ທ່ານ ສາຍທອງ ແກ້ວ​ດວງ​ດີ ຮອງ​ເຈົ້າ​ຄອງ​ນະຄອນຫຼວງ​ວຽງຈັນ ທັງ​ເປັນ​ຜູ້​ຮັບຜິດຊອບ​ໂຄງການ​ປະຕິສັງຂອນ​ຫໍພະແກ້ວ ​ໄດ້ຖະແຫຼງ​ຂ່າວ​ຕໍ່​ສື່​ມວນ​ຊົນ ໃນ​ວັນທີ 29 ເມສາ 2015 ນີ້​ໄດ້​ກ່າວວ່າ: ພາຍຫຼັງ​ທີ່​ໄດ້​ຮັບ​ມະຕິ​ຕົກລົງຂອງ​ສູນ​ກາງ​ພັກ-ລັດຖະບານ ໄດ້ແຕ່ງຕັ້ງ​ຄະນະ​ຮັບຜິດຊອບ​ ໃນການ​ປະຕິສັງຂອນ​ພິ​ພິ​ທະ​ພັນ​ຫໍພະແກ້ວ ໂຄງການ​ປະຕິສັງຂອນຫໍພະແກ້ວ​ຄັ້ງ​ນີ້ ​ແມ່ນ​ເປັນ​ຄັ້ງ​ທີ III ເຊິ່ງ​ຄະນະ​ຮັບຜິດຊອບ​ໄດ້​ຖືກແຕ່ງຕັ້ງ ແລະ ໄດ້​ດຳເນີນ​ການປະຕິສັງຂອນ​ມາ​ຕັ້ງແຕ່​ວັນ​ທີ 5 ທັນວາ 2014 ຈົນ​ຮອດ​ປັດຈຸບັນ​ນີ້ ກໍ່​ຖື​ວ່າ​ຊ່ຽວຊານ​ວິຊາ​ການ ພະນັກ​ງານທຸກ​ພາກສ່ວນ ​ໄດ້​ສຸມ​ໃສ່ຕາມ​ແຜນ​ງານ​ໃນ​ການ​ສ້ອມແປງ ​ຄັ້ງ​ທີ I ແມ່ນ​ເວົ້າ​ເຖິງ​ໂຄງຫຼັງຄາ ນັບ​ແຕ່​ຍອດ​ຊໍ່​ຟ້າລົງ​ມາເປັນ​ເວລາ 2-3 ເດືອນ​ຜ່ານ​ນັ້ນ ເຫັນ​ວ່າ​ວິຊາ​ການ​ໄດ້​ສຸມ​ໃສ່​ໃນການ​ສ້ອມແປງ ມາ​ຮອດ​ປັດຈຸບັນ ເຫັນ​ວ່າ​ຍອດ​ຊໍ່ຟ້າ ແລະ ໂຄງເທິງ​ຂອງ​ຫຼັງຄາ​ນັ້ນ ​ກໍ່​ໄດ້​ສ້ອມແປງ​ສຳເລັດ​ແລ້ວ ເພາະສະນັ້ນ ມື້​ທີ່​ເປັນ​ສິລິ​ມຸງຄຸນ​ໃຫ້​ແກ່​ການຍົກ​ຍອດ​ຊໍ່ຟ້າ​ນີ້ ການ​ນຳ ແລະ ພາກສ່ວນ​ອາວຸໂສ​ໄດ້​ເຫັນ​ດີ​ຕົກລົງ​ເອົາ​ວັນເພັງ ເດືອນ 6 ກົງກັບ​ວັນ​ທີ 2 ພຶດສະພາ 2015 ນີ້ ເປັນ​ມື້​ຍົກ​ຍອດ​ຊໍ່ຟ້າ​ຂອງ​ຫໍ​ພະແກ້ວ ດ້ວຍ​ເຫດ​ນັ້ນ ຈຶ່ງ​ຂໍ​ແຈ້ງຂ່າວ​ບຸນ​ມາ​ເຖິງ​ພຸດ​ທະ​ສາ​ສະ​ນິກະ​ຊົນ ເຂົ້າ​ຮ່ວມ​ໃນ​ການ​ຍົກຍອດ​ຊໍ່ຟ້າ​ໃນ​ຄັ້ງ​ນີ້ ທີ່ຢູ່​ພາຍ​ໃນ ​ສປປ ລາວ ກໍ່​ຄື​ທົ່ວ​ນະຄອນຫຼວງວຽງ​ຈັນ ເຊິ່ງ​ໃນ​ຕອນ​ເຊົ້າ​ຂອງວັນ​ທີ 2 ພຶດສະພາ ເລີ່ມ​ແຕ່​ເວລາ 7:00 ໂມງເປັນຕົ້ນ​ໄປ ຈະໄດ້​ມີ​ການ​ເຕົ້າໂຮມ​ບັນດາ​ແຂກຖືກ​ເຊີນ ພໍ່​ແມ່​ປະຊາຊົນ ຮອດ​ເວລາ 8:00 ໂມງ ກໍ່​ຈະ​ໄດ້​ເຮັດ​ພິທີທາງ​ການ ຍົກ​ຍອດ​ຊໍ່ຟ້າ​ຂຶ້ນ ຈົນຮອດ​ເວລາ 9:00 ໂມງ ແມ່ນເປັນ​ສິລິ​ມຸງຄຸນ​ອັນ​ຍິ່ງ​ໃຫຍ່ ຍອດຊໍ່ຟ້າ​ຈະ​ໄດ້​ສະຖິດ​ຢູ່​ເທິງ​ຍອດ​ສູງສຸດ​ຂອງ​ຫໍພະແກ້ວ ມາ​ຮອດ​ປັດຈຸ​ບັນ ​ສາມາດ​ລະດົມ​ທຶນ​ໄດ້​ທັງໝົດ 1 ຕື້​ກວ່າ​ກີບ ເງິນ​ໂດ​ລາ 15 ພັນ​ກວ່າ​ໂດ​ລາ​ສະຫະລັດ ແລະ ເງິນ​ບາດ​ໄທ 2 ແສນ​ກວ່າ​ບາດ ພ້ອມ​ດ້ວຍ​ຄຳ 3 ກິ​ໂລ ທີ່​ນຳໄປເຮັດ​ເປັນ​ສ່ວນ​ປະກອບ​ຂອງ​ຍອດຊໍ່ຟ້າ ມາ​ຮອດ​ປັດຈຸບັນ​ແມ່ນ​ສຳເລັດ​ແລ້ວ 100% ພ້ອມ​ນັ້ນ​ຍັງ​ມີວັດຖຸ​ອີກ​ຈຳນວນ​ໜຶ່ງ ພິທີ​ຍົກຍອດ​ຊໍ່ຟ້າ ໂຄງການ​ປະຕິ​ສັງຂອນ​ຫໍພະແກ້ວ​ຄັ້ງ​ນີ້ ຈະ​ມີ​ການຖ່າຍ​ທອດ​ສົດ​ທາງ​ໂທລະພາບ ແລະ ຍັງ​ເປີດ​ໂອກາດ​ໃຫ້​ພຸດ​ທະສາ​ສະ​ນິ​ກະ​ຊົນ ທັງ​ພາຍ​ໃນ ແລະ ຕ່າງປະເທດ ເຊີນ​ເຂົ້າ​ຮ່ວມ​ໂມ​ທະນາ​ທານ​ທຳບຸນ​ໃນ​ງານ​ດັ່ງກ່າວນຳ​ອີກ.

ແຫລ່ງ​ຂ່າວ: ວຽງ​ຈັນ​ໃໝ່