ກະຊວງສຶກສາທິການ ແລະ ກິລາ (ສສກ) ໄດ້ຈັດກິດຈະກຳສ້າງຂະບວນການອອກແຮງງານ
ລວມ ແຂ່ງຂັນສ້າງຜົນງານ ເພື່ອຄຳນັບຮັບຕ້ອນວັນສຳຄັນຂອງຊາດ ກໍ່ຄື ວັນສະຖາປະນາ ສປປ
ລາວ ຄົບຮອບ 40 ປີ ແລະ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກ ກະຊວງສຶກສາທິການ
ແລະ ກິລາ.
ການສ້າງຂະບວນການອອກແຮງງານລວມ ດັ່ງກ່າວໄດ້ມີຂຶ້ນເມື່ອວັນທີ 9 ພຶດສະພາ ຜ່ານມາ ທີ່ສະໜາມກິລາແຫ່ງຊາດ (ຫຼັກ
16) ນະຄອນຫຼວງວຽງ ຈັນ, ນຳພາໂດຍທ່ານ ບົວລານ ສິລິປັນຍາ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ, ມີ
ຄະນະນຳກະຊວງ ພ້ອມດ້ວຍອ້າຍເອື້ອຍນ້ອງພະນັກງານລັດຖະກອນ, 3 ອົງການຈັດຕັ້ງມະຫາຊົນ ຈາກບັນດາກົມ, ຫ້ອງການ,
ສູນ, ສະຖາບັນອ້ອມຂ້າງກະຊວງສຶກສາທິການ ແລະ ກິລາ ເຂົ້າຮ່ວມຢ່າງຕັ້ງໜ້າ ແລະ ເປັນຂະບວນການຟົດຟື້ນ.
ສະເພາະການຈັດກິດຈະກຳສ້າງຂະບວນການອອກແຮງງານລວມຄັ້ງນີ້ ເປັນການສ້າງຂະບວນການຄຳນັບຮັບຕ້ອນວັນສຳຄັນ
ຂອງຊາດ ຄື: ວັນສະຖາປະນາ ສປປ ລາວ ຄົບຮອບ 40 ປີ (2 ທັນວາ 1975- 2 ທັນວາ 2015) ແລະ ກອງປະຊຸມໃຫຍ່ ຄັ້ງທີ
VIII ຂອງອົງຄະນະພັກ ກະຊວງສຶກສາທິການ ແລະ ກິລາ ເຊິ່ງຂະບວນການອອກແຮງງານລວມ ດັ່ງກ່າວ ໄດ້ມີການຕັດຫຍ້າ ແລະ ອານາໄມບໍລິເວນເກີດຫຍ້າຍາວ ແລະ ຮົກເຮື້ອ ທີ່ເບິ່ງແລ້ວບໍ່ງາມ ຕາ, ບໍ່ເປັນລະບຽບຮຽບຮ້ອຍ ໃຫ້ມີຄວາມສະອາດງາມຕາ ແລະ ສວຍງາມຂຶ້ນກວ່າເກົ່າ.
ນອກຈາກນັ້ນ, ການຈັດກິດຈະກຳດັ່ງກ່າວຍັງເປັນການສ້າງສາຍພົວພັນ, ຄວາມສາມັກຄີ ລະຫວ່າງ ຄະນະນຳ ກະຊວງ ແລະ
ອ້າຍເອື້ອຍນ້ອງພະນັກງານລັດຖະກອນ ພາຍໃນ ກະຊວງສຶກສາທິການ ແລະ ກິລາ ໃຫ້ມີຄວາມປອງດອງ ຊ່ວຍເຫຼືອເຊິ່ງກັນ ແລະ
ກັນ, ພ້ອມກັນປະຕິບັດວຽກງານຂອງຂະແໜງການສຶກສາ ໃຫ້ມີຄວາມກ້າວໜ້າ ແລະ ຄຸນະພາບສູງຂຶ້ນເລື້ອຍໆ.