ໃນເວລາ 06:15 ໂມງ ຂອງວັນທີ 5 ມິຖຸນາ 2015 ນີ້ ຕາມເວລາໃນທ້ອງຖິ່ນ ໄດ້ເກີດແຜ່ນດິນໄຫວຂະໜາດ 6.0 ທີ່ເກາະບໍນຽວ ລັດຊາບາ ປະເທດມາເລເຊຍ ໂດຍບໍ່ມີເຕືອນໄພສຶນາມິ ແລະ ຍັງບໍ່ມີລາຍງານຄວາມເສຍຫາຍ.
ສຳນັກຂ່າວຕ່າງປະເທດ ລາຍງານໃນຕອນເຊົ້າຂອງມື້ນີ້ (5 ມິຖຸນາ) ວ່າ ສຳນັກງານທໍລະນີວິທະຍາຂອງສະຫະລັດອາເມຣິກາ ຫລື USGS ໄດ້ລາຍງານວ່າ ເກີດເຫດແຜ່ນດິນໄຫວທີ່ມາເລເຊຍ ຂະໜາດ 6.0 ແມັກນິຈູດ ທີ່ຄວາມເລິກຈາກຜິວໂລກລົງໄປປະມານ 10 ກິໂລແມັດ ໂດຍມີຈຸດສູນກາງຢູ່ຫ່າງຈາກເມືອງ Ranau ໄປປະມານ 19 ກິໂລແມັດ ແລະ ຫ່າງຈາກເມືອງໂຄຕາລິນາບາລູ ໃນລັດຊາບາ ໄປ 54 ກິໂລແມັດ.
ຈົນຮອດໃນຂະນະນີ້ ແມ່ນຍັງບໍ່ທັນມີລາຍງານຄວາມເສຍຫາຍ ທີ່ເກີດຈາກເຫດແຜ່ນດິນໄຫວດັ່ງກ່າວນີ້ເທື່ອ.