ຂປລ. ໂຮງໝໍແມ່ ແລະ ເດັກແດງຂໍແຈ້ງເຖິງບັນດາພໍ່ແມ່ປະຊາຊົນ, ທະຫານ, ຕໍາຫລວດ ແລະ ຜູ້ໃຊ້ບໍລິການອື່ນໆຮັບຊາບວ່າ:ທາງໂຮງໝໍແມ່ ແລະ ເດັກແດງຫລັງເກົ່າຢູ່ບ້ານເກົ້າຍອດຈະປິດຮັບຄົນເຈັບ,ເກີດລູກ ແລະ ຜ່າຕັດປະສູດພະຍາດຍິງນັບແຕ່ວັນທີ 22 ມິຖຸນາ 2015 ເປັນຕົ້ນໄປເພື່ອຫ້າງຫາກະກຽມຍົກຍ້າຍໄປໃຊ້ບໍລິການຢູ່ໂຮງໝໍແຫ່ງໃໝ່ ແລະ ນັບແຕ່ວັນທີ 29 ມິຖຸນາ 2015 ຈະເປີດໃຫ້ບໍລິການຄົນເຈັບຄືນຢູ່ໂຮງໝໍແຫ່ງໃໝ່ຕັ້ງຢູ່ບ້ານໜອງພະຍາ.
ທ່ານ ຮອງສາດສະດາຈານ ດຣ ບົວວັນ ແສນສະຖິດ,ອຳນວຍການ ໂຮງໝໍແມ່ແລະ ເດັກແດງສູນກາງເປີດເຜີຍວ່າ: ຫລາຍປີຜ່ານມານີ້ ຈໍານວນຄົນເຈັບ ແລະ ແມ່ມານເຂົ້າມາໃຊ້ບໍລິການຢູ່ໂຮງໝໍຂອງພວກເຮົາມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ຈົນບາງຄັ້ງເຮັດໃຫ້ຄົນເຈັບລົ້ນໂຮງໝໍ ຂະນະທີ່ໂຮງໝໍແມ່ ແລະ ເດັກຫລັງເກົ່ານັ້ນມີຂະໜາດພຽງແຕ່ 70 ຕຽງນອນກັບສະພາບຊຸດໂຊມໜັກ ຂະນະທີ່ຄົນເຈັບ ແລະ ແມ່ມານເຂົ້າມາໃຊ້ບໍລິການເພື່ອປິ່ນປົວ ແລະ ອອກລູກສະເລ່ຍບໍ່ຕໍ່າກວ່າ 300 ຄົນຕໍ່ມື້. ໄລຍະຜ່ານພວກເຮົາໄດ້ຊອກທາງອອກເພື່ອແກ້ໄຂບັນຫາເຫລົ່ານັ້ນດ້ວຍການສຳສົ່ງຄົນເຈັບທີ່ລົ້ນໂຮງໝໍ ໄປໂຮງໝໍແຫ່ງຕ່າງໆຢູ່ນະຄອນຫລວງເພື່ອຮັບປະກັນໃຫ້ເຂົາເຈົ້າໄດ້ຮັບການປິ່ນປົວຢ່າງທົ່ວເຖິງ. ສະນັ້ນເພື່ອແກ້ໄຂ້ບັນຫາໄລຍະ ຍາວນັ້ນ ລັດຖະບານໄດ້ລົງທຶນກໍ່ສ້າງໂຮງໝໍແມ່ ແລະ ເດັກຫລັງໃໝ່ ເຊິ່ງເປັນໂຮງໝໍຂະໜາດໃຫຍ່ ມີຄວາມທັນສະໄໝ. ໂຮງໝໍແຫ່ງໃໝ່ນີ້ໄດ້ເລີ່ມກໍ່ສ້າງມາແຕ່ປີ 2013 ແລະ ຮອດປັດຈຸບັນ ແມ່ນສຳເລັດແລ້ວ 100% ແລະ ຈະເປີດໃຫ້ບໍລິການຢ່າງເປັນທາງການໃນວັນທີ 29 ມິຖຸນານີ້, ຄາດວ່າໂຮງໝໍແຫ່ງນີ້ ຈະສາມາດຕອບສະໜອງ ຄວາມຕ້ອງການຂອງຜູ້ມາໃຊ້ບໍລິການໄດ້ຢ່າງພຽງພໍ ແລະ ສາມາດແກ້ໄຂບັນຫາຄົນເຈັບລົ້ນໂຮງໝໍໄດ້ເປັນຢ່າງດີ. ໂຮງໝໍແຫ່ງນີ້ ສາມາດບັນຈຸຕຽງນອນຄົນເຈັບໄດ້ຫລາຍກວ່າ 150 ຕຽງ, ມີອຸປະກອນ ການແພດທີ່ທັນສະໄໝ ເລະ ມີສິ່ງອຳນວຍຄວາມສະດວກອື່ນໆ ເຊິ່ງຕັ້ງຢູ່ບ້ານໜອງພະຍາ, ເມືອງໄຊທານີ ນະຄອນຫລວງວຽງຈັນ.
ຂ່າວສານປະເທດລາວ