ວັນທີ 27 ເມສາ 2015 ນີ້ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມເຫັນໃຈເຖິງທ່ານ ຊູຊີລ ຄອຍຣາລາ ນາຍົກລັດຖະມົນຕີ ແຫ່ງ ສາທາລະນະລັດເນປານ ຕໍ່ເຫດການແຜ່ນດິນໄຫວ ໃນວັນທີ 25 ເມສາ 2015.
ເນື້ອໃນສານລະບຸວ່າ: ຂ້າພະເຈົ້າໄດ້ຮັບຂ່າວດ້ວຍຄວາມເສົ້າສະຫຼົດໃຈ ຕໍ່ເຫດການໄພທຳມະຊາດແຜ່ນດິນໄຫວ ທີ່ເກີດຂຶ້ນຢູ່ໃກ້ກັບນະຄອນຫຼວງກັດມານດູ ໃນວັນທີ 25 ເມສາ 2015 ທີ່ຜ່ານມາ ເຊິ່ງໄດ້ທຳລາຍບ້ານເຮືອນ ສຳນັກງານ ແລະ ວັດວາອາຮາມເສຍຫາຍເປັນຈຳນວນຫຼາຍ ແລະ ເຮັດໃຫ້ມີຜູ້ເສຍຊີວິດ ແລະ ໄດ້ຮັບບາດເຈັບເປັນຈຳນວນຫຼວງຫຼາຍ.
ໃນນາມລັດຖະບານປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ ຂ້າພະເຈົ້າຂໍສະແດງຄວາມເຫັນອົກເຫັນໃຈມາຍັງທ່ານ ລັດຖະບານ ແລະ ປະຊາຊົນເນປານ ທີ່ໄດ້ຮັບເຄາະຮ້າຍຈາກເຫດການໄພພິບັດໃນຄັ້ງນີ້.
ຂ້າພະເຈົ້າເຊື່ອໝັ້ນວ່າ: ພາຍໃຕ້ການນຳພາຂອງທ່ານ ແລະ ດ້ວຍການຊ່ວຍເຫຼືອຈາກນາໆຊາດ ແລະ ບັນດາປະຊາຄົມໂລກ ສາທາລະນະລັດເນປານ ຈະສາມາດຜ່ານຜ່າຄວາມຫຍຸ້ງຍາກຕ່າງໆ ແລະ ເຮັດໃຫ້ສະພາບການກັບຄືນສູ່ຄວາມເປັນປົກກະຕິໂດຍໄວ.
ແຫລ່ງຂ່າວ: ວຽງຈັນໃໝ່