ຂປລ. ການປະກາດແຕ່ງຕັ້ງ ເລຂາພັກເມືອງ, ເຈົ້າເມືອງລະມາມາມ ໄດ້ຈັດຂຶ້ນໃນວັນທີ 22 ມິຖຸນາ 2015 ນີ້, ໂດຍມີທ່ານ ພອນເພັດ ຄິວລະວົງ ຮອງເລຂາພັກ ແຂວງເຊກອງ, ມີຄະນະປະຈຳ; ກຳມະການພັກເມືອງ, ຫົວໜ້າ-ຮອງຫົວໜ້າ ຫ້ອງການອ້ອມຂ້າງເມືອງ ເຂົ້າຮ່ວມ.ໃນພິທີ ທ່ານ ນາງ ສີສະຫງ່າ ແກ້ວດວງດີ ກໍາມະການພັກແຂວງ, ຫົວໜ້າ ພະແນກ ພາຍໃນແຂວງ ໄດ້ຜ່ານຄຳສັ່ງ ວ່າດ້ວຍການຍົກຍ້າຍ ພະນັກງານຮັບໜ້າທີ່ໃໝ່ ເຊິ່ງໄດ້ຍົກຍ້າຍທ່ານ ເຫລັກໄຫລ ສີວິໄລ ເລຂາພັກເມືອງ, ເຈົ້າເມືອງລະມາມ ຜູ້ເກົ່າ ໄປຮັບໜ້າທີ່ໃໝ່ ຢູ່ຂັ້ນແຂວງ ແລະ ຜ່ານມະຕິຕົກລົງ ການແຕ່ງຕັ້ງ ທ່ານ ດຣ ແພງສີ ສີລາວີ ເປັນເລຂາພັກເມືອງລະມາມ, ແຕ່ງຕັ້ງທ່ານ ດຣ ແພງສີ ສີລາວີ ເປັນເຈົ້າເມືອງ ລະມາມຜູ້ໃໝ່.
ໂອກາດນີ້ ທ່ານ ພອນເພັດ ຄິວລະວົງ ຮອງເລຂາພັກແຂວງເຊກອງ ໄດ້ໃຫ້ກຽດໂອ້ລົມຕໍ່ ເຊິ່ງທ່ານໄດ້ເນັ້ນ ໃຫ້ຜູ້ທີ່ຮັບໜ້າທີ່ໃໝ່ ສືບຕໍ່ເອົາໃຈໃສ່ ຊີ້ນຳວຽກງານການເມືອງ ແນວຄິດພາຍໃນ ໃຫ້ໜັກແໜ້ນ ແລະ ມີຄວາມເປັນເອກະພາບ ພາຍໃນພັກ, ລວມສູນປະຊາທິປະໄຕ ເຮັດວຽກເປັນໝູ່ຄະນະ, ມີຫົວຄິດປະດິດສ້າງ ໃນການນຳພາ ປະຊາຊົນ, ຕ້ອງເພີ່ມທະວີ ຄວາມສາມັກຄີ ພາຍໃນຢ່າງແໜ້ນແຟ້ນ, ພ້ອມນີ້ກໍຕ້ອງສືບຕໍ່ ເອົາໃຈໃສ່ຈັດຕັ້ງປະຕິບັດ ວຽກງານທີ່ຍັງຄົງຄ້າງ ແລະ ກຳນົດທິດທາງແຜນການ ເພື່ອພັດທະນາ ເມືອງລະມາມ ໃຫ້ຂະຫຍາຍຕົວ ຂຶ້ນໄປເລື້ອຍ.
ແຫລ່ງຂ່າວ: ສຳນັກຂ່າວສານປະເທດລາວ