ສຳນັກຂ່າວຕ່າງປະເທດ ລາຍງານໃນວັນທີ 16 ມິຖຸນາຜ່ານມານີ້ວ່າ ຫລຽດນາມໄດ້ສົ່ງອອກໝາກລິນຈີ່ ງວດທຳອິດໄປຍັງອົດສະຕາລີແລ້ວ ຈຳນວນ 3 ໂຕນ ໂດຍທ່ານ ຮິວ ໂບໂຣແມນ ເອກອັກຄະລັດຖະທູດອົດສະຕາລີປະຈຳຫວຽດນາມ ໄດ້ລະບຸວ່າ ມີຄວາມຍິນດີເປັນຢ່າງຍິ່ງ ທີ່ຕະຫລາດອົດສະຕາລີ ຈະໄດ້ເປີດຮັບໝາກລິນຈີ່ຈາກຫວຽດນາມ ໂດຍສິນຄ້າງວດທຳອິດ ໄດ້ເດີນທາງມາເຖິງເມືອງເມເບິ້ນ ໃນມື້ວັນທີ 12 ມິຖຸນາຜ່ານມາ ແລະ ກຳລັງຈະກະຈາຍລົງໄປຢູ່ໃນກະຕ່າ ຕາມຮ້ານສັບພະສິນຄ້າຂອງຊາວອົດສະຕາລີໃນໄວໆນີ້.

ທັງນີ້ ຜົນຜະລິດໝາກລິນຈີ່ຂອງຫວຽດນາມ ແມ່ນປູກຫລາຍທີ່ສຸດໃນແຂວງບັກຊາງ ແລະ ແຂວງຫາຍເຊືອງ ເຊິ່ງຄາດວ່າໃນປີນີ້ ຈະມີຜົນຜະລິດເຖິງ 200,000 ໂຕນ ຕາມການລະບຸຂອງກະຊວງການຄ້າຫວຽດນາມ ໂດຍໃນຈຳນວນດັ່ງກ່າວ 60% ຫລື 120,000 ໂຕນ ແມ່ນຈະເປັນການບໍລິໂພກພາຍໃນປະເທດ ສ່ວນທີ່ເຫລືອອີກ 80,000 ໂຕນ ແມ່ນຈະສົ່ງອອກຂາຍ ໂດຍຈີນເປັນລູກຄ້າຮັບຊື້ລາຍໃຫຍ່.