ຮອງເຈົ້າຄອງນະຄອນຫລວງວຽງຈັນ, ຫົວໜ້າຄະນະກຳມະການແກ້ໄຂບັນຫາ ການຫັນຊັບສິນ ເປັນທຶນ ຖະໜົນວຽງຈັນ 450 ປີ ໄດ້ອອກແຈ້ງການເລກທີ 228/ຈນວ ເຖິງບັນດາເຈົ້າຂອງທີ່ດິນຢູ່ເຂດ ສະຫງວນເບື້ອງລະ 50 ແມັດ ສອງຟາກຖະໜົນວຽງຈັນ 450 ປີ ໃຫ້ມາຮັບເອົາຄ່າຊົດເຊີຍ ຫລື ຊື້ສິດນຳ ໃຊ້ທີ່ດິນນຳຄະນະກຳມະການ ນະ ຄອນຫລວງວຽງຈັນ ຖ້າຫາກກາຍກຳ ນົດພາຍໃນ 2 ຈະຖືກສະລະສິດ ໂດຍບໍ່ໃຫ້ມີການຕໍ່ວ່າແຕ່ຢ່າງໃດ.
ແຈ້ງການສະບັບດັ່ງກ່າວໄດ້ມີຂຶ້ນໃນຄັ້ງວັນທີ 17 ມິຖຸນານີ້ ໂດຍໄດ້ເນັ້ນວ່າ: ຮອງເຈົ້າຄອງນະຄອນ ຫລວງວຽງຈັນ, ຫົວໜ້າຄະນະກຳມະການແກ້ໄຂບັນຫາການຫັນຊັບສິນເປັນທຶນ ດິນສອງຟາກທາງ 450 ປີ ຂໍຖືເປັນກຽດແຈ້ງການເຊີນມາ
ຍັງບັນດາທ່ານຜູ້ທີ່ມີດິນຢູ່ເຂດສະຫງວນສອງຟາກທາງ 450 ປີ ຈົ່ງເຂົ້າ ມາພົວພັນຮັບເອົາຄ່າຊົດເຊີຍ ຫລື ຈ່າຍເງິນ ຄ່າຊື້ສິດນຳໃຊ້ທີ່ດິນຄືນນຳຄະນະກຳມະການຢູ່ບ້ານໂພນທອງ ຖະໜົນວຽງຈັນ 450 ປີ ເມືອງໄຊເສດຖາ ໃນໂມງລັດຖ ະການ. ຄືດັ່ງທີ່ຮູ້ນຳກັນແລ້ວວ່າ: ໃນປີ 2012 ໂດຍໄດ້ຮັບການເຫັນດີຈາກລັດຖະບານ, ເຈົ້າຄອງນະຄອນຫລວງວຽງຈັນ ໄດ້ອອກຂໍ້ຕົກລົງສະບັບເລກທີ 617/ຈນວ, ລົງວັນທີ 30 ພຶດສະພາ 2012 ໃນຂໍ້ຕົກລົງໄດ້ລະບຸຢ່າງຈະແຈ້ງໃຫ້ເຈົ້າຂອງ ດິນເດີມມີສິດຊື້ຄືນຈຳນວນ 536 ຕອນ ທີ່ນອນໃນເຂດສະຫງວນເບື້ອງລະ 50 ແມັດຂອງຖະໜົນ 450 ປີ, ກຳນົດບໍ່ໃຫ້ກາຍ 3 ເດືອນ ນັບແຕ່ມື້ລົງລາຍເຊັນເປັນຕົ້ນໄປ, ຖ້າຫາກກາຍກຳນົດ 3 ເດືອນ ຍັງບໍ່ມາຮັບເອົາຄ່າຊົດເຊີຍ ໃບຕາດິນເດີມຈະຖືກ ລຶບລ້າງບໍ່ມີມູນຄ່າໃຊ້ໄດ້ທາງກົດໝາຍຖືວ່າດິນແຕ່ລະຕອນແມ່ນສະລະສິດ ແລະ ຕົກເປັນຂອງລັດໂດຍກົງ.
ມາຮອດປັດຈຸບັນໄດ້ມີເຈົ້າຂອງດິນເດີມມາຊື້ສິດນຳໃຊ້ ແລະ ມອບໃບຕາດິນໃຫ້ນະຄອນຫລວງວຽງຈັນແລ້ວ ຈຳນວນ 300 ກວ່າຕອນ, ຖ້າທຽບໃສ່ຈຳນວນເຈົ້າຂອງດິນເດີມແມ່ນກວມເອົາ 80%, ຍັງອີກພຽງ 20% ເທົ່ານັ້ນທີ່ຍັງບໍ່ທັນ ມາຮັບເອົາຄ່າຊົດເຊີຍ ແລະ ຊື້ສິດນຳໃຊ້ທີ່ດິນຄືນເຮັດໃຫ້ການປະຕິ ບັດຂໍ້ຕົກລົງຂອງເຈົ້າຄອງນະຄອນຫລວງວຽງຈັນ ຖືກແກ່ຍາວມາເປັນເວລາ 3 ປີ ອັນໄດ້ສົ່ງຜົນກະທົບຕໍ່ ການຫັນຊັບສິນເປັນທຶນເພື່ອເອົາເງິນໄປຊຳລະໜີ້ຄ່າກໍ່ສ້າງເສັ້ນທາງ 450 ປີ ໃຫ້ແກ່ທະນາຄານ ແລະ ບໍລິສັດຜູ້ຮັບເໝົາກໍ່ສ້າງເສັ້ນທາງດັ່ງກ່າວເປັນເວລາ 8 ປີແລ້ວ. ດ້ວຍເຫດນັ້ນ ຮອງເຈົ້າຄອງນະຄອນຫລວງວຽງຈັນ, ຫົວໜ້າຄະນະກຳມະການແກ້ໄຂບັນຫາຫັນຊັບສິນເປັນທຶນຂອງນະຄອນ ຫລວງວຽງຈັນ ຈຶ່ງຂໍແຈ້ງເຊີນເປັນຄັ້ງສຸດທ້າຍໃຫ້ເຈົ້າຂອງດິນຈົ່ງມາຮັບເອົາຄ່າຊົດເຊີຍ ຫລື ຊື້ສິດນຳໃຊ້ທີ່ດິນຄືນນຳ ຄະນະກຳມະການ ພາຍໃນກຳນົດ 2 ເດືອນ ນັບແຕ່ມື້ອອກແຈ້ງການສະບັບນີ້ເປັນຕົ້ນໄປ. ຖ້າບໍ່ມາຕິດຕໍ່ ພົວພັນນຳຄະນະກຳມະການຕອນດິນດັ່ງກ່າວຈະຖືກລົບລ້າງອອກເປັນໃບຕາດິນໃໝ່ເປັນຂອງລັດ ແລ້ວ ປະກາດຂາຍທົ່ວໄປ.
ແຫລ່ງຂ່າວ: ລາວພັດທະນາ