ການນອນຫລັບເປັນການພັກຜ່ອນທີ່ດີທີ່ສຸດແຕ່ສະພາບສັງຄົມທີ່ມີບັນຫາອາດເຮັດໃຫ້ເກີດຄວາມຄຽດອາການນອນບໍ່ຫລັບຈຶ່ງເປັນໜຶ່ງໃນບັນຫາສຸຂະພາບຂອງຄົນເຮົາໃນປະຈຸບັນແລະມີທ່າອ່ຽງທີ່ຈະເພີ່ມຂຶ້ນຈົນຕ້ອງອາໃສຢານອນຫລັບຊຶ່ງເປັນອັນຕະລາຍຕໍ່ຮ່າງກາຍການປິ່ນປົວບັນຫາການນອນບໍ່ຫລັບຈະເລີ່ມຕົ້ນດ້ວຍວິທີບໍ່ໃຊ້ຢາກ່ອນໂດຍກຳຈັດເຫດປັດໄຈທີ່ເຮັດໃຫ້ນອນບໍ່ຫລັບປະຕິບັດຕາມສຸຂະອານາໄມການນອນຢ່າງເໝາະສົມສ່ວນການໃຊ້ຢານອນຫລັບນັ້ນບໍ່ໄດ້ປິ່ນປົວອາການນອນບໍ່ຫລັບພຽງແຕ່ຊ່ວຍໃຫ້ອາການບັນເທົາລົງຂະນະໃຊ້ຢາຖ້າພະຍາຍາມແກ້ໄຂສາເຫດລວມເຖິງປັບປ່ຽນພຶດຕິກຳການນອນໃຫ້ເໝາະສົມແລ້ວອາການຍັງບໍ່ດີຂຶ້ນໝໍຈຶ່ງຈະພິຈາລະນາໃຊ້ຢານອນຫລັບຮ່ວມນໍາ
ການໃຊ້ຢານອນຫລັບຈະໃຊ້ພຽງຊົ່ວຄາວໃນໄລຍະເວລາສັ້ນໆເນື່ອງຈາກການໃຊ້ຢາຕໍ່ເນື່ອງເປັນໄລຍະເວລາດົນຈະເຮັດໃຫ້ການຕອບສະຫນອງກັບຢາຫລຸດລົງຕ້ອງເພີ່ມຂະໜາດຢາຫລາຍຂຶ້ນເລື່ອຍໆເພື່ອໃຫ້ນອນຫລັບໄດ້ແລະຍັງເຮັດໃຫ້ເກີດການຕິດຢາຖ້າຢຸດຢາທັນທີອາດມີອາການນອນບໍ່ຫລັບແລະກັງວົນໄດ້ນອກຈາກນັ້ນການໃຊ້ຢານອນຫລັບໃນໄລຍະຍາວຍັງສົ່ງຜົນໃຫ້ຫນ້າທີ່ການເຮັດວຽກງານຂອງສະຫມອງເສື່ອມຖອຍລົງ ອາດເກີດພະຍາດສະຫມອງເສື່ອມໄດ້ໂດຍສະເພາະໃນຜູ້ສູງອາຍຸ
ດັ່ງນັ້ນການໃຊ້ຢານອນຫລັບຈຶ່ງຈຳເປັນຕ້ອງຢູ່ໃນຄວາມເບິ່ງແຍງຂອງໝໍເນື່ອງຈາກການໃຊ້ຢາເກີນຂະໜາດຈະອອກລິດກົດການເຮັດວຽກງານຂອງສະຫມອງທີ່ຄວບຄຸມການຫາຍໃຈເກີດພາວະການຫາຍໃຈລົ້ມເຫລວເປັນອັນຕະລາຍເຖິງແກ່ຊີວິດໄດ້ຢາບາງຊະນິດອອກລິດຍາວຫລັງຈາກຕື່ນນອນແລ້ວບາງຄົນຈະຍັງຮູ້ສຶກຢາກນອນ,ອ່ອນເພຍ ຫລືມຶນງົງເຮັດໃຫ້ເກີດອຸບັດເຫດໄດ້ງ່າຍຂຶ້ນຖ້າຕ້ອງຂັບລົດຫລືເຮັດວຽກກັບເຄື່ອງຈັກ
ສະນັ້ນການໃຊ້ຢານອນຫລັບຄວນຕ້ອງລະມັດລະວັງເປັນພິເສດໂດຍສະເພາະຜູ້ປ່ວຍພະຍາດຕັບ.ຫມາກໄຂ່ຫລັງແລະຜູ້ສູງອາຍຸເພາະຢາອາດສະສົມໃນຮ່າງກາຍໄດ້ຫລາຍຂຶ້ນເກີດຜົນຂ້າງຄຽງໄດ້ຫລາຍກວ່າປົກກະຕິນອກຈາກນັ້ນຄວນຫລີກລ້ຽງການໃຊ້ຢານອນຫລັບໃນຍິງຖືພາໃຫ້ນົມບູດ,ຜູ້ປ່ວຍພະຍາດປອດແລະຜູ້ທີ່ມີພາວະຢຸດຫາຍໃຈຂະນະຫລັບລວມເຖິງຜູ້ທີ່ໃຊ້ຢາອອກລິດກົດປະສາດສ່ວນຜູ້ທີ່ໃຊ້ຢານອນຫລັບຄວນງົດເຄື່ອງດື່ມທີ່ມີແອວກໍຮໍທຸກຊະນິດເນື່ອງຈາກແອວກໍຮໍຈະໄປເສີມລິດອາດກົດການຫາຍໃຈເປັນອັນຕະລາຍເຖິງຊີວິດໄດ້
ຖ້າຈຳເປັນຕ້ອງໃຊ້ຢານອນຫລັບຄວນປະຕິບັດໂຕຕາມສຸຂະອານາໄມໃນການນອນທີ່ດີຮ່ວມນໍາໂດຍຈັດບັນຍາກາດໃນຫ້ອງນອນໃຫ້ນອນສະບາຍ,ບໍ່ມີສິ່ງລົບກວນເຂົ້ານອນແລະຕື່ນນອນໃຫ້ເປັນເວລານອນໃຫ້ເໝາະສົມແລະພຽງພໍຢ່າງໜ້ອຍ6-8ຊົ່ວໂມງຫາວິທີຜ່ອນຄາຍຄວາມຄຽດແລະອອກກຳລັງກາຍຢ່າງສະຫມ່ຳສະເໝີລວມທັງຫລີກລ້ຽງເຄື່ອງດື່ມທີ່ມີຄາເຟອີນ,ງົດສູບຢາ.ຖ້າປະຕິບັດໄປເລື່ອຍໆກໍຈະສາມາດນອນຫລັບໄດ້ດີຂຶ້ນ ໂດຍບໍ່ຈຳເປັນຕ້ອງອາໃສຢານອນຫລັບນໍາອີກ