ມື້ວັນທີ 7 ມິຖຸນາ 2015 ທີ່ຜ່ານມາ ປະຊາຊົນ ບ້ານຫົວຊ້າງ ເມືອງນາຊາຍທອງ ນະຄອນຫຼວງວຽງຈັນ ໄດ້ຂຸດດິນແລ້ວພົບພະພຸດທະຮູບ ໂລຫະເງິນ ຈຳນວນຫຼາຍກວ່າ 40 ອົງ ແລ້ວໄດ້ອັງເຊີນເຂົ້າມອບໃຫ້ພະອາຈານ ປະຈຳວັດບ້ານຫົວຊ້າງ ເພື່ອກວດກາແລະເກັບຮັກສາ.
ຕາມການສັນນິຖານຂອງພະສົງ ແລະເຖົ້າແກ່ແນວໂຮມບ້ານ ເວົ້າວ່າພະພຸດທະຮູບຈຳນວນດັ່ງກ່າວ ແມ່ນມີອາຍຸຫຼາຍກວ່າ 100 ປີ ຫຼືອາດຈະແມ່ນສະໄໝວຽງຈັນຖືກ ຮຸກຮານຈາກສັກດິນາຕ່າງດ້າວ ແລ້ວຜູ້ຮັກສາຫຼືວັດໃນສະໄໝນັ້ນ ເອົາໄປຊຸກເຊື່ອງໄວ້ ໂດຍການຝັງດິນເອົາໄວ້.
ທ່ານ ຄູນມີ ຣາດຊະພົນ ຫົວໜ້າຫ້ອງການຖະແຫລງຂ່າວວັດທະນະທໍາ ແລະ ທ່ອງທ່ຽວ ເມືອງນາຊາຍທອງໄດ້ເປີດເຜີຍໃນວັນທີ 8 ມິຖຸນາ 2015 ວ່າ: ການພົບເຫັນພຣະພຸດນັ້ນແມ່ນເລື່ອງແທ້ ປັດຈຸບັນນີ້ພວກເຮົາໄດ້ເຄື່ອນຍ້າຍພຣະພຸດທະຮູບທັງໝົດໄປໄວ້ຢູ່ສະຖານທີ່ປອດໄພແລ້ວ.
ແນວໃດກໍຕາມ, ສ່ວນລາຍລະອຽດນັ້ນ ທາງພາກສ່ວນທີ່ກ່ຽວຂ້ອງຈະໄດ້ທຳການສຶກສາຄົ້ນຄວ້າເບິ່ງຕື່ມອີກ
