ສຳນັກຂ່າວຕ່າງປະເທດ ລາຍງານໃນວັນທີ 7 ກໍລະກົດນີ້ວ່າ ປະຊາຊົນຫລາຍກ່ວາ 1,350 ຄົນ ຈຳເປັນຕ້ອງອົບພະຍົບອອກຈາກແຄວ້ນອະຣາກອນ ທາງພາກຕາເວັນອອກສຽງເໜືອຂອງປະເທດແອັດສະປາຍ ຫລັງຈາກເກີດເຫດໄຟໄໝ້ປ່າລຸກລາມຢ່າງໜັກໃນພື້ນທີ່ ໂດຍສູນກາງຂອງໄຟໄໝ້ປ່າຄັ້ງນີ້ ແມ່ນເລີ່ມຂຶ້ນເມື່ອທ້າຍອາທິດທີ່ຜ່ານມາ ຢູ່ຫ່າງຈາກນະຄອນຫລວງມາດຣິດ ໄປທາງພາກຕາເວັນອອກສຽງເໜືອປະມານ 375 ກິໂລແມັດ ເຮັດໃຫ້ປະຊາຊົນຕ້ອງອົບພະຍົບໄປອາໄສຢູ່ສູນອົບພະຍົບຊົ່ວຄາວ ທີ່ອົງການປົກຄອງທ້ອງຖິ່ນຈັດຂຶ້ນ.

ທັງນີ້ ເຈົ້າໜ້າທີ່ດັບເພີງກ່ວາ 500 ຄົນ ໄດ້ຖືກລະດົມເຂົ້າມາເຮັດໜ້າທີ່ມອດໄຟ ແລະ ແຫລ່ງຂ່າວຍັງລະບຸອີກວ່າ ແອັດສະປາຍແລະ ປັອກຕຸຍການ ຈະຕ້ອງປະເຊີນກັບການໂຈມຕີຂອງຄື່ນຄວາມຮ້ອນ ອັນຈະເຮັດໃຫ້ເກີດມີອຸນຫະພູມສູງຂຶ້ນຢູ່ຫລາຍພື້ນທີ່ ເຊິ່ງອຸນຫະພູມອາດແຕະລະດັບ 40 ອົງສາ ເປັນເວລາຕໍ່ໄປອີກ 1 ອາທິດ.