ເປັນໄປຕາມຄາດໝາຍທີ່ວາງໄວ້ ກັບຜົນງານຂອງທັບນັກກິລາທີມຊາດລາວ ຊຸດຊີເກມ ຄັ້ງທີ 28 ທີ່ຕົກຮອບເປັນທີ່ຮຽບຮ້ອຍ ເຖິງແມ່ນວ່າ ຈະສາມາດເອົາຊະນະ ຕີມໍ ເລສເຕ 3-2 ປະຕູ ແລະ ບຣູໄນ 2-1 ປະຕູ ໄປແບບຫວຸດຫວິດ ກໍ່ຕາມ ແຕ່ກໍ່ຖືວ່າ ຜົນງານຂ້ອນຂ້າງທີ່ຈະດີ ເມື່ອມີເຖິງ 6 ຄະແນນ ແລະ ຍັງເຫຼືອອີກ 1 ນັດ ທີ່ຈະພົບກັບ ມາເລເຊຍ ໃນວັນທີ 11 ມິຖຸນານີ້ ຖ້າເອົາຊະນະໄດ້ ກໍ່ຄືຈະກັບບ້ານດ້ວຍຄວາມພາກພູມໃຈ ທີ່ສ້າງຜົນງານດີສົມຄວນເຖິງແມ່ນຈະຕົກຮອບກໍ່ຕາມ, ແຕ່ກົງກັນຂ້າມໃນມື້ດຽວກັນທີມຊາດລາວ ຊຸດໃຫຍ່ ກໍ່ກຽມຈະລົງສູ່ສະໜາມນັດທຳອິດ ພົບກັບ ທີມຊາດມຽນມາ ໃນການແຂ່ງຂັນເຕະບານໂລກ 2018 ຮອບຄັດເລືອກ ໂຊນເອເຊຍ ກຸ່ມ G
ສຳລັບ ຕາຕະລາງແຂ່ງຂັນຂອງທີມຊາດລາວ ຊຸດເຕະບານໂລກ 2018 ຮອບຄັດເລືອກ ໂຊນເອເຊຍ ກຸ່ມ G ປະກອບມີ ໃນວັນທີ 11 ມິຖຸນາ 2015 ທີ່ສະໜາມກິລາແຫ່ງຊາດ (ຫຼັກ16) ສປປ ລາວ ພົບກັບ ມຽນມາ ເວລາ 19:00 ໂມງ, ໃນວັນທີ 16 ມິຖຸນາ 2015 ທີ່ສະໜາມກິລາແຫ່ງຊາດ (ຫຼັກ16) ສປປ ລາວ ພົບກັບ ເລບານອນ ເວລາ 19:00 ໂມງ, ໃນວັນທີ 3 ກັນຍາ 2015 ທີ່ສະໜາມກິລາແອນສັນ ສ ເກົາຫຼີ ສປປ ລາວ ພົບກັບ ສ ເກົາຫຼີ ເວລາ 20:00 ໂມງ, ໃນວັນທີ 8 ກັນຍາ 2015 ທີ່ສະໜາມກິລາແຫ່ງຊາດ (ຫຼັກ16) ສປປ ລາວ ພົບກັບ ຄູເວດ ເວລາ 19:00 ໂມງ, ໃນວັນທີ 13 ຕຸລາ 2015 ສປປ ລາວ ພົບກັບ ມຽນມາ (ບໍ່ລະບຸສະໜາມ ແລະ ເວລາ ເຈົ້າບ້ານຂອງມຽນມາ), ໃນວັນທີ 12 ພະຈິກ 2015 ທີ່ສະໜາມກິລາຄາມິລເລ ຊາມຸນ ເລບານອນ ສປປ ລາວ ພົບກັບ ເລບານອນ ເວລາ 17:00 ໂມງ, ໃນວັນທີ 17 ພະຈິກ 2015 ທີ່ສະໜາມກິລາແຫ່ງຊາດ (ຫຼັກ16) ສປປ ລາວ ພົບກັບ ສ ເກົາຫຼີ ເວລາ 19:00 ໂມງ ແລະ ໃນວັນທີ 24 ມີນາ 2015 ທີ່ສະໜາມກິລາອາ-ຮາມາດິ ຄູເວດ ສປປ ລາວ ພົບກັບ ຄູເວດ ເວລາ18:35 ໂມງ, ເຊິ່ງເຊື່ອວ່າຜົນງານຂອງທີມຊາດລາວ ຈະດີກວ່າຕອນອຸ່ນເຄື່ອງ ເມື່ອລົງສະໜາມແຂ່ງຂັນຕົວຈິງ.
