ກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງຊຽງຂວາງ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 6 ພຶດສະພາ 2015 ນີ້, ຢູ່ຫ້ອງປະຊຸມສຳນັກງານປົກຄອງແຂວງຊຽງຂວາງ ແລະຈະດຳເນີນເປັນເວລາ 3 ວັນ ພາຍໃຕ້ການເປັນປະທານ ຂອງສະຫາຍ ສຈ. ດຣ ສົມກົດ ມັງໜໍ່ເມກ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຊຽງຂວາງ, ໃຫ້ກຽດເຂົ້າຮ່ວມໃນພິທີ ມີສະຫາຍ ທອງສິງ ທຳມະວົງ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ມີເລຂາພັກແຂວງໄຊສົມບູນ ແລະແຂວງຫົວພັນ, ມີບັນດາຄະນະປະຈຳພັກແຂວງ, ກຳມະການພັກແຂວງ, ແຂກຖືກເຊີນ ແລະຜູ້ແທນສົມບູນເຂົ້າຮ່ວມ 209 ສະຫາຍ, ຍິງ 23 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກ 13 ພັນກວ່າຄົນ ໃນທົ່ວແຂວງ.
ໃນພິທີ ສະຫາຍ ສຈ. ດຣ ສົມກົດ ມັງໜໍ່ເມກ ໄດ້ຂຶ້ນກ່າວເປີດພິທີຢ່າງເປັນທາງການ ເຊິ່ງສະຫາຍໄດ້ໃຫ້ຮູ້ເຖິງຄວາມໝາຍຄວາມສຳຄັນຂອງກອງປະຊຸມໃນຄັ້ງ ນີ້ ທັງໄດ້ຮຽກຮ້ອງໃຫ້ຜູ້ແທນກອງປະຊຸມ ຈົ່ງພ້ອມກັນປະກອບຄຳຄິດຄຳເຫັນໃສ່ຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະບັນດາຄາດໝາຍສູ້ຊົນໃນຊຸມປີຕໍ່ໜ້າ ໃຫ້ມີຄວາມອຸດົມສົມບູນ, ພ້ອມດຽວກັນນັ້ນ ສະຫາຍຍັງໄດ້ຜ່ານລາຍງານການເມືອງ ທັງ 2 ພາກ ເຊິ່ງໄດ້ຍົກໃຫ້ເຫັນຜົນສຳເລັດ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ ໄລຍະ 5 ປີ ຜ່ານມາ ໃນແຕ່ລະ ຂົງເຂດ ເປັນຕົ້ນແມ່ນ ຂົງເຂດປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ ແລະການແກ້ໄຂຄວາມທຸກຍາກ, ວັດ ທະນະທຳ-ສັງຄົມ, ປັບປຸງອຳນາດການປົກຄອງ ແລະສ້າງສະຕິເຄົາລົບກົດໝາຍ, ການເສີມສ້າງຄວາມມັກຄີເປັນປຶກແຜ່ນ ຂອງປະຊາຊົນບັນດາເຜົ່າ ແລະວຽກງານການພົວພັນຕ່າງປະເທດ ພ້ອມທັງຍົກໃຫ້ເຫັນເຖິງຂໍ້ຄົງຄ້າງທີ່ຈະຕ້ອງໄດ້ແກ້ໄຂໃນຊຸມປີ ຕໍ່ໜ້າ. ພ້ອມນີ້ ຍັງໄດ້ຮັບຟັງຮ່າງລາຍງານ ກ່ຽວກັບການພັດທະນາເສດຖະກິດ-ສັງຄົມໄລຍະຜ່ານມາ ແລະວິໄສທັດຮອດປີ 2030, ຍຸດທະສາດຮອດປີ 2025, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ແຂວງຊຽງຂວາງ ເຊິ່ງສະເໜີໂດຍ ສະຫາຍ ດວງຈິດ ຈັ້ງໄຊວ່າງ ຄະນະປະຈຳພັກແຂວງ, ຮອງເຈົ້າແຂວງໆ ຊຽງຂວາງ, ນອກຈາກນັ້ນ ກອງປະຊຸມຍັງຈະໄດ້ຮັບຟັງຄຳຄິດຄຳເຫັນໂອ້ລົມ ຈາກຄະນະພັກຂັ້ນເທິງ ແລະພາກສ່ວນ ຕ່າງໆ.
ກອງປະຊຸມ ຍັງຈະໄດ້ປ່ອນບັດເລືອກຕັ້ງຄະນະບໍລິຫານງານພັກແຂວງຊຸດໃໝ່ ແລະເລືອກເອົາຜູ້ແທນສົມບູນ, ສຳຮອງ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກປະຊາຊົນປະຕິວັດລາວ.
ແຫລ່ງຂ່າວ: ສຳນັກຂ່າວສານປະເທດລາວ