ການແຂ່ງຂັນກ໊ອຟ ອາຊຽນ ພີຈີເອທົວ (ASEAN PGA Tour) ລາຍການຫຼວງພະບາງ ລາວ ໂອເພັນ ຄັ້ງທີ 2 (Luangprabang Laos Open) ໄດ້ຈັດຂຶ້ນຢູ່ສະໜາມກີລາກ໊ອຟຫຼວງພະບາງ ບ້ານຫ້ວຍພາຍ ແຕ່ວັນທີ 23-27 ເມສານີ້ ເພື່ອຊິງເງິນລາງວັນລວມ 1 ແສນກວ່າໂດລາສະຫະລັດ ໂດຍການເຂົ້າຮ່ວມແຂ່ງຂັນຂອງທ່ານ ດຣ. ພັນຄຳ ວິພາວັນ ລັດຖະມົນຕີວ່າການກະຊວງສຶກສາທິການ ແລະ ກີລາ ທ່ານ ດຣ. ຄຳແພງ ໄຊສົມແພງ ເຈົ້າແຂວງຫຼວງພະບາງ ແລະ ມີນັກກີລາຈາກໄທ ມາເລເຊຍ ສິງກະໂປ ອົດສະຕຣາລີ ແລະ ລາວ ກວ່າ 100 ຄົນເຂົ້າຮ່ວມ.
ໃນມື້ທຳອິດເປັນການແຂ່ງຂັນຂອງ (Pro-Am) ຫຼື Professor Amateur ຊຶ່ງແຂ່ງຂັນລະຫວ່າງນັກກ໊ອຟອາຊີບກັບນັກກ໊ອຟສະໝັກຫຼິ້ນຂອງບັນດາຜູ້ຈັດ ແລະ ຜູ້ສະໜັບສະໜູນ ເພື່ອເປີດໂອກາດໃຫ້ນັກກ໊ອຟສະໝັກຫຼິ້ນ ໄດ້ຖອດຖອນບົດຮຽນກັບນັກກ໊ອຟອາຊີບ ທັງເປັນການສ້າງໂອກາດໃຫ້ນັກກ໊ອຟອາຊີບ ໄດ້ທົດສອບສະໜາມກ໊ອຟຕື່ມອີກ ສ່ວນການແຂ່ງຂັນຂອງນັກກ໊ອຟອາຊີບ ໄດ້ຈັດຂຶ້ນແຕ່ວັນທີ 24-27 ເມສານີ້ ໂດຍມີ 12 ລາຍການ ເພື່ອຊິງເງິນລາງວັນລວມ 1 ແສນກວ່າໂດລາສະຫະລັດ ເຊິ່ງລາງວັນທີ 1 ຈະໄດ້ຮັບຂັນ ພ້ອມເງິນສົດ 16 ພັນກວ່າໂດລາສະຫະລັດ ທີ 2 ໄດ້ຮັບ 11 ພັນກວ່າໂດລາສະຫະລັດ ທີ 3 ໄດ້ຮັບ 6 ພັນກວ່າໂດລາສະຫະລັດ ແລະ ຍັງມີລາງວັນຕ່າງໆຕື່ມອີກລວມ 50 ລາງວັນ.
ການແຂ່ງຂັນກ໊ອຟຫຼວງພະບາງ ລາວ ໂອເພັນ ເທື່ອນີ້ ເປັນລາຍການທີ 3 ຂອງການແຂ່ງຂັນກ໊ອຟ ອາຊຽນ ພີຈີເອທົວ ຊຶ່ງລາຍການທຳອິດຊື່ວ່າ: ສິງອີສານ ໂອເພັນ ທີ່ຈັດຂຶ້ນແຕ່ວັນທີ 14-17 ກຸມພາຜ່ານມາ ຢູ່ປະເທດໄທ ລາຍການທີ 2 ຊື່ວ່າ: ສິງພັດທະຍາ ແຕ່ວັນທີ 18-21 ເມສານີ້ ຢູ່ປະເທດໄທ ສ່ວນລາຍການທີ 4 ຊື່ວ່າ ພີຈີເອັມ-ອາຊຽນ ອາຟາໂມຊາ ມາດສະເຕີ (PGM-ASEAN A’Famosa Master) ຈະຈັດຂຶ້ນໃນວັນທີ 8-11 ພຶດສະພານີ້ ຢູ່ມາເລເຊຍ ພ້ອມນີ້ຍັງມີອີກ 8 ລາຍການຕື່ມອີກ ທີ່ຈະແຂ່ງຂັນໃຫ້ສຳເລັດໃນປີນີ້ ເພື່ອເປີດໂອກາດໃຫ້ນັກກີລາກ໊ອຟອາຊີບລະດັບອາຊຽນ ໄດ້ສະສົມຄະແນນໃຫ້ແກ່ຕົນເອງ.