລະ ສຳລັບໂຄງການປັບປຸງສະຖານີລົດໃໝ່ນີ້ ແມ່ນຈະໃຊ້ເວລາການກໍ່ສ້າງປະມານ 3 ປີຈຶ່ງຈະສຳເລັດ.