ເມື່ອໃດທີ່ຜູ້ຍິງເປັນປະຈຳເດືອນໄລຍະນີ້ມັກຈະເປັນໄລຍະທີ່ສາວໆຫລາຍຄົນເປັນກັງວົນ ເພາະມັກຈະມີຄວາມປ່ຽນແປງໃນຮ່າງກາຍຫລາຍໆຢ່າງຕາມມາບໍ່ວ່າຈະເປັນການເຈັບທ້ອງປະຈຳເດືອນ,ເຈັບຫົວ,ອາລົມປັ່ນປ່ວນງ່າຍແລະຫລາຍໆຄົນນອກຈາກຈະມີອາການເຫລົ່ານີ້ແລ້ວຍັງຕ້ອງເດືອດຮ້ອນທົນກັບອາການອື່ນໆຕາມມາເຊັ່ນ:ອາການທີ່ພົບໄດ້ເລື້ອຍໆຢ່າງອາການຄັນບໍລິເວນເພດໃນລະຫວ່າງທີ່ມີປະຈຳເດືອນແລະບາງຄົນກໍອາດຈະມີອາການບວມແດງແລະແສບຄັນຮ່ວມນໍາຊຶ່ງເລື່ອງນີ້ເປັນທີ່ແນ່ນອນເລີຍວ່າຕ້ອງເປັນເລື່ອງທີ່ທໍລະມານສຸດໆສຳລັບສາວໆວ່າແຕ່ເປັນຫຍັງບາງຄົນຈຶ່ງມີອາການແບບນີ້ແລະມີສາເຫດມາຈາກຫຍັງມື້ນີ້ມີຂໍ້ມູນມາໃຫ້ສຶກສາ
ສາເຫດຂອງອາການຄັນເວລາມີປະຈຳເດືອນອາດເກີດຂຶ້ນໄດ້ຈາກ…
1.ໃນໄລຍະທີ່ມີປະຈຳເດືອນມາບໍລິເວນອະໄວຍະວະເພດຈະມີຄວາມຊຸ່ມທັບຖົມຈາກເລືອດເຮັດໃຫ້ເກີດການລະຄາຍເຄືອງຊຶ່ງເປັນສາເຫດຂອງອາການຄັນໄດ້
2.ໃນໄລຍະທີ່ມີປະຈຳເດືອນອາດຈະມີຮໍໂມນບາງຢ່າງປ່ຽນແປງເຮັດໃຫ້ເກີດອາການຄັນຈາກເຍື່ອຫຸ້ມມົດລູກລອກໂຕຊຶ່ງອາດຈະມີອາການເຈັບທ້ອງປະຈຳເດືອນຮ່ວມນໍາ
3.ເຍື່ອໂຜ້ງມົດລູກອັກເສບເນື່ອງຈາກເຊື້ອໄວຣັສ,ເຊື້ອແບກທີເຣຍຫລືເຊື້ອຣາແລະນອກຈາກອາການຄັນແລ້ວອາດຈະມີກິ່ນຜິດປົກກະຕິແລະເຈັບແສບໃນຊ່ອງຄອດຮ່ວມນໍາ
4.ແພ້ຜ້າອະນາໄມເພາະໃນຜ້າອະນາໄມບາງຍີ່ຫໍ້ຈະມີສານຕ່າງໆລວມໄປເຖິງນ້ຳຫອມ ຊຶ່ງອາດຈະເປັນສາເຫດໃຫ້ຜິວໜັງບໍລິເວນອະໄວຍະວະເພດເກີດອາການແພ້ແລະມີຜື່ນຄັນຂຶ້ນມາໄດ້ສຳລັບໃນກໍລະນີນີ້ແນະນຳໃຫ້ລອງປ່ຽນໄປໃຊ້ຜ້າອະນາໄມຍີ່ຫໍ້ອື່ນແທນ ແຕ່ຖ້າປ່ຽນແລ້ວຍັງບໍ່ເຊົາແນະນຳໃຫ້ໄປພົບແພດເພື່ອກວດສອບຫາສາເຫດອື່ນຕໍ່ໄປ
ສຳລັບອາການຄັນບໍລິເວນອະໄວຍະວະເພດໃນລະຫວ່າງທີ່ມີປະຈຳເດືອນນັ້ນເກີດໄດ້ຈາກຫລາຍສາເຫດແລະອາການນີ້ກໍຖືເປັນເລື່ອງທີ່ສາວໆບໍ່ຄວນເບິ່ງຂ້າມຖ້າຫາກໃຜທີ່ມີອາການຄັນແບບນີ້ຢູ່ເລື້ອຍໆຢ່າມົວແຕ່ທົນຢູ່ແນະນຳໃຫ້ໄປພົບແພດເພື່ອມີການກວດແລະຫາແນວທາງປິ່ນປົວຈະດີທີ່ສຸດເພື່ອສຸຂະພາບອະນາໄມທີ່ດີຂອງຕົນເຮົາເອງ