ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 20 ພຶດ​ສະ​ພາ​ນີ້​ວ່າ ນາງ ອະ​ລິກ ແຄັດ​ເທີ​ຣີນ ທິກ​ເຄິນ​ແມນ ອາ​ຍຸ 27 ປີ ເຊິ່ງ​ເປັນ​ສາວ​ຂາຍ​ບໍ​ລິ​ການ​ທາງ​ເພດ ລະ​ດັບ​ລາ​ຄາ​ສູງ ໄດ້ຖືກ​ສານ​ຕັດ​ສິນ​ຕັດ​ອິດ​ສະ​ລະ​ພາບ ເປັນ​ເວ​ລາ 6 ປີ ຈາກ​ເຫດ​ທີ່​ນາງ​ສີດ​ເຮ​ໂຣ​ອີນ ໃຫ້​ກັບ ທ່ານ ຟໍ​ເຣດ ເຮ​ສ ອາ​ຍຸ 51 ປີ ໜຶ່ງ​ໃນ​ຜູ້​ບໍ​ລິ​ຫານ​ລະ​ດັບ​ສູງ​ຂອງ​ບໍ​ລິ​ສັດ​ກູ​ເກີ້ນ ຈົນ​ເສຍ​ຊີ​ວິດ​ ໃນ​ຂະ​ນະ​ທີ່​ກຳ​ລັງ​ລ່ອງ​ເຮືອ​ສຳ​ລານ ຢູ່​ໃກ້​ກັບ​ຊາຍ​ຝ​ັ່ງ​ລັດ​ກາ​ລິ​ຟໍ​ເນຍ ເມື່ອ​ເດືອນ​ພະ​ຈິກ​ປີ 2013 ທີ່​ຜ່ານ​ມາ.

ໄອ​ຍະ​ການ​ຜູ້​ກ່າວ​ຟ້ອງ ໄດ້​ພົບ​ຫລັກ​ຖານ​ຈາກ​ກ້ອງວົງ​ຈອນ​ປິດເທິງ​ເຮືອ​ສຳ​ລານ ເຊິ່ງ​ສະ​ແດງ​ໃຫ້​ເຫັນ​ວ່າ ນາງ ທິກ​ເຄິນ​ແມນ ບໍ່​ໄດ້​ມີ​ຄວາມ​ພະ​ຍາ​ຍາມ​ໃດໆ ທີ່​ຈະໃຫ້​ການ​ຊ່ວຍ​ເຫລືອ​ຜູ້​ເສຍ​ຊີ​ວິດ ຫລັງ​ຈາກ​ທີ່​ໄດ້​ສີດ​ຢາ​ເຮ​ໂຣ​ອີນ​ໃສ່​ແລ້ວ ແຕ່​ຊ້ຳ​ພັດ​ເອົາ​ຕີນ​ຢຽບ​ຮ່າງ​ກາຍ​ຂອງ​ເຂົາຫລາຍ​ຄັ້ງ ພ້ອມ​ກັບ​ກິນ​ວາຍ​ໄປ​ນຳ ກ່ອນ​ທີ່​ນາງ​ຈະ​ອອກ​ຈາກ​ເຮືອ​ໄປ ໂດຍ​ບໍ່​ໄດ້​ແຈ້ງ​ໃຫ້​ເຈົ້າ​ໜ້າ​ທີ່​ຮັບ​ຊາບ​ເຖິງ​ເຫດ​ທີ່​ເກີດ​ຂຶ້ນ.

ແນວ​ໃດ​ກໍ​ຕາມ ທະ​ນາຍ​ຂອງ ນາງ ທິກ​ເຄິນ​ແມນ ໄດ້​ຢືນ​ຢັນ​ວ່າ ນາງ​ບໍ່​ໄດ້​ມີ​ເຈ​ຕະ​ນາ​ທຳ​ຮ້າຍ​ ທ່ານ ຟໍ​ເຣດ ແຕ່​ຢ່າງ​ໃດ ໂດຍ​ການ​ສີດ​ເຮ​ໂຣ​ອີນ​ນັ້ນ ແມ່ນ​ເຮັດ​ຕາມ​ການ​ຮ້ອງ​ຂໍ​ໂດຍ​ສະ​ໝັກ​ໃຈ​ຂອງ​ຜູ້​ກ່ຽວ​ເອງ ເຮັດ​ໃຫ້​ສານ​ຕັດ​ສິນ​ໃຫ້​ນາງ ມີ​ຄວາມ​ຜິດ​ໃນ​ຖານ​ກະ​ທຳ​ການ​ໃຫ້​ຜູ້​ອື່ນ​ເຖິງ​ແກ່​ຄວາມ​ຕາຍ ໂດຍ​ບໍ່​ເຈ​ຕະ​ນາ ເຊິ່ງ​ມີ​ໂທດ​ຕັດ​ອິດ​ສະ​ຫລະ​ພາບ ເປັນ​ເວ​ລາ 6 ປີ.