ໃນໂອກາດຢ້ຽມຢາມ ສສ ຫວຽດນາມ ວັນທີ 7 ກໍລະກົດ 2015 ນີ້ ທ່ານ ບຸນຍັງ ວໍລະຈິດ ຮອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະ ໄດ້ຢ້ຽມຢາມພົບປະ ທ່ານ ຫງວຽນ ເຕີນ ຢຸງ ນາຍົກລັດຖະມົນຕີ ແຫ່ງ ສສ ຫວຽດນາມ.
ສອງຝ່າຍໄດ້ຮ່ວມມືກັນແລກປ່ຽນ ກ່ຽວກັບການພັດທະນາ ເສດຖະກິດ-ສັງຄົມ, ການກະກຽມໃຫ້ແກ່ ກອງປະຊຸມໃຫຍ່ ຂອງສອງພັກ, ຕີລາຄາຄືນ ແລະ ວາງທິດທາງ ການຈັດຕັ້ງປະຕິບັດ ບົດບັນທຶກຮ່ວມກັນ ແລະ ຕີລາຄາສູງຕໍ່ໝາກຜົນຂອງການຮ່ວມມື ລະຫວ່າງ ສອງປະເທດ ຕະຫລອດໄລຍະຜ່ານມາ ເຊິ່ງມັນສະແດງເຖິງ ຄວາມເອົາໃຈໃສ່ຂອງ ພັກ-ລັດຖະບານ ໂດຍສະເພາະ ແມ່ນປະທານປະເທດ ທັງສອງປະເທດຮ່ວມກັນ ເປີດສະໜາມບິນສາກົນຢູ່ແຂວງອັດຕະປື ແລະ ສຳເລັດການລົງນາມ ສັນຍາການຄ້າຊາຍແດນ ເພື່ອເຮັດໃຫ້ສອງຝ່າຍບັນລຸ ຄາດໝາຍການຄ້າສອງສົ້ນ ເພີ່ມຂຶ້ນ 40% ໃນປີ 2015 ເມື່ອທຽບໃສ່ປີ 2014. ສືບຕໍ່ຊຸກຍູ້ສົ່ງເສີມ ແລະ ສ້າງເງື່ອນໄຂ ໃຫ້ບັນດາທ້ອງຖີ່ນ ໄດ້ມີໂອກາດແລກປ່ຽນຂໍ້ມູນຂ່າວສານ ຮ່ວມກັນ, ປະສານສົມທົບຮ່ວມກັນ ໃນການແກ້ໄຂບັນຫາຕ່າງໆ ທີ່ເກີດຂຶ້ນຢ່າງທັນການ ແລະ ເພື່ອຜົນປະໂຫຍດ ຂອງປະຊາຊົນ ສອງຊາດລາວ-ຫວຽດນາມ.
ຈາກນັ້ນ ທ່ານ ບຸນຍັງ ວໍລະຈິດ, ພ້ອມຄະນະໄດ້ເຂົ້າພົບ ທ່ານ ເລ ຮົ່ງ ແອັງ ກຳມະການກົມການເມືອງສູນກາງພັກ, ຜູ້ປະຈຳການເລຂາທິການສູນກາງພັກກອມມູນິດ ຫວຽດນາມ ແລະ ເຊື່ອໝັ້ນວ່າການຢ້ຽມຢາມ ໃນຄັ້ງນີ້ເປັນການເພີ່ມພູມຄູນສ້າງ ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມື ລະຫວ່າງ ສອງພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນ ແລະ ງອກງາມຍິ່ງໆຂຶ້ນ.
ແຫລ່ງຂ່າວ: ສຳນັກຂ່າວສານປະເທດລາວ