ໂດຍຕອບສະໜອງຕາມການເຊື້ອເຊີນຂອງພັກປະຊາຊົນປະຕິວັດລາວ ກຳມະການກົມການເມືອງ ຄະນະຜູ້ແທນພັກກອມມູນິດສະຫະພັນຣັດເຊຍ ນຳໂດຍທ່ານ ກລືຈກົບ ອັນເດຼ ເອບ ເກນນິເອວິຈ ຄະນະບໍລິຫານງານສູນກາງພັກກອມມູນິດ ສະຫະພັນຣັດເຊຍ ສະມາຊິກສະພາ ຫົວໜ້າກຸ່ມພັກກອມມູນິດສະຫະພັນຣັດເຊຍ ປະຈຳສະພາດູມາ ນະຄອນຫຼວງມົດສະກູ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 16-22 ພຶດສະພາ 2015ເພື່ອເປັນການສືບຕໍ່ຮັດແໜ້ນຄວາມສາມັກຄີ.
ວັນທີ 19 ພຶດສະພາ 2015 ທີ່ຄະນະພົວພັນຕ່າງປະເທດສູນກາງພັກ ທ່ານນາງ ສູນທອນ ໄຊຍະຈັກ ກຳມະການສູນກາງພັກ ຮອງຫົວໜ້າຄະນະພົວພັນຕ່າງປະເທດສູນກາງພັກ ລັດຖະມົນຕີຊ່ວຍວ່າການກະຊວງການຕ່າງປະເທດ ໄດ້ພົບປະ ແລະ ເຮັດວຽກກັບຄະນະຜູ້ແທນພັກກອມມູນິດສະຫະພັນຣັດເຊຍ ນຳໂດຍທ່ານ ກລືຈກົບ ອັນເດຼ ເອບ ເກນນິເອວິຈ ເຊິ່ງການພົບປະຄັ້ງນີ້ ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຢູ່ແຕ່ລະ ປະເທດ ການເຄື່ອນໄຫວຂອງແຕ່ລະພັກ ແລກປ່ຽນສະພາບການກ່ຽວກັບບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ ພ້ອມທັງປຶກສາຫາລືກ່ຽວກັບທິດທາງຮ່ວມມືລະຫວ່າງສອງພັກ ໃນຊຸມປີຕໍ່ໜ້າ ແລະ ຕີລາຄາສູງຕໍ່ຜົນສຳເລັດຂອງການພົວພັນຮ່ວມມືລະຫວ່າງສອງພັກ-ສອງ ລັດ ແລະ ປະຊາຊົນສອງປະເທດ ລາວ-ຣັດເຊຍ ທີ່ມີມາແຕ່ດົນນານໃຫ້ນັບມື້ແຕກດອກອອກຜົນຍິ່ງຂຶ້ນ.
ໃນໄລຍະຢ້ຽມຢາມ ສປປ ລາວ ຄະນະຜູ້ແທນພັກກອມມູນິດສະຫະພັນຣັດເຊຍ ໄດ້ເຂົ້າຢ້ຽມຄຳນັບການນຳ ພົບປະ ແລະ ເຮັດວຽກກັບສະພາແຫ່ງຊາດ ສະມາຄົມມິດຕະພາບລາວ-ຣັດເຊຍ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ສູນກາງສະຫະພັນແມ່ຍິງລາວ ຄະນະພັກ ແລະ ອຳນາດການປົກຄອງແຂວງຫຼວງພະບາງ ພ້ອມກັນນັ້ນ ຍັງໄດ້ພົບປະກັບບັນດາອະດີດນັກສຶກສາລາວ ທີ່ຈົບຈາກສະຫະພາບໂຊວຽດ ທ່ຽວຊົມສະຖານທີ່ປະຫວັດສາດ ແລະ ວັດທະນະທຳຈຳນວນໜຶ່ງຢູ່ແຂວງຫຼວງພະບາງ ແລະ ນະຄອນຫຼວງວຽງຈັນ.
ແຫລ່ງຂ່າວ: ວຽງຈັນໃໝ່