ສະມາຄົມແພດຜິວໜັງອອກມາເຕືອນຄົນນິຍົມ”ສັກ”ລະວັງຜິວໜັງເກີດພາວະແຊກຊ້ອນ ຕິດເຊື້ອເລືອດອອກ,ບວມ,ຄັນເປັນໜອງແລະອື່ນໆອາດເຖິງຂັ້ນສ່ຽງມະເຮັງຖ້າໃຊ້ສີຜິດປະເພດ
ເມື່ອວັນທີ່ 15 ກໍລະກົດທີ່ຜ່ານມາ ທ່ານໝໍ ເວສາລັດ ເວສົດໂກວິດ ສະມາຄົມແພດຜິວໜັງແຫ່ງປະເທດໄທເປີດເຜີຍວ່າ:ປະຈຸບັນການສັກຜິວໜັງເປັນທີ່ນິຍົມຢ່າງແພ່ຫລາຍ ບາງຄົນສັກເປັນແຟຊັນຄືດາລາຊື່ດັງບາງຄົນສັກເພື່ອລຸດໄລຍະເວລາໃນການແຕ່ງໜ້າ ຕົວຢ່າງ:ສັກຄິ້ວຖາວອນ,ສັກຮີມສົບສີບົວເປັນຕົ້ນຢ່າງໃດກໍຕາມມີຜູ້ສັກເຖິງຮ້ອຍລະ5ທີ່ຮູ້ສຶກເສຍໃຈເພາະຫລັງສັກອາດເກີດພາວະແຊກຊ້ອນພົບໄດ້ຮ້ອຍລະ75ຂອງຜູ້ສັກທັງໝົດແບ່ງເປັນອາການທາງຜິວໜັງຮ້ອຍລະ 68 ຄື ຕົກເກັດ,ຄັນ,ເລືອດອອກ,ບວມ,ຕຸ່ມນ້ຳເປັນໜອງສ່ວນອາການທົ່ວໄປຮ້ອຍລະ7ໄດ້ແກ່:ມຶນງົງ,ເຈັບຫົວ,ເປັນໄຂ້,ປວດເມື່ອຍ ແລະພາວະແຊກຊ້ອນຊຳເຮື້ອຈາກການສັກຮ້ອຍລະ6ເຊັ່ນ:ແຜເປັນ,ບວມເປັນໆເຊົາໆ ສ່ວນພາວະແຊກຊ້ອນທີ່ຮຸນແຮງພົບໄດ້ຫລາຍຢ່າງເຊັ່ນ:ອາດເຮັດໃຫ້ເກີດການແພ້ໃນບໍລິເວນທີ່ສັກເຮັດໃຫ້ຜິວນູນປູດຫລືເກີດເປັນແຜຊຳເຮື້ອເນື່ອງຈາກແພ້ສີທີ່ໃຊ້ສັກ
ທ່ານໝໍ ເວສາລັດ ກ່າວວ່າ ການສັກບໍ່ຖາວອນທີ່ເອີ້ນວ່າ:ເຮນນາຄວນຈະໃຊ້ເຮນນາທີ່ມາຈາກທຳມະຊາດແຕ່ມີຜູ້ໃຫ້ບໍລິການມັກງ່າຍໃຊ້ຢາຍ້ອມຜົມເຄມີທີ່ປະກອບໄປດ້ວຍສານ paraphenylene diamine ທົດແທນເຮັດໃຫ້ຜູ້ທີ່ໄປໃຊ້ບໍລິການເກີດອາການແພ້ຮຸນແຮງຈົນອາດເປັນແຜເປັນຖາວອນທັງນີ້ການຕິດເຊື້ອຈາກການສັກເກີດໄດ້ຈາກເຊື້ອຫລາຍຊະນິດຕັ້ງແຕ່ໄວຣັສຕັບອັກເສບຊະນິດບີແລະຊີເຊື້ອເອດໄອວີ,ແບລັກທີເຣຍ ແລະໄມໂຄແບລັກທີເຣຍເຊື້ອຣາແລະຊິຟິລິດ ເປັນຕົ້ນ
“ສີດຳເປັນສີທີ່ນິຍົມໃຊ້ໃນການສັກຫລາຍທີ່ສຸດມີສ່ວນປະກອບຫລັກຄື carbon black ທີ່ໃຊ້ໃນອຸດສາຫະກຳຢາງລົດຍົນ,ພາສຕິກແລະອຸດສາຫະກຳສີຊຶ່ງສ່ວນປະກອບຫລາຍຢ່າງທີ່ບໍ່ໄດ້ຮັບອະນຸຍາດໃຫ້ໃຊ້ໃນຄົນເພາະມີການປົນເປື້ອນສານກໍ່ມະເຮັງໃນປະລິມານສູງເກີນກວ່າຄ່າທີ່ຍອມຮັບໄດ້ເຖິງ 23, 500 ເທົ່າ ເຖິງວ່າສານກໍ່ມະເຮັງຈະພົບໃນປະລິມານສູງຫລາຍແຕ່ຈາກລາຍງານກ່ຽວກັບມະເຮັງຜິວໜັງພັດພົບຂ້ອນຂ້າງຫນ້ອຍ ເນື່ອງຈາກສານກໍ່ມະເຮັງແລະໂລຫະໜັກເຫລົ່ານີ້ເກາະກັນເປັນໂມເລກຸນຂະໜາດໃຫຍ່ ແຕ່ຈາກການໃຊ້ເຄື່ອງເລເຊີລືບຮອຍສັກພົບວ່າເຮັດໃຫ້ຂະໜາດອານຸພາກຂອງສີສັກຫລຸດລົງໄດ້ເຖິງ8ເທົ່າແລະມີການປ່ອຍສານກໍ່ມະເຮັງຕ່າງໆອອກມາຈາກເມັດສີເປັນປະລິມານຫລາຍຖ້າປຽບທຽບທາງການແພດກໍບໍ່ຕ່າງຈາກຜູ້ປ່ວຍທີ່ປ່ຽນຂໍ້ສະໂພກທຽມຊະນິດທີ່ເບົ້າແລະຫົວກະດູກເປັນໂລຫະທັງຄູ່ຊຶ່ງພົບວ່າການຮຸກຖູຂະນະໃຊ້ເຮັດໃຫ້ມີປະຕິພາກໂລຫະອອກມາຈາກຂໍ້ທຽມກໍ່ໃຫ້ເກີດຜົນສະເພາະທີ່ແລະກວດພົບປະລິມານໂລຫະໜັກໂຄບອນເພີ່ມປະລິມານຫລາຍຂຶ້ນໃນກະແສເລືອດກໍ່ໃຫ້ເກີດອາການທາງປະສາດ ເຊັ່ນ:ເມື່ອຍ,ຍ່າງເຊ,ການຮູ້ຄິດ(cognitive function)ຫລຸດລົງເຊັ່ນດຽວກັນ” ທ່ານໝໍ ເວສາລັດ ກ່າວວ່າໃນປະເທດໄທແລະໃນອີກຫລາຍປະເທດທົ່ວໂລກຍັງບໍ່ມີການຄວບຄຸມການສັກແລະສີທີ່ໃຊ້ສັກບໍ່ຖືວ່າເປັນຢາຫລືເປັນເຄື່ອງສຳອາງບໍ່ຖືເປັນຫັດຖະການທາງການແພດດັ່ງນັ້ນການຄວບຄຸມໃນປະຈຸບັນອາດເຮັດໄດ້ພຽງຜ່ານສຳນັກງານຄະນະກຳມະການຄຸ້ມຄອງຜູ້ບໍລິໂພກເທົ່ານັ້ນ