ພິທີໄດ້ຈັດຂື້ນຢູ່ທີ່ຫ້ອງປະຊຸມສະໂມສອນຂອງພະແນກສຶກສາທິການ ແລະ ກິລາແຂວງອຸດົມໄຊ ໃນວັນທີ 11 ມີຖຸນາ 2015 ນີ້, ເພື່ອທົບທວນຄືນກ່ຽວກັບການຈັດຕັ້ງປະຕິບັດບັນດາກິດຈະກໍາຕ່າງໆ ໂຄງການການສຶກສາຂັ້ນພື້ນຖານໃນໄລຍະເຄີ່ງສະໄໝ ແລະ ວາງທິດທາງແຜນການ ປະຈໍາປີ 2015-2016
ເຂົ້າຮ່ວມມີ ທ່ານ ໂອວາດ ຈັນທະວົງ ຄະນະປະຈໍາພັກແຂວງ ຫົວໜ້າພະແນກສືກສາທິການ ແລະ ກິລາ, ທ່ານ ສົມໄຊ ອິນທະສອນ ຜູ້ຈັດການອົງການແພລນ, ທ່ານ ນິກ ໄອແອນສັນ ທີ່ເປິກສາອົງການແພລນປະຈໍາລາວ, ທ່ານ ພຸດທາ ຄໍາພັນທອງ ຫົວໜ້າໂຄງການການສຶກສາຂັ້ນພື້ນຖານອົງການແພລນປະຈໍາແຂວງອຸດົມໄຊ, ວິຊາການຜູ້ຮັບຜິດຊອບວຽກງານໂຄງການນີ້ຈາກກະຊວງສຶກສາ ທິການ ແລະ ກິລາ, ພ້ອມດ້ວຍຄະນະຮັບຜິດຊອບໂຄງການຂັ້ນແຂວງ ແລະ ບັນດາເມືອງເປົ້າໝາຍຂອງໂຄງການ 2 ເມືອງຄື: ເມືອງຮຸນ ແລະ ເມືອງປາກແບງ ເຂົ້າຮ່ວມນໍາ.
ທ່ານ ນາງ ຫວັດມະນີ ສ້ອຍວຽງວົງ ຮອງຫົວໜ້າຂະແໜງປະຖົມ-ອະນຸບານພະແນກສຶກສາທິການ ແລະ ກິລາໄດ້ຂື້ນຜ່ານຈຸດປະສົງ ແລະ ວາລະດໍາເນີນກອງປະຊຸມ, ຈາກນັ້ນທ່ານ ໂອວາດ ຈັນທະວົງ ກໍໄດ້ມີຄໍາຄິດຄໍາເຫັນ ເຊິງທ່ານໄດ້ຍົກໃຫ້ເຫັນພາລະບົດບາດຂອງອົງການແພລນຕໍ່ກັບການພັດທະນາການສຶກສາ ເປັນຕົ້ນແມ່ນໄດ້ຊ່ວຍເຮັດໃຫ້ຍຸດທະສາດການສຶກສາຂັ້ນປະຖົມແບບບັງຄັບຍັບເຂົ້າໃກ້ກັບຜົນສໍາເລັດເທື່ອລະກ້າວ, ອັດຕາເຂົ້າຮຽນສຸດທິ, ອັດຕາເລື່ອນຂັ້ນ, ຈົບຊັ້ນເພີ່ມຂື້ນ, ອັດຕາຄ້າງຫ້ອງ ແລະ ປະລະການຮຽນຫຼຸດລົງ ພ້ອມທັງສ້າງຄວາມເຂັ້ມແຂງ ໃຫ້ຜູ້ບໍລິຫານການສຶກສາຂັ້ນແຂວງ, ຂັ້ນເມືອງ ແລະ ຂັ້ນໂຮງຮຽນ ຂອງເມືອງເປົ້າໝາຍໂຄງການ, ເຫັນວ່າມີໝາກຜົນດີຂື້ນ ແລະ ໃນຕໍ່ໜ້າໂຄງການນີ້ຍັງຈະໄດ້ເພີ່ມເມືອງງາເຂົ້າມາເປັນເປົ້າໝາຍໃໝ່ຂອງໂຄງການຕື່ມອີກ, ທັງຮຽກຮ້ອງໃຫ້ຜູ້ເຂົ້າຮ່ວມຊ່ວຍກັນປະກອບຄໍາຄິດຄໍາເຫັນ ແລະ ວາງທິດທາງແຜນການຮ່ວມກັນເພື່ອເຮັດໃຫ້ການຈັດຕັ້ງປະຕິບັດວຽກງານຂອງໂຄງການໃນຕໍ່ໜ້າໃຫ້ໄດ້ຮັບຜົນດີ.
ທ່ານ ນິກ ໄອແອນສັນ ລາຍງານຜົນການປະເມີນການຈັດຕັ້ງປະຕິບັດກິດຈະກໍາການສົ່ງເສີມການສຶກສາຂັ້ນພື້ນຖານຂອງອົງການແພລນທີ່ໄດ້ຈັດຕັ້ງປະຕິບັດຢູ່ 2 ເມືອງເປົ້າໝາຍຍົກໃຫ້ເຫັນຈຸດດີຜົນງານຫຼາຍດ້ານ.
ຈາກນັ້ນ, ແຕ່ລະເມືອງໄດ້ຜັດປ່ຽນກັນຂື້ນຜ່ານບົດລາຍງານ ການຈັດຕັ້ງປະຕິບັດຂອງຕົນໃນໄລຍະຜ່ານມາ ແລະ ສົນທະນາຮ່ວມກັນໃນກິດຈະກໍາທີ່ຕົນໄດ້ຈັດຕັ້ງປະຕິບັດຜ່ານມາ ເປັນຕົ້ນແມ່ນ:
– ສົ່ງເສີມ ບົດບາດຍິງ-ຊາຍ ໃຫ້ເດັກໄດ້ເຂົ້າເຖິງການສຶກສາ ແລະ ປູກຈິດສຳນຶກ.
– ປັບປຸງຄຸນນະພາບການຮຽນ-ການສອນ.
– ປັບປຸງຄຸນນະພາບການບໍລິຫານ ແລະ ຄວາມສອດຄ່ອງ.
-ສະໜອງອຸປະກອນຮັບໃຊ້ຈໍານວນໜຶ່ງເພື່ອເພີ່ມປະສິດທິພາບໃຫ້ກັບວຽກງານຂອງໂຄງການ
– ການອອກຂ່າວວິທະຍຸກະຈາຍສຽງ (ລາຍການໄວໜຸ່ມພາກພາສາມົ້ງ ແລະ ກຶມມຸ)
ໃນກອງປະຊຸມຜູ້ເຂົ້າຮ່ວມໄດ້ ຈັດແບ່ງອອກເປັນກຸ່ມເພື່ອຊ່ວຍກັນຄົ້ນຄວ້າປະກອບຄໍາຄິດຄໍາເຫັນແລກປ່ຽນບົດຮຽນ ແລະ ວາງທິດທາງແຜນການຮ່ວມກັນ ໃນການກະກຽມຈັດຕັ້ງປະຕິບັດບັນດາກິດຈະກໍາຕ່າງໆ ຂອງໂຄງການໃນ ປີ 2015-2016, ເພື່ອເຮັດໃຫ້ການຈັດຕັ້ງປະຕິບັດວຽກງານຂອງໂຄງການດໍາເນີນໄປດ້ວຍດີ ແລະ ມີປະສິດທິພາບດີຂື້ນໃນຕໍ່ໜ້າ, ກອງປະຊຸມຄັ້ງນີ້ດໍາເນີນໄປໃຊ້ເວລາ 2 ວັນ ຮອດວັນທີ 12 ມີຖຸນາ ຈຶ່ງສໍາເລັດ.
