ແສງແດດແລະອາກາດທີ່ຮ້ອນຂຶ້ນທຸກມື້ມີຜົນກະທົບໂດຍກົງຕໍ່ຜິວໜັງຂອງເຮົາທັງບັນຫາຜິວແຫ້ງຄໍ້າຜິວແດງ,ຜິວໄໝ້,ໄປຈົນເຖິງບັນຫາໃຫຍ່ກໍ່ຄືມະເຮັງຜິວໜັງການຫລີກລ້ຽງແລະປ້ອງກັນແສງແດດແລະແສງຢູວີຈຶ່ງເປັນເລື່ອງທີ່ບໍ່ຄວນເບິ່ງຂ້າມ
ປະຈຸບັນນອກຈາກຈະມີຜະລິດຕະພັນບຳລຸງຜິວແລະປ້ອງກັນແດດຕ່າງໆມາໃຫ້ເລືອກກັນແລ້ວຍັງມີງານວິໄຈທາງວິທະຍາສາດທີ່ສາມາດຢືນຢັນໄດ້ວ່າການກິນອາຫານທີ່ມີສານຕ້ານອານຸມູນອິດສະຫລະໃນປະລິມານທີ່ເໝາະສົມຈະຊ່ວຍໃຫ້ຮ່າງກາຍຕໍ່ຕ້ານກັບແສງແດດໄດ້ດີຍິ່ງຂຶ້ນແລະຊ່ວຍປ້ອງກັນຜິວ ໄໝ້ຈາກແສງແດດໄດ້ໂດຍສະເພາະອາຫານທີ່ມີເບຕາ,ແຄໂລທີນ(beta-carotene) ສູງຊຶ່ງພົບຫລາຍໃນຜັກໃບຂຽວ,ກາລົດ,ໝາກເພັດຫມາກໄມ້ສີເຫລືອງກໍ່ຄືໝາກມ່ວງ,ໝາກໂມ,ໂດຍຈະໃຫ້ປະສິດທິພາບດີຖ້າມີການກິນອາຫານທີ່ມີເບຕ້າ,ແຄໂລທີນສູງເຫລົ່ານີ້ຕໍ່ເນື່ອງກັນຢ່າງນ້ອຍ10ອາທິດຂຶ້ນໄປ
ສ່ວນສານໄລໂຄປີນ(lycopene) ກໍເປັນສານອີກໂຕໜຶ່ງໃນກຸ່ມແຄໂລທີນອຍ(carotenoid) ຊຶ່ງນອກຈາກຈະເປັນສານຕ້ານມະເຮັງແລ້ວຖ້າກິນຕໍ່ເນື່ອງ3ເດືອນຂຶ້ນໄປກໍຈະເຫັນຜົນດີີໃນການຊ່ວຍປ້ອງກັນຜິວໄໝ້ຈາກແສງແດດຊຶ່ງສານໄລໂຄປີນນີ້ພົບຫລາຍໃນໝາກເລັ່ນແລະໝາກເຂົ້າ
ໝາກເຂົ້າ
ສ່ວນໝາກເຂົ້ານັ້ນເປັນຫມາກໄມ້ທີ່ອຸດົມດ້ວຍໄລໂຄປີນຊຶ່ງມີປະລິມານສູງກວ່າໝາກເລັ່ນເຖິງ12ເທົ່າ ແລະມີສານໃນກຸ່ມແຄໂລທີນອຍເຊັ່ນ:ເບຕາ,ແຄໂລທີນຫລາຍກວ່າກາລົດ10ເທົ່າມີວິຕາມິນCຫລາຍກວ່າໝາກກ້ຽງ40ເທົ່າມີຊີແຊນທີນຫລາຍກວ່າສາລີ40ເທົ່າອຸດົມດ້ວຍວິຕາມິນEວິຕາມິນAກົດໄຂມັນໂອເມກ້າ3ໂອເມກ້າ6ແລະໂອເມກ້າ9ມີສານຕ້ານອານຸມູນອິດສະຫລະໃນປະລິມານສູງຊ່ວຍເສີມສ້າງພູມຄຸ້ມກັນໃຫ້ກັບຮ່າງກາຍຊ່ວຍໃນການຊະລໍໄວປ້ອງກັນການເກີດຮອງຮອຍແຫ່ງໄວປ້ອງກັນບັນຫາຜິວແຫ້ງຫຍາບລວມທັງຊ່ວຍປົກປ້ອງຜິວຈາກແສງແດດ
ນອກຈາກນີ້ໃນໝາກເຂົ້າຍັງມີໄລໂຄປີນຊະນິດພິເສດທີ່ເອີ້ນວ່າໄລໂປແຄໂລທີນ (lipocarotene)ຊຶ່ງເປັນກົດໄຂມັນສາຍຍາວທີ່ຊ່ວຍດັກຈັບແລະດູດຊຶມແຄໂລທີນໝາກເຂົ້າຈຶ່ງຈັດເປັນແຫລ່ງຂອງໄລໂຄປີນທີ່ດີທີ່ສຸດ
ສຳລັບການກິນໝາກເລັ່ນຫລືໝາກເຂົ້ານັ້ນແນະນຳໃຫ້ກິນໝາກເລັ່ນຫລືໝາກເຂົ້າທີ່ຜ່ານຄວາມຮ້ອນ ຊຶ່ງຈະມີປະລິມານໄລໂຄປີນສູງກວ່າໃນໝາກສົດເນື່ອງຈາກຄວາມຮ້ອນຈະເຮັດໃຫ້ຈຸລັງໝາກເລັ່ນຫລື ໝາກເຂົ້າແຕກສ່ວນການບົດກໍຈະຍິ່ງເຮັດໃຫ້ໄລໂຄປີນອອກມານອກຈຸລັງໄດ້ຫລາຍຂຶ້ນແລະສານໄລໂຄປີນໃນທຳມະຊາດເມື່ອຖືກຄວາມຮ້ອນຮ່າງກາຍຈະສາມາດດູດຊຶມໄດ້ງ່າຍຂຶ້ນ
ຢ່າງໃດກໍຕາມຄວາມຮ້ອນທີ່ໃຊ້ປຸງຈະຕ້ອງບໍ່ສູງຫລາຍແລະບໍ່ໃຊ້ຄວາມຮ້ອນເປັນເວລາດົນເກີນໄປ ເພາະຈະເຮັດໃຫ້ໄລໂຄປີນລະລາຍໄປນັ້ນເອງ
ນອກຈາກນີ້ຍັງມີຜັກຫມາກໄມ້ອື່ນໆທີ່ອຸດົມໄປດ້ວຍໄລໂຄປີນເຊັ່ນ
ໝາກໂມ1ປ່ຽງ(286 ກຣາມ)ມີໄລໂຄປີນ12, 962ໄມໂຄກຣາມ
ໝາກຫຸ່ງ1ໜ່ວຍ(304 ກຣາມ)ມີໄລໂຄປີນ5, 557ໄມໂຄກຣາມ
ໝາກມ່ວງ1ໜ່ວຍ(207 ກຣາມ)ມີໄລໂຄປີນ 6ໄມໂຄກຣາມ
ກາລົດ1ໜ່ວຍ(72 ກຣາມ)ມີປະລິມານໄລໂຄປີນ1ໄມໂຄກຣາມ
ໝາກເລັ່ນ
ໝາກເລັ່ນອຸດົມໄປດ້ວຍວິຕາມິນແລະແຮ່ທາດຫລາຍຊະນິດເຊັ່ນ:ວິຕາມິນCວິຕາມິນAວິຕາມິນKວິຕາມິນBວິຕາມິນB1ວິຕາມິນB2ແຄຊຽມ,ຟອດຟໍລັດ,ທາດເຫລັກແລະມີສານຈຳພວກໄລໂຄປີນ,ແຄໂລທີນອຍ,ເບຕ້າ,ແຄໂລທີນແລະກົດອະມິໂນເປັນຕົ້ນ
ໝາກເລັ່ນມີສັບພະຄຸນຊ່ວຍບຳລຸງຜິວພັນໃຫ້ຊຸ່ມຊື່ນສົດໃສ,ບໍ່ແຫ້ງຫຍາບ,ມີສານຕ້ານອານຸມູນອິດສະຫລະທີ່ຊ່ວຍຫລຸດແລະການເກີດຮ່ອງຮອຍແຫ່ງໄວມີການສຶກສາພົບວ່າການກິນໝາກເລັ່ນມື້ລະ 48-55ກຣາມຫລືປະມານ3ບ່ວງຫລືກິນນ້ຳໝາກເລັ່ນມື້ລະ250ຊີຊີຕໍ່ເນື່ອງກັນຢ່າງນ້ອຍ10ອາທິດຂຶ້ນໄປຈະຊ່ວຍເພີ່ມປະລິມານສານແຄໂລທີນອຍໃນຜິວໜັງແລະອາການແດງຂອງຜິວໜັງຫລັງຈາກຖືກແສງແດດຈະຫນ້ອຍກວ່າກຸ່ມທີ່ບໍ່ກິນຊອດ ໝາກເລັ່ນເຖິງ 33%
ນອກຈາກນີ້ຍັງພົບວ່າກຸ່ມທີ່ກິນໝາກເລັ່ນແສງແດດຈະທຳລາຍໂມເລກຸນຂອງDNAໃນຜິວໜັງຫນ້ອຍກວ່າກຸ່ມທີ່ບໍ່ໄດ້ກິນແລະມີການສ້າງprocollagenຫລາຍກວ່າກຸ່ມທີ່ບໍ່ໄດ້ກິນ
ຊາຂຽວ
ຊາຂຽວມີສານຕ້ານອານຸມູນອິດສະຫລະຊື່ໂພລີຟີນອນ(pholyphenols)ຊຶ່ງສາມາດຊ່ວຍປົກປ້ອງຜິວໜັງບໍ່ໃຫ້ຖືກທຳລາຍຈາກລັງສີຢູວີໄດ້ໂດຍຮ່າງກາຍສາມາດຮັບໂພລີຟີນອນໄດ້ທັງຈາກການດື່ມແລະການທາຄີມທີ່ມີສ່ວນປະສົມຂອງຊາຂຽວແລະຍັງມີງານວິໄຈພົບວ່າໂພລີຟີນອນສາມາດປ້ອງກັນມະເຮັງຜິວໜັງໄດ້ນໍາອີກ
ຢ່າງໃດກໍຕາມການກິນອາຫານເປັນພຽງວິທີການໜຶ່ງທີ່ຈະຫລຸດຄວາມສ່ຽງຂອງການທີ່ຜິວໜັງຖືກທຳລາຍຈາກຄວາມຮ້ອນຂອງແສງແດດດັ່ງນັ້ນການທາຄີມກັນແດດຍັງຄົງມີຄວາມຈຳເປັນທີ່ຈະຕ້ອງໃຊ້ເພື່ອເສີມປະສິດທິພາບໃນການປ້ອງກັນແສງແດດໃຫ້ດີທີ່ສຸດຄຽງຄູ່ໄປກັບການປະຕິບັດໂຕຄືຫລີກລ້ຽງແສງແດດໂດຍສະເພາະໄລຍະເວລາ10.00-16.00 ໂມງຊຶ່ງເປັນໄລຍະທີ່ແດດແຮງຫລືໃສ່ອຸປະກອນປ້ອງກັນແສງແດດໃນທຸກເທື່ອທີ່ມີຄວາມຈຳເປັນຕ້ອງອອກແດດ