ການໃຊ້ຢານັບເປັນເລື່ອງໃກ້ໂຕແຕ່ກໍມີຄົນຈຳນວນຫລາຍໃຊ້ຢາຢ່າງຜິດວິທີແລະສົ່ງຜົນເສຍຕໍ່ການປິ່ນປົວໂດຍສະເພາະຢ່າງຍິ່ງປະສິດທິພາບໃນການປິ່ນປົວລວມໄປເຖິງສຸຂະພາບຂອງຜູ້ໃຊ້ຢາ
ໃຊ້ຢາປຶກສາໝໍກ່ອນ
ການໃຊ້ຢາຢ່າງຖືກຕ້ອງເປັນເລື່ອງທີ່ຈຳເປັນຢ່າງຍິ່ງໃນການປິ່ນປົວເພາະຖ້າໃຊ້ຢາຢ່າງບໍ່ຖືກຕ້ອງອາດນຳໄປສູ່ໂທດໄດ້
ສຳລັບບັນຫາເລື່ອງການໃຊ້ຢາທີ່ພົບໄດ້ເລື້ອຍກໍຄືການແພ້ຢາການໃຊ້ຢາເກີນຂະໜາດໃຊ້ຢາໃນຂະໜາດທີ່ບໍ່ເໝາະສົມແລະໃຊ້ຢາບໍ່ຖືກກັບພະຍາດໂດຍສ່ວນຫນຶ່ງອາດເກີດຈາກຄວາມເຂົ້າໃຈຜິດຂອງຜູ້ປ່ວຍຊຶ່ງໝໍການຢາຈະມີຫນ້າທີ່ທົບທວນຢາກ່ຽວກັບຂະໜາດຂອງຢາ ວິທີການກິນດັ່ງນັ້ນການປຶກສາໝໍການຢາເລື່ອງການໃຊ້ຢາກໍຈະຊ່ວຍໃຫ້ຜູ້ປ່ວຍໃຊ້ຢາຢ່າງຖືກຕ້ອງເໝາະສົມຫລາຍຍິ່ງຂຶ້ນ
ຫລັກການໃຊ້ຢາແກ້ອັກເສບທີ່ຖືກຕ້ອງ
ກ່ອນໃຊ້ຢາແກ້ອັກເສບສິ່ງທີ່ຕ້ອງປະຕິບັດຄືພິຈາລະນາເຖິງຄວາມຈຳເປັນໃນການໃຊ້ຢາໂດຍຢາແກ້ອັກເສບຈະໃຊ້ໃນກໍລະນີທີ່ມີການຕິດເຊື້ອແບກທີເຣຍແຕ່ມັກມີຄວາມເຂົ້າໃຈຜິດກ່ຽວກັບເລື່ອງນີ້ເຊັ່ນ:ຖ້າມີອາການເຈັບຄໍຊຶ່ງສ່ວນໃຫຍ່ສາເຫດເກີດຈາກການຕິດເຊື້ອໄວຣັສແຕ່ຫລາຍຄົນກໍເລືອກທີ່ຈະຊື້ຢາແກ້ອັກເສບມາໃຊ້ຊຶ່ງຈະນຳໄປສູ່ບັນຫາການລຶ້ງຢາໃນທີ່ສຸດ
ວິທີການເກັບຢາສອດທະວານຢ່າງຖືກຕ້ອງເໝາະສົມ
ສຳລັບຢາບາງໂຕເຊັ່ນຢາສອດທະວານຊຶ່ງຄົນທົ່ວໄປອາດຄິດວ່າສາມາດເກັບເອົາໄວ້ຢູ່ອຸນຫະພູມຫ້ອງໄດ້ແຕ່ເນື່ອງຈາກປະເທດມີອາກາດຮ້ອນຖ້າເກັບໄວ້ບ່ອນອຸນຫະພູມຫ້ອງກໍອາດຈະເຮັດໃຫ້ຢາອ່ອນລົງແລະບໍ່ສາມາດນຳໄປໃຊ້ສອດທະວານໄດ້ດັ່ງນັ້ນຈຶ່ງຄວນເກັບຢາໃສ່ຕູ້ເຢັນໃນຊ່ອງທຳມະດາຊຶ່ງຢາຈະຢູ່ໃນອຸນຫະພູມທີ່ເໝາະສົມແລະຄົງສະພາບເດີມສ່ວນໃນຄົນທີ່ຕ້ອງໃຊ້ຢາທັນທີແຕ່ຢາໄດ້ອ່ອນໄປແລ້ວກໍສາມາດທີ່ຈະນຳຢາໄປແຊ່ຕູ້ເຢັນປະມານ5ນາທີຢາກໍຈະກັບໄປຢູ່ໃນສະພາບທີ່ໃຊ້ງານໄດ້ເຊັ່ນກັນ
ຢາສອດຊ່ອງຄອດໃຊ້ວິທີອົມກໍໄດ້
ສຳລັບຢາເໜັບຊ່ອງຄອດເປັນຢາທີ່ເຮັດຈາກເບດຂອງໂພລີເອດທິລີນໄກຄອນຊຶ່ງສາມາດຮັບກິນໄດ້ແຕ່ກ່ອນມີວິທີການປິ່ນປົວໂດຍໃຫ້ອົມຢາຊ່ອງຄອດນັ້ນເປັນເພາະທາງການແພດຍັງບໍ່ມີຢາທີ່ໃຊ້ປິ່ນປົວເຊື້ອຣາໃນຊ່ອງປາກຈຶ່ງນຳຢາຕົວນີ້ມາໃຊ້ໃນລັກສະນະສະເພາະທີ່ເພື່ອໃຫ້ຢາໄດ້ສຳຜັດກັບພື້ນຜິວພາຍໃນປາກໃນຊ່ວງໄລຍະເວລາໜຶ່ງແຕ່ປະຈຸບັນມີການຜະລິດຢາອົມສຳລັບຂ້າເຊື້ອຣາໃນຊ່ອງປາກອອກມາໃຊ້ແລ້ວແລະເປັນຢາທີ່ມີລາຄາບໍ່ແພງນໍາອີກ
ເອກະສານແນະນໍາການໃຊ້ຢາ
ເອກະສານແນະນໍາການໃຊ້ຢາສ່ວນໃຫຍ່ຈະເປັນຂໍ້ມູນທີ່ໄດ້ຈາກການສຶກສາຫລືມີລາຍງານກ່ຽວກັບຢາໂຕນັ້ນເຮັດໃຫ້ໃນເອກະສານແນະນໍາຢາມີຄຳເຕືອນກ່ຽວກັບຜົນຂ້າງຄຽງຂອງຢາຫລວງຫລາຍຊຶ່ງການໃຊ້ຢາຈິງອາດຈະບໍ່ເກີດຜົນຂ້າງຄຽງເຫລົ່ານັ້ນກໍໄດ້ໂດຍໝໍແລະໝໍການຢາທີ່ສັ່ງໃຊ້ຢາກໍຈະມີການຕິດຕາມຜູ້ປ່ວຍຢ່າງສະຫມ່ຳສະເໝີຊຶ່ງຖ້າມີອາການບໍ່ປະສົງຮ້າຍແຮງກໍອາດຈະສັ່ງຫ້າມໃຊ້ແລະອາດຈະມີຂໍ້ຫ້າມຜູ້ປ່ວຍບາງກຸ່ມນໍາອີກຢ່າງໃດກໍຕາມຜູ້ປ່ວຍບໍ່ຄວນໄປຊື້ຢາໃຊ້ເອງເນື່ອງຈາກອາດເກີດອັນຕະລາຍຂຶ້ນໄດ້
ຢາກ່ອນອາຫານກິນແບບໃດ?
ຢາທີ່ກຳນົດໃຫ້ມີການກິນກ່ອນອາຫານຄວນກິນກ່ອນກິນອາຫານປະມານ30ນາທີເນື່ອງຈາກອາຫານຈະມີຜົນຕໍ່ການດູດຊຶມຂອງຢາບາງຊະນິດເຊັ່ນ:ເພນນິຊິລິນຫລືແອມພິຊິນລິນໂດຍເຮັດໃຫ້ຢາອອກລິດໄດ້ບໍ່ດີແລະອາດຈະຖືກທຳລາຍຈາກກົດໃນກະເພາະອາຫານດັ່ງນັ້ນຈຶ່ງຕ້ອງເຮັດໃຫ້ຢາອອກລິດກ່ອນທີ່ອາຫານຈະໄປເຖິງກະເພາະອາຫານ
ໃນກໍລະນີທີ່ລືມກິນຢາກ່ອນອາຫານແລະກິນອາຫານໄປແລ້ວຄວນຖິ້ມໄລຍະເວລາຫລັງກິນອາຫານໄວ້ປະມານ 2 ຊົ່ວໂມງແລ້ວຈຶ່ງກິນຢານັ້ນສ່ວນການນຳຢາທີ່ລືມກິນໄປກິນເພີ່ມຮ່ວມກັບຢາທີ່ຕ້ອງການກິນໃນເທື່ອຕໍ່ໄປເປັນການກະທຳທີ່ບໍ່ຖືກຕ້ອງແລະອາດເກີດອັນຕະລາຍຕໍ່ຜູ້ໃຊ້ຢາໄດ້ນອກຈາກນັ້ນຍັງບໍ່ຄວນກິນຢາຕອນທ້ອງວ່າງແລະຮູ້ສຶກຢາກຫລາຍໆເນື່ອງຈາກຢາອາດຖືກທຳລາຍໂດຍກົດທີ່ຫລັ່ງອອກມາໃນກະເພາະອາຫານໄດ້
ການກິນຢາທີ່ມີຜົນຂ້າງຄຽງເຮັດໃຫ້ຢາກນອນ
ສຳລັບຢາທີ່ມີຜົນຂ້າງຄຽງເຮັດໃຫ້ຢາກນອນຈະມີຄຳເຕືອນລະບຸໃນຂ້າງກ່ອງຢາວ່າເປັນຢາທີ່ມີຜົນເຮັດໃຫ້ຢາກນອນແລະມີຜົນຕໍ່ການປະຕິບັດວຽກງານເນື່ອງຈາກຢາຈະເຮັດໃຫ້ເກີດອາການຢາກນອນຫລືເຮັດໃຫ້ການຄວບຄຸມການເຄື່ອນໄຫວຂອງຮ່າງກາຍຊ້າກວ່າປົກກະຕິເຮັດໃຫ້ບໍ່ມີສະມາທິໃນການເຮັດວຽກງານຈຶ່ງສ່ຽງຕໍ່ການເກີດອຸປະຕິເຫດໄດ້ງ່າຍດັ່ງນັ້ນຖ້າໝໍຫລືໝໍຢາສັ່ງໃຊ້ຢາທີ່ຜົນຂ້າງຄຽງເຮັດໃຫ້ຢາກນອນມື້ລະ1ເມັດກໍຄວນເລືອກກິນໃນໄລຍະກ່ອນນອນ
ຢ່າງໃດກໍຕາມຜົນຂ້າງຄຽງທີ່ເຮັດໃຫ້ຢາກນອນຈະຂຶ້ນຢູ່ກັບຄວາມທົນຂອງຜູ້ປ່ວຍແຕ່ລະຄົນໂດຍ1-2ມື້ທໍາອິດທີ່ກິນຢາຜູ້ໃຊ້ຢາອາດຈະມີອາການຢາກນອນແຕ່ຫລັງຈາກນັ້ນຮ່າງກາຍກໍຈະມີການປັບໂຕເຮັດໃຫ້ບໍ່ຢາກນອນຈາກການກິນຢາໂຕນີ້ແຕ່ກໍຄວນລະວັງເນື່ອງຈາກຢາຍັງມີຜົນຕໍ່ການຄວບຄຸມການເຄື່ອນໄຫວຂອງຮ່າງກາຍນໍາອີກ
ກ່ອນການໃຊ້ຢາຄວນປຶກສາໝໍແລະໝໍການຢາກ່ອນແລະເວລາໄປໃຊ້ບໍລິການທີ່ຮ້ານຂາຍຢາກໍຄວນຖາມໝໍລວມທັງສອບຖາມທຸກເທື່ອວ່າຢາທີ່ໄດ້ຮັບມາເປັນຢາຫຍັງໃຊ້ປິ່ນປົວອາການຫຍັງແລະຄວນອ່ານສະຫລາກຢາກ່ອນການໃຊ້ຢາທຸກເທື່ອນໍາອີກ