3ກຸ່ມທີ່ບໍ່ຄວນລົງແຊ່ນ້ຳຮ້ອນຄືຜູ້ປ່ວຍພະຍາດຊຳເຮື້ອເຊັ່ນພະຍາດຄວາມດັນເລືອດສູງ ພະຍາດຫົວໃຈ,ພະຍາດເບົາຫວານ,ກຸ່ມຍິງຖືພາແລະຜູ້ເປັນພະຍາດຜິວໜັງ
ຈາກກໍລະນີທີ່ມີຂ່າວນັກທ່ອງທ່ຽວຄົນໜຶ່ງເກີດບັນຫາຮີທົດໂຕກຊັອກໝົດສະຕິຫລັງລົງໄປແຊ່ນ້ຳຮ້ອນທີ່ແຂວງກະບີ່ປະເທດໄທຂະນະນີ້ປິ່ນປົວທີ່ຫ້ອງໄອຊີຢູ
ກໍລະນີທີ່ເກີດຂຶ້ນເຖິງວ່າຈະບໍ່ໄດ້ເກີດເລື້ອຍໆກໍຕາມແຕ່ເມື່ອເປັນແລ້ວມີອັນຕະລາຍເຖິງຊີວິດເນື່ອງຈາກການລົງໄປແຊ່ນ້ຳຮ້ອນທີ່ມີອຸນຫະພູມສູງກວ່າຮ່າງກາຍຄືສູງກວ່າ37ອົງສາຖ້າຮ່າງກາຍບໍ່ສາມາດປັບໂຕໄດ້ທັນຈະກະທົບຕໍ່ການເຮັດວຽກງານຂອງອະໄວຍະວະພາຍໃນໄດ້
ການແຊ່ນ້ຳອຸ່ນ,ນ້ຳພຸຮ້ອນ,ນ້ຳແຮ່ມີປະໂຫຍດຊ່ວຍກະຕຸ້ນການໄຫລວຽນເລືອດໃນຮ່າງກາຍຜ່ອນຄາຍຄວາມເຄັ່ງຄຽດຂອງກ້າມຊີ້ນແລະຫລຸດຄວາມຄຽດໄດ້ແຕ່ຂັ້ນຕອນການລົງແຊ່ຕ້ອງຄ່ອຍເປັນຄ່ອຍໄປເພື່ອໃຫ້ຮ່າງກາຍປັບໂຕ
ບຸກຄົນທີ່ບໍ່ຄວນລົງແຊ່ໃນນ້ຳປະເພດນີ້ມີ3ກຸ່ມໃຫຍ່ຄື
1.ຜູ້ທີ່ມີພະຍາດປະຈຳຕົວເຊັ່ນ:ພະຍາດຄວາມດັນເລືອດສູງ,ພະຍາດຫົວໃຈ,ເບົາຫວານ ຊຶ່ງເປັນພະຍາດທີ່ມີຜົນຕໍ່ຫລອດເລືອດແລະຫົວໃຈຢູ່ແລ້ວໂດຍສະເພາະຜູ້ປ່ວຍພະຍາດເບົາຫວານຈະມີຄວາມສ່ຽງເກີດບາດແຜພອງທີ່ຜິວໜັງທີ່ຕີນອາດພົບການຕິດເຊື້ອນໍາມາໄດ້
2.ຍິງຖືພາເນື່ອງຈາກອຸນຫະພູມຂອງນ້ຳຈະເຮັດໃຫ້ເສັ້ນເລືອດທີ່ໄປລ້ຽງອະໄວຍະວະຕ່າງໆໃນຮ່າງກາຍລວມທັງມົດລູກຈະຂະຫຍາຍໂຕອາດເປັນອັນຕະລາຍແກ່ເດັກນ້ອຍໃນມົດລູກແລະຕົນເອງໄດ້
3.ຜູ້ທີ່ເປັນພະຍາດຜິວໜັງອັກເສບຕິດເຊື້ອຫລືມີບາດແຜອາດເຮັດໃຫ້ເກີດການອັກເສບຫລາຍຂຶ້ນ
ໃນກໍລະນີຂອງການແຊ່ນ້ຳຄວນອ່ານຄຳແນະນຳແລະປະຕິບັດຕາມຢ່າງຖືກຕ້ອງ ສັງເກດອຸນຫະພູມຂອງນ້ຳທີ່ລະບຸໄວ້ຊຶ່ງອຸນຫະພູມທີ່ເໝາະສົມຈະຢູ່ທີ່ປະມານ40ອົງສາແລະບໍ່ຄວນແຊ່ຢູ່ໃນນ້ຳຕິດຕໍ່ກັນເປັນເວລາດົນວິທີທີ່ຖືກຕ້ອງຄືກ່ອນລົງແຊ່ນ້ຳໃຫ້ອາບນ້ຳເຮັດຄວາມສະອາດຮ່າງກາຍ20ນາທີແລະຈຸ່ມມືທົດສອບຄວາມຮ້ອນຂອງນ້ຳຈາກນັ້ນຄ່ອຍໆຢ່ອນໂຕລົງແຊ່ໃນນ້ຳຮ້ອນຢ່າງຊ້າໆເພື່ອໃຫ້ຮ່າງກາຍປັບສະພາບເຂົ້າກັບນ້ຳຮ້ອນແລະແຊ່ປະມານ10ນາທີ