ສຳນັກຂ່າວຕ່າງປະເທດ ລາຍງານໃນວັນທີ 6 ກໍລະກົດນີ້ວ່າ ຜົນການນັບຄະແນນປະຊາມະຕິຢູ່ເກຣັກ ກ່ຽວກັບການຮັບ ຫລື ບໍ່ຮັບເງື່ອນໄຂການປະຕິຮູບຂອງສະຫະພາບເອີຣົບ ແລະ ກອງທຶນການເງິນລະຫວ່າງປະເທດ ຫລື ໄອເອັມເອັບ ເຊິ່ງເປັນເຈົ້າໜີ້ ໄດ້ອອກມາເປັນສຽງສ່ວນຫລາຍ ກວມເອົາ 61.31% ແມ່ນລົງມະຕິບໍ່ຍອມຮັບ ສ່ວນອີກທີ່ເຫລືອຈຳນວນ 38.69% ແມ່ນລົງມະຕິຍອມຮັບເງື່ອນໄຂດັ່ງກ່າວ ເຮັດໃຫ້ເຈົ້າໜີ້ຕ້ອງໄດ້ເລືອກເອົາວ່າ ຈະຍອມອ່ອນຂໍ້ໃຫ້ລັດຖະບານເກຣັກ ເພື່ອຫລີກລ່ຽງຜົນກະທົບທາງການເມືອງ ເຊິ່ງອາດຈະເຮັດໃຫ້ເກຣັກຫລຸດພົ້ນອອກຈາກກຸ່ມປະເທດທີ່ໃຊ້ເງິນເອີໂຣ ຫລື ວ່າຈະຍັງຄົງຈຸດຢືນທີ່ເຂັ້ມງວດຕໍ່ໄປ.

ທັງນີ້ ພາຍຫລັງຜົນການລົງປະຊາມະຕິດັ່ງກ່າວ ໄດ້ເຮັດໃຫ້ລັດຖະບານເຢຍລະມັນ ແລະ ຝຣັ່ງ ສະເໜີໃຫ້ມີການປະຊຸມລະດັບຜູ້ນຳສະຫະພາບເອີຣົບໂດຍດ່ວນ ເຊິ່ງຈະຈັດຂຶ້ນໃນມື້ອື່ນນີ້ (7 ກໍລະກົດ) ເພື່ອຊອກຫາວິທີທາງແກ້ໄຂ.