ສຳນັກຂ່າວໄທຣັດຂອງໄທ ລາຍງານໃນວັນທີ 9 ກໍລະກົດນີ້ວ່າ ຈາກສະພາບອາກາດແຫ້ງແລ້ງຈັດ ໄດ້ເຮັດໃຫ້ເກີດສະພາບເລີ່ມຂາດແຄນປາແດກ ແລະ ມີລາຄາເພີ່ມຂຶ້ນສູງຢູ່ແຂວງສຸຣິນ ແລະ ແຂວງບຸຣິຣຳ ປະເທດໄທ ໂດຍພໍ່ຄ້າ ພ້ອມດ້ວຍເຈົ້າຂອງໂຮງງານຜະລິດປາແດກ ໄດ້ພາກັນມາດັກຊື້ປາຈາກຊາວກຳປູເຈຍ ຢູ່ບໍວິເລນຊາຍແດນຄອງເລິກ ເມືອງອະຣັນຍະປະເທດ ແຂວງສະແກ້ວ ເພື່ອນຳໄປເຮັດປາແດກຂາຍ ໂດຍ ທ້າວ ພິໄຊ ເຊິ່ງເປັນພໍ່ຄ້າມາແຕ່ແຂວງສຸຣິນໄດ້ເວົ້າວ່າ ຜົນຈາກໄພແຫ້ງແລ້ງໃນພາກອີສານ ໄດ້ເຮັດໃຫ້ຫ້ວຍໜອງຄອງບຶງແຫ້ງຂອດ ບໍ່ມີປາເລັກປານ້ອຍໃຫ້ເຮັດປາແດກ ຕ້ອງໄດ້ມາດັກຖ້າຊື້ປາຈາກຊາວກຳປູເຈຍສົ່ງເຂົ້າມາຂາຍໃຫ້ ແຕ່ປັດຈຸບັນລັດຖະບານກຳປູເຈຍໄດ້ປະກາດປິດທະເລສາບຕົງເລສາບແລ້ວ ເພາະເປັນລະດູຂອງປາວາງໄຂ່ ຈິ່ງເຮັດໃຫ້ປາທີ່ສົ່ງເຂົ້າມາຂາຍເຫລືອໜ້ອຍຫລາຍ ເຊິ່ງຖ້າຫາກສະຖານະການເປັນແບບນີ້ ເຊື່ອວ່າຈະເຮັດໃຫ້ປາແດກຂາດແຄນ ແລະ ມີລາຄາເພີ່ມຂຶ້ນສູງ.