ການສອບເສັງ ມ4 ປະຈໍາສົກຮຽນ 2014-2015 ໄດ້ເລີ່ມພ້ອມກັນໃນທົ່ວປະເທດ ໃນຕອນເຊົ້າຂອງວັນທີ 16 ມີຖຸນາ 2015 ຜ່ານມານີ້, ສຳລັບແຂວງອຸດົມໄຊ ມີນັກສອບເສັງ ທັງໝົດ 5.085 ຄົນ, ຍິງ 2.332 ຄົນ, ແບ່ງອອກເປັນ 23 ສູນ, ລວມມີ 75 ໂຮງຮຽນ, ມີ 220 ຫ້ອງ, ປະກອບມີສູນສອບເສັງ: ມສ ແຂວງ, ມສ ເມືອງໄຊ, ມຕ ບ້ານບໍ່, ມສ ຫ້ວຍຂຸມ, ມສ ຫົວນໍ້າງາ, ມສ ນໍ້າແຫງ, ມສ ກໍນ້ອຍ, ມສ ເມືອງຫຼາ, ມສ ນາໝໍ້, ມສ ນາສະຫວ່າງ, ມສ ດອນແອ່ນ, ມສ ລາດຫານ, ມສ ເມືອງແບງ, ມຕ ນາງົວ, ມສ ນາແມດ, ມສ ເມືອງຮຸນ, ມສ ນາຊຽງດີ, ມຕ ສີວິໄລ, ມຕ ພູແຊງ, ມຕ ຜາຄໍາ, ມສ ດອນເມືອງ, ມສ ປາກແບງ ແລະ ມຕ ແຕງວາງ.
ສໍາລັບສູນ ມສ ເມືອງໄຊ ເປັນສູນໜຶ່ງທີ່ສອບເສັງສໍາເລັດຕາມວັນເວລາທີ່ໄດ້ກໍານົດໄວ້ ເຊິ່ງປີນີ້ທາງສູນ ມີ 4 ໂຮງຮຽນເຂົ້າຮ່ວມ ມີນັກສອບເສັງທັງໝົດ 308 ຄົນ, ຍິງ 147 ຄົນ ມີ 13 ຫ້ອງສອບເສັງ ໃນນີ້ ມສ ເມືອງໄຊ ມີ 212 ຄົນ, ຍິງ 121 ຄົນ, ມສ ສົງ 23 ຕົນ, ມຕ ດອນໄຊ ມີ 53 ຄົນ, ຍິງ 21 ຄົນ ແລະ ໂຮງຮຽນລຽວເປີຍມີ 20 ຄົນ, ຍິງ 5 ຄົນ.ສອບເສັງໃນ 5 ວິຊາ ປະກອບມີ ວິຊາ ພາສາລາວ-ວັນນະຄະດີ, ຄະນິດສາດ, ທໍາມະຊາດ, ວິທະຍາສາດສັງຄົມ ແລະ ວິຊາສຶກສາຜົນລະເມືອງ, ການສອບເສັງໄດ້ດໍາເນີນມາເປັນເວລາ 3 ວັນ ເລີ່ມຕັ້ງແຕ່ ວັນທີ 16 – 18 ມີຖຸນາ ນີ້ ໄດ້ສໍາເລັດ.
ໂດຍການເປັນປະທານຂອງທ່ານ ບຸນຮ່ວມ ແກ້ວອຸດອນ ຮອງຫົວໜ້າຫ້ອງການສຶກສາທິການ ແລະ ກິລາເມືອງໄຊ, ເຂົ້າຮ່ວມ ມີຄະນະກໍາມະການ, ອະນຸກຳມະການເຜົ້າຫ້ອງເສັງ ແລະ ນັກສອບເສັງເຂົ້າຮ່ວມນໍາ.
ໃນໂອກາດການສອບເສັງໃນຄັ້ງນີ້ທາງສູນໄດ້ຮັບການໃກ້ຊິດຕິດແທດ ແລະ ລົງຕິດຕາມການສອບເສັງຈາກທ່ານ ໂອວາດ ຈັນທະວົງ ຄະນະປະຈໍາພັກແຂວງ ຫົວໜ້າພະແນກສຶກສາທິການ ແລະ ກິລາ, ທ່ານ ຄໍາແພງ ຂັນມະນີ ຄະນະປະຈໍາພັກເມືອງ ເຈົ້າເມືອງ, ເມືອງໄຊ, ໄດ້ລົງຢ້ຽມຍາມການສອບເສັງ ແລະ ຮ່ວມຕັດຫົວບົດນໍາອີກດ້ວຍ.
ພາຍຫຼັງສໍາເລັດການສອບເສັງແລ້ວ ບັນດານ້ອງນັກຮຽນ ໃຫ້ໃຊ້ເວລາຫວ່າງຍາມພັກແລ້ງນີ້ເກີດປະໂຫຍດ ໂດຍຊ່ວຍວຽກພໍ່ແມ່ຜູ້ປົກຄອງຕາມພາລະໜ້າວຽກຂອງຕົນ ເທົ່າທີ່ຈະຊ່ວຍໄດ້, ບໍ່ໃຫ້ພາກັນໄປມົ້ວສຸມກັບສິ່ງອະບາຍຍະມົກຕ່າງໆ ເປັນຕົ້ນແມ່ນ ການຫຼີ້ນ, ກິນ, ຟຸມເຟີ່ອຍ ມົ້ວສຸມສິ່ງເສບຕິດ, ຂັບຂີ່ລົດໄວ, ຂີ້ລັກງັດແງະ, ອະລະວາດຕີກັນ ຫຼື ບັນຫາປາກົດການຫຍໍ້ທໍ້ຕ່າງໆ, ຈົ່ງແຂ່ງຂັນກັນ ຮຽນດີ-ຮຽນເກັ່ງ, ເອົາໃຈໃສ່ຕັ້ງໜ້າເຝຶກຝົນຕົນເອງ ໃຫ້ເປັນສິດທີ່ດີຂອງຄູອາຈານ, ເປັນລູກທີ່ດີຂອງພໍ່ແມ່, ເປັນຄົນດີຂອງຊາດ ແລະ ເປັນຜູ້ທີ່ມີຄວາມຮູ້, ຄວາມສາມາດໃນການພັດທະນາບ້ານເມືອງ, ພໍ່ແມ່ຜູ້ປົກຄອງນັກຮຽນກໍຕ້ອງໄດ້ເອົາໃຈໃສ່ໃກ້ຊິດຕິດແທດກັບລູກຫຼານຂອງຕົນໃຫ້ຫຼາຍຂື້ນ ທັງຊ່ວຍສຶກສາອົບຮົມລູກຫຼານຂອງຕົນໃຫ້ຫັນມາເອົາໃຈໃສ່ການຮຽນ ເພື່ອໃຫ້ມີອະນາຄົດທີ່ດີ, ຜູ້ບໍລິຫານການສຶກສາ, ຄູອາຈານຢູ່ແຕ່ລະໂຮງຮຽນ ໃນໄລຍະພັກຮຽນນີ້ ກໍຕ້ອງໄດ້ເອົາໃຈໃສ່ຄຸ້ມຄອງ , ປົກປັກຮັກສາ ອາຄານສະຖານທີ, ອຸປະກອນການຮຽນ-ການສອນ ໃຫ້ມີປະສິດທິຜົນ ແລະ ສາມາດນໍາໃຊ້ໄດ້ຍາວນານຕະຫຼອດໄປ.
