ມະຫາວິທະຍາໄລ ແຫ່ງຊາດ ຮ່ວມກັບ ສະຖານທູດຍີ່ປຸ່ນ ແລະ ສະຖາບັນພັດທະນາຊັບພະຍາກອນມະນຸດ ລາວ-ຍີ່ປຸ່ນ ໄດ້ຈັດການປະຖົມນິເທດຄວາມຮູ້ ກ່ຽວກັບທຶນການສຶກສາລັດຖະບານຍີ່ປຸ່ນ ໃນວັນທີ 6 ພຶດ ສະພາ 2015 ທີ່ ມະຫາວິທະຍາໄລແຫ່ງຊາດ ໂດຍມີ ທ່ານ ຮສຈ ດຣ. ຄຳຜົງ ນາມມະວົງມີໄຊ ຫົວໜ້າຫ້ອງການວິຊາການ ມະຫາວິທະຍາໄລແຫ່ງຊາດ, ທ່ານນາງ ຢູໂກ ຟຸຕະໂມໂຕະ ຫົວໜ້າພະແນກສຶກສາ, ວັດທະນະທຳ ແລະ ຖະແຫລງຂ່າວ ສະຖານທູດຍີ່ປຸ່ນ ແລະ ນັກສຶກສາ ເຂົ້າຮ່ວມ.
ທ່ານ ທ່ານ ດຣ. ຄຳຜົງ ນາມມະວົງມີໄຊ ກ່າວວ່າ: ການປະຖົມນິເທດໃນຄັ້ງນີ້ ເພື່ອໃຫ້ຄວາມຮູ້ ແກ່ນັກສຶກສາ ທີ່ມີຄວາມສົນໃຈຢາກໄປສຶກສາຕໍ່ຢູ່ປະເທດຍີ່ປຸ່ນ ເຊິ່ງປີນີ້ ມີທຶນໃນລະດັບ ຊັ້ນສູງທົ່ວໄປ, ຊັ້ນສູງດ້ານເຕັກໂນໂລຢີ, ປະລິນຍາຕີ, ປະລິນຍາໂທ ແລະ ປະລິນຍາເອກ, ໃນປີຜ່ານມາລັດຖະບານຍີ່ປຸ່ນໄດ້ໃຫ້ທຶນການສຶກສາ ຫລາຍປະເພດ ແລະ ມີນັກສຶກສາລາວ ປະມານ 60 ຄົນ ໄປສຶກສາຕໍ່ທີ່ປະເທດຍີ່ປຸ່ນໃນແຕ່ລະປີ ເຊັ່ນທຶນຈາກ JDS ແລະ YLP ເຊິ່ງມີທັງທຶນສຳລັບ ພະນັກງານລັດ ແລະ ທຶນເປີດກວ້າງສຳລັບທຸກພາກສ່ວນນຳອີກ.
ສຳລັບ ທຶນການສຶກສາຕໍ່ປະເທດຍີ່ປຸ່ນໄດ້ເປີດຮັບສະໝັກແລ້ວ ເຊິ່ງລະດັບຊັ້ນສູງ ແລະ ປະລິນຍາຕີ ຈະປິດຮັບສະໝັກໃນວັນທີ 6 ກໍລະກົດ 2015, ສ່ວນປະລິນຍາໂທ ແລະ ເອກ ແມ່ນວັນທີ 17 ມິຖຸນາ 2015 . ສາມາດດາວໂຫລດແບບຟອມໄດ້ຈາກເວບໄຊ ຂອງສະຖານທູດຍີ່ປຸ່ນ www.la.emb-່japan.go.jp
ແຫລ່ງຂ່າວ: ສຳນັກຂ່າວສານປະເທດລາວ