ອົງການ Plan ສາກົນ ປະຈຳ ສປປ ລາວ ໄດ້ສືບຕໍ່ໃຫ້ການຊ່ວຍເຫຼືອລ້າແກ່ລັດຖະບານລາວ ໃນວຽກງານການສຶກສາ ລວມເປັນມູນຄ່າ 2 ລ້ານກວ່າໂດລາສະຫະລັດ ຊຶ່ງປະກອບມີໂຄງການການສຶກສາ ແລະ ພັດທະນາເດັກກ່ອນໄວຮຽນ ໄລຍະທີ II ທີ່ແຂວງບໍ່ແກ້ວ ແລະ ໂຄງການພັດທະນາການສຶກສາຂັ້ນພື້ນຖານທີ່ແຂວງອຸດົມໄຊ.
ສຳລັບໂຄງການການສຶກສາ ແລະ ພັດທະນາເດັກກ່ອນໄວຮຽນ ໄລຍະທີ II ທີ່ຕັ້ງຂອງໂຄງການແມ່ນຢູ່ເມືອງຜ່າອຸດົມ ເມືອງປາກທາ ແລະ ເມືອງເມິງ ແຂວງບໍ່ແກ້ວ ໂຄງການນີ້ແມ່ນສົ່ງເສີມນະໂຍບາຍດ້ານການດູແລ ແລະ ພັດທະນາເດັກກ່ອນໄວຮຽນ ການບໍລິການ ແລະ ການຊ່ວຍເຫຼືອເດັກອາຍຸແຕ່ 0-5 ປີ ໂດຍສະເພາະແມ່ນເດັກຍິງ ເດັກດ້ອຍໂອກາດ ທີ່ຢູ່ເຂດຫ່າງໄກສອກຫຼີກ ທຸກຍາກ ຊົນເຜົ່າ ແລະ ພິການ ໃຫ້ໄດ້ຮັບສິດໃນການເຂົ້າເຖິງການສຶກສາ ແລະ ໄດ້ຮັບການພັດທະນາຢ່າງເທົ່າທຽມກັນ ໂຄງການນີ້ມີມູນຄ່າ 1.264.002 ໂດລາສະຫະລັດ.
ໂຄງການພັດທະນາການສຶກສາຂັ້ນພື້ນຖານ ແມ່ນຕັ້ງຢູ່ເມືອງປາກແບ່ງ ເມືອງຮຸນ ແລະ ເມືອງງາ ແຂວງອຸດົມໄຊ ໂຄງການນີ້ແມ່ນເພີ່ມການເຂົ້າເຖິງການສຶກສາຢ່າງສະເໝີພາບຂອງເດັກ ແລະ ສົ່ງເສີມໃຫ້ຮຽນຈົບການສຶກສາກ່ອນໄວຮຽນ ແລະ ການສຶກສາຊັ້ນປະຖົມທີ່ມີຄຸນນະພາບໃນບັນດາໂຮງຮຽນປະຖົມສຶກສາ 3 ເມືອງເປົ້າໝາຍຂອງແຂວງອຸດົມໄຊ ມູນຄ່າຂອງໂຄງການນີ້ແມ່ນ 1.628.744 ໂດລາສະຫະລັດ.
ວັນທີ 11 ເມສາ 2013 ຜ່ານມານີ້ ກໍໄດ້ມີພິທີເຊັນບົດບັນທຶກຄວາມເຂົ້າໃຈກັນຢ່າງເປັນທາງການ ຢູ່ທີ່ໂຮງແຮມກຸຫຼາບ ນະຄອນຫຼວງວຽງຈັນ ລະຫວ່າງທ່ານນາງ ຈັນທະວອນ ພັນດຳນອງ ຫົວໜ້າກົມພົວພັນຕ່າງປະເທດ ກະຊວງສຶກສາທິການ ແລະ ກີລາ ກັບທ່ານ Andrew Hill ຜູ້ອຳນວຍການຝ່າຍວິຊາການຂອງອົງການ Plan ໂດຍມີທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກີລາ ເຂົ້າຮ່ວມເປັນສັກຂີພິຍານ.