ງານວິໄຈໃໝ່ພົບຂໍ້ມູນທີ່ໜ້າຕົກໃຈວ່າຊັ້ນໄຂມັນກ້ອງຜິວໜັງຂອງຄົນເຮົາບໍ່ໄດ້ຂາດປະໂຫຍດໂດຍໝົດກົງກັນຂ້າມມັນເປັນສ່ວນທຳອິດຂອງຮ່າງກາຍທີ່ມີປະຕິກິລິຍາຕໍ່ແບກທີເຣຍຫລືເຊື້ອອະໂຫລກທີ່ລ່ວງລ້ຳເຂົ້າມາແລະເຮັດຫນ້າທີ່ຕໍ່ຕ້ານຍືດເວລາໄວ້ຈົນເມັດເລືອດຂາວເດີນທາງມາຮອດຈຸດທີ່ເກີດບາດແຜ
ທ່ານໝໍ ລິຊາລ ກັນໂຣ ໝໍຜູ້ຊ່ຽວຊານດ້ານຜິວໜັງຈາກມະຫາວິທະຍາໄລແຫ່ງລັດແຄລິຟໍເນຍສຳນັກການແພດຊານດິເອໂກຊຶ່ງເປັນໜຶ່ງໃນທີມວິໄຈດັ່ງກ່າວລະບຸວ່າສິ່ງທີ່ຄົ້ນພົບເປັນເລື່ອງຄິດບໍ່ເຖິງເພາະບໍ່ເປັນທີ່ຮູ້ກັນມາກ່ອນວ່າຈຸລັງໄຂມັນສາມາດຜະລິດສານຕໍ່ຕ້ານຈຸລິນຊີຂຶ້ນມາເຮັດຫນ້າທີ່ຈັດການກັບມັນໄດ້ນໍາອີກ
ໃນການສຶກສາທີມວິໄຈໃຫ້ໜູທົດລອງໄດ້ຮັບເຊື້ອແບກທີເຣຍສະຕາໄຟໂລຄອກຄັດອໍເລອັດທີ່ດື້ຢາເມທິຊິລິນ(ເອັມອາລເອດເອ)ຊຶ່ງພົບຕາມຜິວໜັງຂອງຄົນແລະດື້ຢາປະຕິຊີວນະຫລາຍຊະນິດລວມທັງອາດເຮັດໃຫ້ເກີດອາການເຖິງເສັຍຊີວິດໄດ້ແລະພົບວ່າຊັ້ນໄຂມັນກ້ອງຜິວໜັງຂອງໜູທົດລອງບໍລິເວນທີ່ເປັນບາດແຜເປີດຊຶ່ງໄດ້ຮັບເຊື້ອເຂົ້າໄປໜາຂຶ້ນ ແລະເຮັດຫນ້າທີ່ຜະລິດສານປະກອບທີ່ເອີ້ນວ່າ:ຄາເທໄລຊິດິນອອກມາເພື່ອຈັດການກັບແບກທີເຣຍກ່ອນທີ່ລະບົບພູມຄຸ້ມກັນຂອງຮ່າງກາຍຈະສົ່ງຈຸລັງເມັດເລືອດຂາວພິເສດ ຕົວຢ່າງນິວໂຊຟິນເຂົ້າມາບໍລິເວນທີ່ເກີດບາດແຜເພື່ອຂ້າແບກທີເຣຍທີ່ລ່ວງລ້ຳເຂົ້າມາ ຊຶ່ງຕ້ອງໃຊ້ເວລາດົນນານ
ນອກຈາກນັ້ນການສຶກສາຍັງພົບອີກວ່າໜູທີ່ບໍ່ມີຈຸລັງໄຂມັນທີ່ສຸຂະພາບສົມບູນດີຈະລົ້ມປ່ວຍເລື້ອຍໆກວ່າແລະຕິດເຊື້ອເອັມອາລເອດເອສາຫັດກວ່າໜູທີ່ມີຊັ້ນໄຂມັນສົມບູນ
ຢ່າງໃດກໍຕາມການວິໄຈເທື່ອນີ້ບໍ່ໄດ້ສະແດງໃຫ້ເຫັນວ່າການມີຊັ້ນໄຂມັນສະສົມຫລາຍໆ ໃນຮ່າງກາຍຈະເຮັດໃຫ້ຮ່າງກາຍໄດ້ປ້ອງກັນການຕິດເຊື້ອໄດ້ດີກວ່າ
ນອກຈາກນັ້ນພາວະຕຸ້ຍເກີນຂີດແລະພາວະຕໍ່ຕ້ານອິນຊູລິນຈະເຮັດໃຫ້ຈຸລັງໄຂມັນບໍ່ເຮັດຫນ້າທີ່ຕາມປົກກະຕິນໍາອີກ