ການບໍລິການຂອງບັນດາແພດໝໍຢູ່ຕາມໂຮງໝໍແຫ່ງຕ່າງໆມາເຖິງປັດຈຸບັນ ຍັງມີຫລາຍອັນທີ່ຈະຕ້ອງໄດ້ປັບປຸງຄືນເພື່ອໃຫ້ມີຄຸນນະພາບ ແລະ ຫລຸດຜ່ອນຫາງສຽງຈົ່ມວ່າຂອງສັງຄົມກໍຄືຄົນເຈັບ ແລະ ປະຊາຊົນຜູ້ເຂົ້າບໍລິການໃນແຕ່ລະວັນ ເຊິ່ງເຫັນວ່າໂຮງໝໍຫລາຍແຫ່ງຍັງເຮັດບໍ່ທັນໄດ້ດີເທົ່າທີ່ຄວນ, ເຖິງວ່າໃນໄລຍະຜ່ານມາ ການບໍລິການຂອງແພດໝໍຢູ່ໂຮງໝໍ ຫລາຍແຫ່ງໄດ້ມີຄວາມຄືບໜ້າດີດ້ານການປິ່ນປົວຈົນເປັນທີ່ນິຍົມຊົມຊອບ ແລະ ເພິ່ງພໍໃຈຕໍ່ການປິ່ນປົວ ແລະ ຄວາມເອົາໃຈໃສ່ຂອງແພດໝໍແຕ່ລະຂັ້ນ ໂດຍສະເພາະຢູ່ຕາມຂະແໜງຜ່າຕັດ, ຂະແໜງປະສູດ, ແມ່ ແລະ ເດັກ ມັກມີປ້າຍຕິດຢູ່ຕາມຝາ ແລະ ຈຸດບໍລິການອື່ນໆ ບອກວ່າ “ຫ້າມເກັບເງິນນຳຄົນເຈັບ” ສິ່ງດັ່ງກ່າວມັນບົ່ງບອກເຖິງຄວາມບໍລິສຸດຜຸດຜ່ອງ ແລະ
ຄວາມເອົາໃຈໃສ່ເບິ່ງແຍງຂອງແພດໝໍທີ່ມີຕໍ່ຄົນເຈັບ, ແຕ່ໃນນີ້ທີ່ຍັງມີສຽງຈົ່ມແບບໜາຫູກໍແມ່ນພະແນກສຸກເສີນ, ພະແນກມໍລະສຸມ ເຊິ່ງເປັນຂະແໜງການທີ່ສຳຄັນ ແລະ ຮອງຮັບການເຂົ້າປິ່ນປົວຂອງຄົນເຈັບຕະຫລອດ 24 ຊົ່ວໂມງ ເປັນຕົ້ນແມ່ນພວກເກີດອຸປະຕິເຫດຕາມທ້ອງຖະໜົນຫລວງ, ພວກທີ່ໄດ້ຮັບກະທົບໜັກ ລວມໄປເຖິງພວກທີ່ເກີດພະຍາດກະທັນຫັນ ແລະ ອື່ນໆ ເຊິ່ງໃນນີ້ສິ່ງສຳຄັນແມ່ນຂອດບໍລິການ ເລີ່ມຈາກຮັບເອົາຄົນເຈັບເຂົ້າຫ້ອງປົວພະຍາດ ນັບທັງການເວົ້າຈາ, ການກວດພະຍາດປິ່ນປົວຄົນເຈັບກໍນັບວ່າບໍ່ທັນມີຄວາມຈູບຈ້າວຫ້າວ ຫັນ ແລະ ຍັງຂາດນ້ຳໃຈຮັບຜິດຊອບຂອງຈັນຍາບັນແພດປະຕິວັດ. ຖ້າທຽບໃສ່ກັບໂຮງໝໍ ຫລື ຄລີນິກຂອງປະເທດເພື່ອນບ້ານເຫັນວ່າຍັງໄກກັນຫລາຍ ເປັນຕົ້ນບັນຫາການເວົ້າຈາຂອງແພດໝໍຕ້ອງມີຄວາມນິ້ມນວນອ່ອນຫວານ ສາມາດຊັກຊວນໃຫ້ກັບຄົນເຈັບ ແລະ ຍາດພີ່ນ້ອງຂອງຄົນເຈັບມີຄວາມເຊື່ອໝັ້ນຕໍ່ການປິ່ນປົວເບິ່ງແຍງຂອງແພດໝໍ ໃນນີ້ສິ່ງສຳຄັນທີ່ສຸດແມ່ນນ້ຳໃຈຄວາມຮັບຜິດຊອບຂອງຕົນໃຫ້ສົມກັບແພດປະຕິວັດ, ສົມກັບຄວາມໄວ້ເນື້ອເຊື່ອໃຈຂອງພັກ, ຂອງການຈັດຕັ້ງທີ່ມອບໝາຍໃຫ້ສ້າງຄວາມເຊື່ອໝັ້ນໃຫ້ກັບຄົນເຈັບທຸກຄົນທີ່ໄດ້ມອບໝົດຊີວິດຈິດໃຈຂອງເຂົາເຈົ້າ ໂດຍເອົາໂຮງໝໍເປັນທີ່ເພິ່ງສຸດທ້າຍຂອງປະຊາຊົນພົນລະເມືອງທຸກຄົນ.
ແຫລ່ງຂ່າວ: ລາວພັດທະນາ