ໃນສັງຄົມປະຈຸບັນມີແຕ່ການແຂ່ງຂັນເຮັດໃຫ້ການດຳເນີນຊີວິດໃນແຕ່ລະມື້ຂອງທຸກຄົນຕ້ອງຟ້າວໄປນໍາສົ່ງຜົນໃຫ້ສຸຂະພາບຂອງຄົນໃນສັງຄົມຮ້າຍກວ່າເກົ່າແລະບັນຫາທາງສຸຂະພາບທີ່ພົບໄດ້ເລື້ອຍຄືການເກີດແຜໃນກະເພາະອາຫານຫລືລຳໄສ້ນ້ອຍສ່ວນຕົ້ນຊຶ່ງໂດຍທົ່ວໄປເຮົາເອີ້ນວ່າ“ພະຍາດກະເພາະ”
ພະຍາດກະເພາະເປັນພະຍາດທີ່ພົບໄດ້ຕະຫລອດພະຍາດໜຶ່ງປະມານວ່າຄົນທົ່ວໄປມີໂອກາດເປັນພະຍາດນີ້ໃນໄລຍະໃດໄລຍະໜຶ່ງຂອງຊີວິດໂດຍການເກີດບາດແຜໃນກະເພາະມັກພົບໃນໄວກາງຄົນ ຂະນະທີ່ການເກີດບາດແຜທີ່ລຳໄສ້ນ້ອຍສ່ວນຕົ້ນຈະພົບໃນໄວໜຸ່ມສາວຢ່າງໃດກໍຕາມການເກີດບາດແຜໃນກະເພາະອາຫານຫລືບາດແຜທີ່ລຳໄສ້ນ້ອຍສ່ວນຕົ້ນສາມາດເກີດຂຶ້ນໄດ້ໃນຄົນທຸກເພດແລະທຸກໄວ
ສາເຫດເກີດຈາກມີການຫລັ່ງກົດໃນກະເພາະອາຫານຫລາຍເກີນໄປຮ່ວມກັບຄວາມຕ້ານທານຕໍ່ກົດຂອງເຍື່ອກະເພາະອາຫານແລະລຳໄສ້ຫລຸດລົງຈຶ່ງເຮັດໃຫ້ມີບາດແຜເກີດຂຶ້ນແລະປະຈຸບັນພົບວ່າຍັງມີປັດໄຈເສີມອື່ນໆທີ່ເຮັດໃຫ້ເກີດພະຍາດໄດ້ອີກໄດ້ແກ່
1. ການຕິດເຊື້ອເຮລິໂຄແບກເຕີ ໄພໂລໄລ (Helicobactor Pylori) ຊຶ່ງເປັນແບກທີເຣຍຊະນິດໜຶ່ງທີ່ຕິດຕໍ່ໂດຍການກິນອາຫານຫລືດື່ມນ້ຳທີ່ປົນເປື້ອນເຊື້ອຈາກອາຈົມຂອງຜູ້ຕິດເຊື້ອ,ເຊື້ອນີ້ເມື່ອເຂົ້າສູ່ຮ່າງກາຍຈະເຂົ້າໄປຝັງໂຕຢູ່ໃຕ້ເຍື່ອກະເພາະຝາກະເພາະຈຶ່ງອ່ອນແອລົງແລະມີຄວາມທົນຕໍ່ກົດຫລຸດລົງເຮັດໃຫ້ກະເພາະອາຫານແລະລຳໄສ້ນ້ອຍສ່ວນຕົ້ນເກີດບາດແຜໄດ້ງ່າຍບາດແຜເຊົາຊ້າແລະເກີດບາດແຜຊ້ຳໄດ້ອີກ
2.ກິນສິ່ງທີ່ເຮັດໃຫ້ເກີດການລະຄາຍເຄືອງຕໍ່ກະເພາະແລະລຳໄສ້ເຊັ່ນ:ດື່ມຊາ,ກາເຟຫລືເຄື່ອງດື່ມທີ່ມີຄາເຟອີນຫລືເຄື່ອງດື່ມທີ່ມີແອວກໍຮໍ,ນ້ຳອັດລົມແລະການກິນຢາບາງຊະນິດເຊັ່ນ:ຢາແກ້ປວດຈຳພວກແອດໄພລິນ,ຢາປິ່ນປົວພະຍາດກະດູກແລະຂໍ້ອັກເສບ,ຢາຊຸດຫລືຢາລູກກອນທີ່ມີດເຕຍລອຍເປັນຕົ້ນ
3.ມີມູບນິໄສການກິນອາຫານທີ່ບໍ່ຖືກຕ້ອງເຊັ່ນ:ການກິນອາຫານແບບຟ້າວ,ກິນບໍ່ເປັນເວລາຫລືອົດອາຫານບາງມື້ເປັນຕົ້ນ
4.ການສູບຢາເພີ່ມໂອກາດຂອງການເປັນບາດແຜທີ່ລຳໄສ້ນ້ອຍສ່ວນຕົ້ນ
5.ອື່ນໆເຊັ່ນ:ຊຶມເສົ້າ,ວິຕົກກັງວົນ,ຄິດຫລາຍ,ນອນບໍ່ຫລັບ,ຄຽດ,ອາລົມຫງຸດຫງິດ,ພັກຜ່ອນບໍ່ພຽງພໍ ເປັນຕົ້ນ
ອາການຂອງພະຍາດກະເພາະມັກມີອາການປວດແສບ,ປວດຕື້,ຈຸກສຽດຫລືຈຸກແໜ້ນບໍລິເວນກ້ອງລິ້ນປີ່ ອາການປວດເຫລົ່ານີ້ເປັນໄດ້ທັງເວລາກ່ອນກິນອາຫານຫລືຫລັງກິນອາຫານໃໝ່ໆແລະເວລາທ້ອງວ່າງ ເຊັ່ນ:ເວລາຫິວເຂົ້າ,ຕອນເຊົ້າມືດຫລືຕອນເດິກໆກໍເຈັບທ້ອງໄດ້ເຊັ່ນກັນອາການປວດຈະເປັນໆເຊົາໆ ເປັນໄດ້ມື້ລະຫລາຍໆເທື່ອແລະແຕ່ລະເທື່ອທີ່ເຈັບຈະດົນປະມານ15 – 30 ນາທີອາການປວດຈະບັນເທົາລົງໄດ້ຖ້າໄດ້ກິນອາຫານດື່ມນົມຫລືກິນຢາລົດກົດ
ອາການແຊກຊ້ອນ
ພະຍາດກະເພາະຖ້າໄດ້ຮັບການປິ່ນປົວແລະເບິ່ງແຍງຕົນເອງໃຫ້ຖືກຕ້ອງສ່ວນໃຫຍ່ເປັນແລ້ວຈະເຊົາ ແຕ່ຖ້າບໍ່ໄດ້ຮັບການເບິ່ງແຍງຮັກສາທີ່ຖືກຕ້ອງຈົນມີອາການຫລາຍແລະຊຳເຮື້ອອາດເກີດພາວະແຊກຊ້ອນທີ່ເປັນອັນຕະລາຍແກ່ຊີວິດໄດ້ເຊັ່ນ
-ເລືອດອອກໃນກະເພາະອາຫານໂດຍສັງເກດໄດ້ຈາກມີຖ່າຍອຸດຈາລະສີດຳຫລືຮາກເປັນເລືອດຫລືຮາກມີລັກສະນະຄືຜົງກາເຟບົດປົນຢູ່
-ກະເພາະລຳໄສ້ເປັນບາດແຜຊອດໂດຍສັງເກດໄດ້ຈາກມີອາການເຈັບທ້ອງຮຸນແຮງທັນທີໜ້າທ້ອງແຂງ ກົດເຈັບ
-ກະເພາະລຳໄສ້ຕີບຕັນໂດຍສັງເກດໄດ້ຈາກມີອາການເຈັບທ້ອງກິນອາຫານໄດ້ຫນ້ອຍ,ອີ່ມໄວແລະຮາກເປັນອາຫານທີ່ບໍ່ຍ່ອຍຫລັງກິນອາຫານ
ການເບິ່ງແຍງຕົນເອງ
- ກິນອາຫານໃຫ້ກົງເວລາ
2. ກິນອາຫານອ່ອນທີ່ຍ່ອຍງ່າຍແລະຄວນຫຍ້ຳອາຫານໃຫ້ລະອຽດ
3.ຫລີກລ້ຽງສິ່ງລະຄາຍເຄືອງຕໍ່ກະເພາະອາຫານເຊັ່ນ:ຢາຊຸດ,ຢາແກ້ປວດຂໍ້,ຢາແກ້ປວດແອດໄພລິນ ຢາທີ່ມີເຕຍລອຍ,ອາຫານລົດຈັດ,ເຄື່ອງດື່ມທີ່ມີແອວກໍຮໍ,ອາຫານຫລືເຄື່ອງດື່ມທີ່ມີຄາເຟອີນເຊັ່ນ:ຊັອກໂກແລດ,ຊາ,ກາເຟເປັນຕົ້ນ
4.ງົດສູບຢາ
5.ອາຫານທີ່ກິນໃນແຕ່ລະມື້ບໍ່ຄວນມີປະລິມານຫລາຍເກີນໄປ
6.ຖ້າຄຽດພະຍາຍາມຫລຸດຄວາມຄຽດເຊັ່ນ:ເບິ່ງຮູບເງົາ,ຟັງເພງ,ເຮັດສະໝາທິ,ການເຝິກຜ່ອນຄາຍກ້າມຊີ້ນເປັນຕົ້ນ
7.ໝັ່ນອອກກຳລັງກາຍ
8.ກິນຢາລົດກົດຢານ້ຳ1 – 2 ບ່ວງຫລືຢາເມັດ1-2 ເມັດ(ຫຍ້ຳກ່ອນກືນ)ມື້ລະ 4 ເທື່ອເຊົ້າ,ສວາຍ,ແລງຫລັງອາຫານ1ຊົ່ວໂມງແລະກ່ອນນອນກໍລະນີມີອາການເຈັບທ້ອງກ່ອນເວລາຢາສາມາດກິນເພີ່ມໄດ້ແລະຄວນກິນຢາຕິດຕໍ່ກັນດົນຢ່າງນ້ອຍ4-8ອາທິດ
9.ຖ້າປະຕິບັດຕາມນີ້ແລ້ວອາການບໍ່ດີຂຶ້ນຄວນໄປພົບແພດໝໍທີ່ໂຮງໝໍເພື່ອການກວດພິຈາລະນາທີ່ແນ່ນອນ
10.ກິນຢ່າງສະໝໍ່າສະເໝີຕາມທີ່ແພດໝໍແນະນຳ