ກູເກິລ ( Google ) ບໍລິສັດ ແຖວໜ້າທາງດ້ານເຕັກໂນໂລຊີ ການເຊື່ອມຕໍ່ຂໍ້ມູນ ໃຫ້ສະດວກສະບາຍຂອງໂລກ ໄດ້ປະສົບຄວາມສຳເລັດໃນການຖ່າຍພາບສະ ຖານທີ່, ຖະຫນົນຫົນທາງ ແລະ ສະຖານທີ່ທ່ອງທ່ຽວສຳຄັນຕ່າງໆຂອງ ສປປ ລາວ ໃນຮູບແບບ 360 ອົງສາ ຫລື ພາໂນຣາມາ ( Panorama ) ຮອບທິດທາງ ໂດຍກ້ອງອອກແບບມາພິເສດເພື່ອໃຫ້ໄດ້ຄຸນນະພາບທີ່ມີຄວາມແຈ້ງສູງ.
ໃນວັນທີ 14 ກໍລະກົດນີ້ ຢູ່ນະຄອນຫລວງວຽງຈັນ ກະຊວງໄປສະນີໂທລະຄົມມະນາຄົມ ແລະ ການສື່ສານຮ່ວມ
ກັບບໍລິສັດ Google ໄດ້ຈັດພິທີປະກາດຢ່າງເປັນທາງການໃນການຊົມໃຊ້ Street View ລົງເວັບໄຊແຜ່ນທີ່ Google Maps ໂດຍຖ່າຍພາບຈາກອຸປະກອນເຄື່ອນທີ່ໂດຍຕິດຕັ້ງໄວ້ເທິງລົດຂັບໄປຕາມເສັ້ນທາງຖະຫນົນ ຕ່າງໆ, ຕາມສະຖານທີ່ ທ່ອງທ່ຽວທົ່ວປະເທດ ຫລື ໃຊ້ຄົນໃນບ່ອນທີ່ ເຂົ້າເຖິງໄດ້ຍາກ ໂດຍຮູບແບບ ພາບ 360 ອົງສາ ຫລື ພາບ Panorama ຜ່ານເວັບໄຊ http://maps.google.com .
ໃນຂົງເຂດທີ່ສາມາດນຳໃຊ້ Street View ໄດ້ ທ່ານສາມາດ ເຂົ້າເຖິງໂດຍການດຶງເອົາຮູບຄົນສີສົ້ມທີ່ຢູ່ຊ້າຍ ມືຂອງເຮົາລາກໄປທີ່ ແຜ່ນທີ່ໄປຍັງຖະຫນົນ, ເມືອງທີ່ ຕ້ອງການຕາມເສັ້ນຫມາຍສີຟ້າ ຈາກນັ້ນພາບກໍຈະສະແດງຂຶ້ນມາ ແບບ 360 ອົງສາ ໂດຍການໃຊ້ ເມົ້າຫມູນພາບໄປຮອບໆໄດ້ ຫາກ ຕ້ອງການເລື່ອນໄປຍັງຕຳແຫນ່ງ ອື່ນໃຫ້ລາກຮູບຄົນ ສີສົ້ມຈາກແຜນທີ່ເພື່ອປ່ຽນຕຳແຫນ່ງ.
ທ່ານ ພົນປະສິດ ພິດສະໄຫມ ຫົວຫນ້າສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທ ລະຄົມ ແລະ ການສື່ສານ ກ່າວວ່າ : “ ພວກເຮົາຕື່ນເຕັ້ນຫລາຍທີ່ໄດ້ ເຫັນໂຄງການດ່ັງກ່າວໄດ້ກ້າວມາ ເຖິງຈຸດນີ້ ດ້ວຍພາບຕ່າງໆຈາກ ນະຄອນຫລວງ ເຊັ່ນ : ປະຕູໄຊ ຢູ່ໃນ Google Maps ມື້ນີ້ທຸກຄົນ ທົ່ວໂລກມີສິດໃຊ້ Google Maps ແລະ Street View ເພື່ອຊ່ວຍອຳນວຍຄວາມສະດວກໃນການເດີນທາງພາຍ ສປປ ລາວ, ທຸກຄົນຈະ ສາມາດເຂົ້າໄປຢ້ຽມຢາມນະຄອນຫລວງວຽງຈັນຈາກທຸກຫົນແຫ່ງ ຂອງປະເທດຜ່ານທາງອິນເຕີເນັດ. ໂຄງການ Street View ຊ່ວຍ ສ້າງຊື່ສຽງໃຫ້ປະເທດລາວ ແລະ ເປັນການດີທີ່ໂຄງການໄດ້ສຳເລັດຜົນໃນປີນີ້ ຍ້ອນວ່າປະເທດລາວ ຈະເປັນເຈົ້າພາບ ASEAN ໃນປີ 2016 ພວກເຮົາຫວັງວ່າ Google ຈະເກັບພາບອັນສວຍສົດງົດງາມຂອງປະເທດລາວໃນອະນາຄົດ ”.
ສ່ວນທ່ານ ອາເລັກ ລອງ ຫົວ ຫນ້າຕາງຫນ້າປະເທດ, ນະໂຍ ບາຍ ແລະ ການສື່ສານກັບລັດຖະ ບານ Google Asia Pacific ໄດ້ກ່າວວ່າ : “ ພວກເຮົາຫວັງວ່າ Street View Imagery ທີ່ໄດ້ ເປີດໂຕໃນມື້ນີ້ຈະເປັນທາງເລືອກ ໃຫມ່ໃຫ້ຄົນທົ່ວໂລກໄດ້ສຳຜັດກັບ ປະເທດລາວຫລາຍຂຶ້ນ ແລະ ດຶງດູດການທ່ອງທ່ຽວໃນລາວຫລາຍຂຶ້ນ ”.
ແຫລ່ງຂ່າວ: ລາວພັດທະນາ