ລັດຖະບານຈີນ ແລະ ອົດສະຕາລີ ລົງນາມຂໍ້ຕົກລົງການຄ້າເສລີ ສະບັບປະຫວັດສາດ ເຊິ່ງໃຊ້ເວລາເຈລະຈາກັນຍາວນານເຖິງ 10 ປີ ພ້ອມຄາດຂໍ້ຕົກລົງດັ່ງກ່າວ ຈະກະຕຸ້ນການການສ້າງຕຳແໜ່ງງານໃໝ່ ຕະຫລອດຮອດທຳລາຍກຳແພງພາສີສິນຄ້າຫລາກຫລາຍປະເພດ ຂອງທັງສອງຝ່າຍ.

ສຳນັກຂ່າວຕ່າງປະເທດ ລາຍງານໃນວັນທີ 17 ມິຖຸນານີ້ວ່າ ທ່ານ ແອນດຣູ ຣັອບ ລັດຖະມົນຕີວ່າການກະຊວງການຄ້າອົດສະຕາລີ ແລະ ທ່ານ ເກົາ ຫູເສິງ ລັດຖະມົນຕີວ່າການກະຊວງການຄ້າຂອງຈີນ ໄດ້ຮ່ວມກັນລົງນາມໃນພິທີເຊັນສັນຍາ ຂໍ້ຕົກລົງການຄ້າເສລີລະຫວ່າງ ຈີນ ແລະ ອົດສະຕາລີ ໃນມື້ວັນທີ 17 ມິຖຸນານີ້ ທີ່ນະຄອນຫລວງແຄນເບີຣາ ຂອງປະເທດອົດສະຕາລີ ເຊິ່ງຖືເປັນຄວາມສຳເລັດທີ່ຈົບງາມ ແລະ ມີຄວາມສຳຄັນທາງປະຫວັດສາດ ເພາະໃຊ້ເວລາໃນການເຈລະຈາ ເຊິ່ງກິນເວລາຍາວນານເຖິງ 10 ປີ.

ພາຍໃຕ້ເງື່ອນໄຂຂອງຂໍ້ຕົກລົງການຄ້າເສລີດັ່ງກ່າວ ສິນຄ້າກ່ວາ 85% ຂອງອົດສະຕາລີ ຈະສາມາດເຂົ້າໄປຂາຍທີ່ຕະຫລາດຈີນໄດ້ ໂດຍການຍົກເວັ້ນພາສີ ແລະ ຈະຄ່ອຍໆເພີ່ມຂຶ້ນຈົນເຖິງ 95% ໃນອີກບໍ່ເທົ່າໃດປີຂ້າງໜ້າ, ສ່ວນອົດສະຕາລີ ຈະຍົກເລີກພາສີນຳເຂົ້າ 5% ສຳລັບເຄື່ອງເອເລັກໂຕຣນິກ ແລະ ເຊື່ອງໃຊ້ໃນຄົວເຮືອນຂະໜາດໃຫຍ່ຈາກຈີນ ພ້ອມທັງຈີນມີສິດໄດ້ຮັບສຳປະທານການລົງທຶນຕ່າງໆໃນປະເທດອົດສະຕາລີ ຕື່ມອີກດ້ວຍ.