ພາຍຫລັງເຫດການໄຟໄໝ້ຕະຫລາດເມືອງຄົງເຊໂດນ ເມື່ອຄືນວັນທີ 20 ພຶດສະພາຜ່ານມາ ສົ່ງຜົໃຫ້ມີຜູ້ໄດ້ຮັບຜົນກະທົບ 72 ຄອບຄົວ, ມີຈຳນວນພົນ 234 ຄົນ, ຍິງ 119 ຄົນ, ມີ 60 ຮ້ານ, ມີ 106 ຫ້ອງຄື: ຮ້ານຂາຍຄຳມີ 7 ຮ້ານ, ຂາຍເຄື່ອງຍ່ອຍ 39 ຮ້ານ, ຂາຍເຄື່ອງນຸ່ງຫົ່ມ 9 ຮ້ານ, ຂາຍເຄື່ອງກອງບຸນ 4 ຮ້ານ ແລະ ຂາຍເຄື່ອງໃຊ້ໄຟຟ້າ 1 ຮ້ານ ລວມມູນຄ່າເສຍຫາຍຫລາຍກວ່າ 20 ຕື້ກີບ, ຕໍ່ກັບເຫດການດັ່ງກ່າວ ທາງອຳນາດການປົກຄອງແຂວງ, ເມືອງ ແລະ ພາກສ່ວນກ່ຽວຂ້ອງ ກໍໄດ້ລົງຕິດຕາມຢ່າງໃກ້ຊິດ ແລະ ໃຫ້ການຊ່ວຍເຫລືອໃນເບື້ອງຕົນຕໍ່ຜູ້ທີ່ໄດ້ຮັບຜົນກະທົບເປັນເງິນຈຳນວນໜຶ່ງ ແລະ ໃນວັນທີ 22 ພຶດສະພານີ້, ທ່ານ ສີສຸວັນ ວົງຈອມສີ ຮອງເຈົ້າແຂວງໆສາລະວັນ ໄດ້ລົງກວດກາຕິດຕາມເຫດການດັ່ງກ່າວ ແລະ ໃນໂອກາດນີ້, ປະຊາຊົນທີ່ໄດ້ຮັບຜົນກະທົບໄດ້ສະເໜີຂໍທຶນຮອນໃນເງື່ອນໄຂອັດຕາດອກເບ້ຍຕ່ຳ ແລະ ຂໍ້ຍົກເວັ້ນການເສຍພາສີໃນໄລຍະໜຶ່ງ, ທັງນີ້ເພື່ອເປັນການຕັ້ງໂຕໃໝ່ຂອງຊາວຄ້າຂາຍທີ່ໄດ້ຮັບຜົນກະທົບ ເຊິ່ງບັນຫານີ້ທາງການນຳຂອງເມືອງຈະນຳໄປປຶກສາຫາລືກັບພາກສ່ວນກ່ຽວຂ້ອງເພື່ອຫາວິທີທາງແກ້ໄຂຢ່າງເໝາະສົມ.
ແຫລ່ງຂ່າວ: ລາວພັດທະນາ.